ოდიარე
თე ზღვაშფერი ოდიარე,
ჰავაშო ართჷ ორგია რე,
მარა ღურუშჷ მორდია რე.
კიდირშა მუმონჭჷ შქიორა ჟვერი, _
შურიშჷ მახინწალჷ გიმაქვაქვალუ,
ეთეშჷ ისერუ, ვავა, ჩქიმშენი!
ვარა დღაქ მუჭო გეგნიგვაგვალუ?!
მუშენჷ მიზალა, ოდიარე, მიკოკვალუას,
მეიფერუანქო, მუჟამს იჸინჷ დიხაშჷ ნწალუა,
კუჩხუჩაფულეს, მოპურახილჷ აკარდამაშე?!
ვო, ოდიარე, აკაბურცხა მიჩქჷდჷ აიშახინჷ,
ათაშჷ თოლონჭექ ღორონთიშო დამაჭიჭორუ,
ვო, ოდიარე, რუმე რინას შურქუ ვაიშაღინჷ,
მორო ჩამინით გური ამარჷ-ამარჷ დიჭორუ.
ვორწყექ: ირნერი წიმოკინა, ფურინი, ღუნა,
ბჟა დო თუთაში წკირონტილი, წყარიშჷ ნართელი,
რე ტყურაია კილოთინი, ოჭიშიშჷ წყუნა,
სქანჷ ჩხვიჩხვეფიში ჯღვალიკჷ- ბირცხათ ეკოხართელი.
ამდღა შილებე ჩქიმდა ველანჭე,
მარა ღურუშა პიჯჷ მუს ელაჭე,
ერჩქინას უჯგუ დიასქანსუ ლუბას ქელაჭვე!
მუს ბგორუნდი დო მუ მაძირედუ,
მუ მაპალუდუ შურიშჷ მანგური,
ცაშე მურიცხი ვამკმაწილედუნჷ
თაქ ვამჩქუდუო, მარა ხანგური
რინა ჟი დო ჟი მემტყურუანდუ,
შქირენით თებულჷქ ქომიორზოლუ,
შქირატილჷ ყებურს გემტურუანდუ
დო ჩელა ხურხით დამაბორზალუ.
ართშა იჸინჷ დო, ოდიარე, ჸეთი დღათ ქუმურს,
ბიწკის გერნელო ქელგაზჷმუქ ხორციში ჭკუმურს,
ბაბუში ნარგის მებრიჩუნდე ითამდა ჸუმურს.
ამარჷ, შარაპიც, ხუნჯგეფი დო ტუბუხ-ჩალამი,
აკარდამეფი ელახუნა ჩე-ჩე ძვალამი,
ვო, ოდიარე, ეფუნქ თევრე მწვანე დაჩხირო!
იშენჷ გესქანჩი, შური, ალაგე,
დო გეგნუსკოპი ფირქის ოვლარი,
ღურუ მორთხოზჷ დო სოდგა დალაგვენჷ _
სინთე რე სერშე გიშათოლარი.
სი კუნტახანით მინორექ დიხას,
უმბელე ცხენი მელეშე ჭირხანს?
ვემიახალექ დო გური დირხანს?!
იშენჷ მირჩქილე რია მართუში,
ზარეფიშჷ რკია: “ქორთუ” , “მარგალი” ,
ვენარღა ჭვია პეულჷ-მარდუში
დო ბირა- ბირათ გეგნიგვარგვალი!
გემკოზილოტი სანძღო სერიშა,
დო ქიანაშა გუტე ბჟალარა,
სი რექ ღორონთი დო კისერიშე
ეხარცქილჷ ბირა ვადასარალა!
ვო, ოდიარე, შარა გუნწყი სარიკო სუმარს,
მუში კუჩხითუ ქარწყექ, მურს ინა,
ართათ მუ აჸი _ ღურუ ნასუმორს,
მუჟამს დუშირუ ეკი-დიკი გილნაბურსინა.
მოჯგირეს ქიანა დუტუას ინაქ,
ვესქილიდუას გემუანჷ ნინაქ,
ვართჷ ხარხუნტია ჯალეფქ დო რინაქ.
ვო, ოდიარე, შარა გუნწყი სარიკო სუმარს,
ვედიონჯღორას დადიობა სქანი გურგინით,
ო, შარა გუნწყი, ტომბა ცაშა გეგნოხურთქინით,
ღურა დო თელაშჷ მაზებელსუ, ინა ბრელს უმარდს.
ო, შარა გუნწყი, გეწანაშო თიში საფულე,
ცირაშჷ ჭყუნტურუ კიდირშორო გეკოჭაპულე!