ოდაბადე''
ოდაბადე, ოდაბადე,
ბრელ მაფჷ სქანდა ორაგადე,
მა სი ქუგორლუაფუდა,
სქანი ნინაშა მორაგადე.
ოდაბადე, ოდაბადე,
სი ანდაშა დორრაბადეს,
ოდა, ფაცხა, მარან, კარე,
ირფელ ართო დოიტატარეს;
სოთინ მუთუნი ვადოიტეს,
მინდორ–გვალა ლაკადას,
მითინ ბოდიშის ვეჩიებუ,
ვართ თქუანს დო რაგადანს.
ოხვამეფი, გეგოზგვინჯეს,
ბედია დო ილორი;
მუთ მასქჷდ სი უჸვაიჭარე,
ხომ ქორშ ჩქინ ორდჷ ირონი.
აფხაზეთი, ჩქიმი აფხა,
სქან დინაფა მანგარი რე,
ირი დღას გუმაშინექ,
ირი დღას მანგარინე.
აფხაზეთშე მუმარჩქილე;
მაფშალიაშ ჰამო ხუმა
ტანს ბუძგურია გემცენს დო
ეშე გედირთ დუდიშ თუმა.
სი ვარშუნო ოდაბადე,
წათე მაფა, ჭკვერი ქუჯი.
შურუბუმუ მუშენი რექ,
მუქ რე თაში დუგამუჯუ.
კინოხიანეფ ჯგირი რჸუნდუ,
ქიანა იჩინენდუნ ფერი,
სი ვარშუნო გერგეზჲ ცოტნე
ვარა გიორგი ჭყოინდარი.
გაიშაკურცხი, გედი ეშე,
დუდ ვემეჩა ირო ლურსუ,
თოლეფი ჯგირო გელეფუჩონჲ,
ნუმ უხარენქ ტერეფს გურსუ.
ღარჯილი ვამაპალუნიან
ვათქუა დო ვამიწუა,
ვარა გურქუ გომიხორცქუ,
სალავათის გიფუჩუა.
ოდაბადე, ოდაბადე,
ბრელი მაფ, ხოლო ორაგადე,
ბრელ ცოტნე დო ჭყოინდარი
ქორთხინქ, ხოლო ქუდაბადე.