ორსანტია- ჩქიმ ჸოროფა
მა ფშჷ ჩქინ ბაღანობა,ორსანტიას გუნატარჷ,
ანთასიშა ეკნარულა, ჩქინ ბებიშ ეზო-კარჷ;
ოთხირეშა მითიბშითჷ დო, იბწისუანდით ახალ თხირსჷ,
კარალოკიშ გემოწკუმა, მონდა ლუღიშ გოძინსჷ...
ხაშილ ჭყინტ ლაიტის შურს დო ელარჯის-გოზინდილსჷ.
კეცის იჭუდჷ ხაჭაპურ, არვანს სუნელ იკაკუდჷ,
ყებურიშე უჩა კუმა კუპატებშა მიანჭუდჷ…
ოჭმარეშე დიდ დო ჭიჭე, ოჩაიეს ეშესოფუდჷ,
ჩხოლარეფიშ მორაჸუას, ჭყიშ, ართ ფუთ უფუს დაბუნდჷ,
ოჭკადურეს ჭკადჷ ხანდენდჷ, ჸვანას ხაჩქუნდჷ მახაჩქალ,
ცხენეფ მინდორს იდიარდეს, ბების ეშმუღუდჷ ჸვალი.
ნიორ,ზაფანა, ჸვალმინთას, ჯიმუს მიოკაკანდესჷ,
გებჟალიაშ მიოჭკომალ, თხითხას ღუმს დაგანდესჷ...
ბებიშ კარალოკიშ ჭაჭა, სამარგალოშ ორდუ ბრენდი,
დო კოჩანიერ კოჩობას, თიშ შუმათ ამტკიცენდჷ...
გოკონ დაჩხირ გიშუმუდკო, გოკონ ხოლო ბებიშ ჭაჭა
კუმას გუგოტებაფუანდჷ, ვაგორგუდ მუთუნშო მარჭვა...
ალიონშა იჭყანდჷ ბები, ხვამასჷ დო წირუასჷ,
"ღორონთ ჩქიმ სკუალეფს დიდხანს ქუდომრინუანს;
ჩქიმ მოთალებს დომთხილანს დო, სინთეს ქეწომუნუანსჷ.
დომხვამუნსჷ მოჯგირეფსიჷ, მედაჩხირე მეზობლებსჷ
ორსანტალეფს, ზუგიდარეფს, სოხუმარეფს, ხობარეფს...
მთელ ქიანაშ ქირსიანეფს, საქორთუოშ მაცხოვრენსჷ…
ღორონთ სი რექ მარდიანი, სკან ოროში გოლუაფირო,
უსაშველოს ქუსაშველ, მუჭოთ გიქიმინჷ ირო...
ლეხისჷ დო პატიმარსჷ საშველ ქემეჩამუდანჷ,
მახორობას დორთუდანჷ დო სკან ბირგულშა მურთუმდანჷ.
დუდ დო ღორონთ მარდიან, მილიონშა რთხინქჷ დო ფთქუა,
ქუდმორინეთ ურკებუო, ჸოროფათ დო, ჯგირობუათ,
სამარგალოს ქოშიბუდასჷ, წიმი ულა, გომორძგუა ”.
ვაშინგტონი, 2009წ.