ონჯირეს გილუვოჯანუდი
ონჯირეს გილუვოჯანუდი დო
ჩქიმ შურიშმარდუალ მუსიკას ვურჩქილედი...
თოლშა ჩილამურეფი უდუპეჯებუ სუმარეფცალო მუნმიშეს
რანწკა-რანწკას დო მეონგარუე ოსურეფშორო
თოლიშ კველას გილმადოხოდუდეს
ართიანს მეწკიპატელო...
გურს იფჩიებუდი,
ხვალე თიშო ქოღირუდჷ თე რინა,
ათე მუსიკაშა მომირჩქილუაფუდუკო -მაქ.
კომპოზიციაშ ადაჟიოთ შურლეცერელს
რინაშ ჯგირი დო ფური თოლშა აწმომიდირთუდჷ,
მურიცხეფს ვულაჸაფუანდი არზეფით...
სოლედგა რდუნ, გვანილ ტარაკანაქ კილელჷ თე შვანს.
მა ავტომატურო, თე ოპერაციაშ ემაჸონაფალ
პროგრამაინოჭარილ რობოტცალო გებლი ეშე დო
ქურსი ქიგუვაშქვი თის ჟიშე, ქექას,
ნოხი ვადოპწიკვიკო გვალონ, თიშენ...
ტარაკანა პიჯეშე, უდუხვარხვალაფუო გეძუდჷ,
ხელეფი გინაწკურაშორო კიდირშა მინუძუდჷ დო
კუჩხეფი ლოტოსიშ პოზაშა
ართიანშა აფუდჷ გინორსხილი.
გიოჯინედინ, მედიტაციას რენია თქუანდი კოჩი.
ჟირ ლაგირძია ოშმეშეფი
ტელევიზორიშ ოთახიშ ანტენაცალო
ეშე უჭოფუდჷ ცაშა.
ჰალამო, ცივილიზაციაშე ნაჭყოლოფა
დიდ მუსიკაშ რჩქილაშე თი მოკათინელ ჩილამურეფქ
ოლუ შარა გოკვათჷ დო კონდაკო
ტარაკანაშ დუდიჸურე მიდართჷ კოსმიურ ნჭუაფათ.
გენთხაფა დო ტარაკანაქ ხათე დუდი გამწაჭოფუ,
ითამ უღურალაშ წყარი გემჭვათუაფუდუკო ჟიშე.
გიმუვაკინი ხოლოშა დო -
სარკო კოც გოკონდა!
ბონას მა ენმოჯინედჷ თოლეფს.
პიც დენგინაშქუმელშორო უპურპოლუანდჷ დო მიწუ:
"ვაპწანს სქან ჯიშიშ ჩილამურიშ დო დიდშურიშობაშ!"
ათენა ქოთქუ, ქაწიქანჩუ ართ ჟირშა
მუთ შეულებუდუნ დო გემნირთჷ კინ მინი.
უკულ დუდი გოთინჷ პეკას დო
ქულაფ-ქულაფით ყებურიჸურე მიდართჷ.
ართ ქიკნიჯინჷ ხოლო ჩქიმ განშე.
უკულ ცვითჷ დუდი ანგურეფშქას
ორკეს დო ვიშ ქაწმოდინჷ თოლო.
მა შურუბუმუო აშუვოხედი ნერჩის...
დიო ხოლო, ჩქიმ ოჸოროფულ,
თი შურიშმარძღალ მუსიკას მიოგანდჷ მობილური...