ოდაბადე (მიმოზა ცანავა)
მოფუშკუტელ ოდაბადე
ჩქიმ არკვანიშ მაკვანწაფალი,
შურიშ ეშაკაშუა დო
შულადირ შურიშ წამალი.
თე ცაშნერი მურიცხეფი
მითინიშ ცას ვემკარწკინანს,
კვანწილ, ოკარკანტაია,
ნანა, მუ უჯგუ თიში ჯინას.
მარგალ ცირა ორკოლითი,
ტანი ოსარსალაია,
აკოწყორილ ბჟა დო თუთა,
მუ სქვამი რე ნანაია.
ჩქიმ ჩელა დო ჩქიმი ბუსკა,
მაღურჭულარ ჯაშ ფანდური,
ნანა, მუსუ ურზუ ქარწყეთ,
მარგალ ცირაშ ეფშა გური.
ჩქიმი ღალიშ ხვარჩალ შხვა რე
ჩქიმი ოწვაწვაია დოლო,
სამარგალოშ მაჭუალ ჩხანა,
დოძენძილ ჯალეფიშ ორო.
დიდაცალო ბწანქ დო მიჸორქ,
სქანი დუცუ გიფუჩუა,
ქოქიმინი თე მარდი დო
მუთუნითი ვაგომტუა.
სოდგა იბდე, მუდგა ბძირენ,
ჩქიმო სქანცალ მითინ ვა რე,
ათაქ, ათაქ ოკო ბღურე,
ათაქ, სქანი ოლაფარეს.
ართი სქანი "გოლუაფირო“
გამწმოდგინანს მაღურუსუ,
ჩქიმდე ხვამელ ჸოფედა დო
დღას ვემკორჭვებუდას დუსუ.
ჩქიმი რინა ქომწი მუ რე,
გურიშ მარდუალი ვარდე,
უსქანობა ვადმასქვამე,
ჩქიმ მოკვართხილ ოდაბადე!