ოდაბადე
ოდაბადე, ოდაბადე,
სქანდა ბრელ მაფ ორაგადე,
სი მა მაჟრათ ქუდმაბადი
შხვა ნინაშა მორაგადე…
ენომხანტუდ გურშა ირო
ომარგალეშ ბჟა დო თუთა,
მანცხვარიში ოზეშ ორო
ჩქიმ ზუგდიდი, ჯუმი, ურთა…
მა ვორდიკო სოდგა-სოდგა
სქან ყ’ოროფაშ ვამიღ კილი,
გონწყ კიდირი, ქომხუტოლე
რთხინქ ბირგულმოდირაკილო.
თოლეფ მუნაფილი გაფუ,
ნირსი ორე ჟი დო თუდო,
ქუმმაზადი, ჯვეშობურო
შონეშ გვალათ მალამრთუმდო…
ოდაბადე, დორრაბადეს,
დორრაბადეს, ოდაბადე,
მარაბადალს დორაბადანქ
რაბადელი ოდაბადე…
ჭყანიორ რექ ოდაბადე,
ბრელი ოკო ქუდაბადე,
მალიმარი გერ-ბოშეფი
დაიბადეს დო ქუდაბადენქ…
ოდაბადე, უბადობა
კინოხ გინნაღელი გაფუ,
მუსხანი რე, ვა გოიძიცუ,
ვაიბირუ დო ვაილაყ’აფუ…
ჟიშე ღორონთ ქუმოიჩინანს
ტერ-მოჯგირე მითი გაფუნ,
ველუქ თეში, ნინაშ სქანიშ
წიმოდგინა ქიდიჭყაფუ…
ოდაბადე, ოდაბადე,
ქუგონებ და, ქენმაფალი,
ქუდამჯერი, სქუა გაფუქ
ლუბაშ მილახუნაფალი…
შურ დო გურით განინალუქ
კილე კინოკართანელო,
თოლეფ სქან ხეთ ქიგემწკური
სქან გოლუა, სქან სანთელო…
ოდაბადე, ასე ოკო
გავასურე ორაგადე,
თელო ქუგორლუაფუდა
სქან ნინაშა მორაგადე…
მითაჟამიშ სქვამ ნინაშა
დუდიშულო მორაგადე…
1994 წანა, ზუგდიდი