ნანაში ზუკოლი
სქანი სვენაშ თოლიჯგუა
ღორონთქ დიხას ვადალუნი,
დღასი ვაშიჭყოლიდუა
აია დო მარგალური.
სქან ქიანას სი ჩურცხინე,
ტერი გუგაგვარგვალუნი.
ბორჯი ორე გიკურცხინე,
გვერშაპი მურს ბჟადალური.
გაკურცხინე სამოჯგირო,
მუშენ ვარწყექ ვარდა თესი:
ბჟაშ მაჯინუ სქანი ჸილოს
ღერ ფაფარი ვადატესი.
ხო ქარწყექი სქუა ჯგირო,
მირაგადუ გოღათ თეში...
ფაფარამი სქანი ჸილო
შხურიცალო გოღაჭესი.
ვაგორკუნა ხე დო კუჩხი,
გაზეს გერდა ძამ მანგარო,
რინას ჯგირო გური ქუჩი,
ოიჭკომეს სამარგალო.
მოკო სქუა ჯგირო ორდენ,
ეკოხედე მუმათ ყებურს,
ქომოლ სქუალეფი მორდე,
ვემეჩქუდას მუნარკებუ.
ტერ–მოჯგირეში ჩინება
სქუალეფსი ქიდაგურე,
ორე ღორონთიში ნება
ჯა დო ბინეხ ქიდარგუე.
ინჭა ოკო დონთხორენი,
ვარე ჩქიმი მოგონელი...
მოჯგირეფი სოთ ქორენი,
არძო ოკო დოგორენი.
ჯვეშოთ გებენეფით ჸოფე
სქან ქიანა დიდი რდუნი,
მოლიმარი მოჸოროფე,
მარგალურო იბირდუნი.
გარძე მა სი რინაშ კილას,
დიდაქ გირდას მაჸალენი,
ტერიწკუმა ვეგნიკინა
ბორჯიშ ყამა გაჸალენი.
თე ზუკოლი ჯგირო მისკვი,
ნანას მეტი მუ მაჩინე,
ვაწიფორა თოლემს ნირსი,
ქორდა თეში გიმაშინეთ.
ვარკ სვენაში თოლი ვარი,
თენა მა სი ქოდამჯერი...
მარგალი რე მოლიმარი,
მარა ოკო მუმა ნჯღვერი.
რჩქინა ნერჩო ვაგირჩუ და
ხე ნჯღვერუა ვართ ინდინე;
მუ ქიმინენ ვაგიჩქუ და
მუთუნ ოკო ვაქიმინე.
გაჭყოლიდე ორე ვართი,
რინას ვარდე პასიური...
ო, დო სქუა ხოლო ართი
ნარაგადუ აზიური.
ჸილოში ჯარს შხურიშ დუდით
უჯგუ შხურიშ მაფათ ჸილო,
არძო ლიმას იმობრძგუდით,
დღას ვა ჸოფე სათაკილო.
აიაში ძუძუ–მარდი
სო აწგორე, სო გიშახე,
გურსუ ბორძალს რზოგენს ვართი
დუშმანეფი მოყივჩაღე.
მახორობა ჯინჯი ოკო,
სქუა რექ დო ნარდი მაფუქ,
ბჟაშა ქინგაჯინინუ და
სქანი ხანდა ვაბდინაფუ.
მარძგვანქ ლიმას დოშურდასი...
ველარძუდას ვარდა გური,
ნანა ირო ქორშუდასი,
აია დო მარგალური.
სქუა ათეს დოიჩინა,
რინაშორო თეს მეგანდე;
სქუათ თიწკმა მეირჩქინა –
თოლს ბჟალარას გაუმანგენქ!