ოთებუ
გეთუ თინეფიშ ანბექჷ : თეშ თინერო სიზმარს გუნი
მიდართეს თე ქიანაშე : ბორჯი ქარწყედჷ მუთა რენი
რინა თიშოთით წუთი რე : მისჷთ გინძეთ მიოჩქუნი
მა მელექსე რუსთავიშე : მესხი ვორექ მიდგარენი
ბედ უტიბუდ დავითისჷ : საქორთუოშ მაფაშ ცალი
ათე ანბე ლექსო ბჭარი : გურიშ გინაჸუნაფალი
ბჟა იოლშე ბჟა დალიშე : ზარიშ გიმარაჸაფალი
მით ნტერეფსჷ ვენდენსჷ დო : ახერხენჷ ართგურმალი
მუჭო ბთქუა ქომოლუა : დო საქმეფი დავითიში
უცხო ქიანეფიშ ანბე : ანბე უცხო ხენწიფეში
ქომოლობა გუმორძგუა : ცქვაფა ეთი მეფეფიში
ქობძირი დო ლექსო ვოჩქვი : გურიშ სახიოლოშენი
ათაში რე თე სოფელი : მითინს ვენდენსჷნ ეფერი
კოჩიშ რინა წუთი კუნტა : თოლიშ ოდინაფაშნერი
მუს მებგორუნთ მუ მოკონა : ვადამდენა ბედნიერი
მის გუმართენს თაქით თექით : ვარა იჸი ბედნიერი
ამირან დარეჯანიშ ძე : მოსეს უცქვაფუ ხონელსჷ
აბდულ მესია შავთელსჷ : ლექსეფიტ ჯგირო შინელსჷ
დილარგეთ სარგის თმოგველსჷ : ი ნინა მოხანტურელსჷ
ჩილამურ უსქირაფუთჷ : ტარიელ მუშ რუსთაველსჷ.