ორთაში სერდა
ორთა ვორექ, ირო ვორდი,
ხოლო ირო იპუაფუქ,
მარა მა შხვა დროსჷ
ზნეთჷ ართი ვეპუაფუქ.
თიში ცოდა ოპონუს
მის მა გურით ვაჸუაფუქ,
მარა ხვალე კოჩიშთაგანც
ჭეს ქუარილუაფუქ.
ოპონუს, თე პლანეტას
მით მა ვადამიჯერდჷნი,
ვარა მი პუნდუ მონირზე
მინჷ რდჷ მა მორჯგინანდჷნი.
მარა ართი შურიდგჷმირქ
მა გონირძჷქ ჭკვერულოვა,
გინგაკეთე ჩქიმ გემოშა
კოჩიში მოხუჯუროვა.
მა თვითონ კოჩი ვორექ,
ბრელი ვამოწყინუავა;
მალასჷ დეგემინჯებუქ,
ვაკო ოშობით წანავა.
მუდგა კოჩი თეს ჯოხონი,
ხერხეფი გაგმუგონებუ
დო ირფელი ფულირობა
ჩქიმო გაუსინთორებუ.
ოშინერო მისოფუანც,
გიმუბთირანც მათხილეფც;
დუც ვამანებენცინი,
მუ ბღოლუა მა თინერც.
გაგჷმანწყუ ხეჯკუდეფი
ოშინერო ქობზჷმუნც,
ტელესკოპი ქუკებუდო
შხვა პლანეტას ქუზომუნც.
ვორწყექ, ვორწყექ, მემიჩქჷნი,
ვაგჷმალე მა გურობა.
ვორწყექ, მუჭო ოპონუას
გეგჷლმონწყუ პატჷნობა.