ორსანტიშ შური
დიო ვამჩქუნა უგუთებუ შარა სო რენი,
მუთ მიჩქუნანი დიო თინა ხოლო ვამჩქუნა.
შუროთ ვა რძირი სქან დუდ თაქჷ ქიმიბგორენი,
მიდგა მიძირუნ, ასე თინეფ ხოლო ვა რჩქუნა.
ლაფგებუნილი მუზმა ქორე კოჩიშ მანგური,
ართ ცინდა შურით მუზმას უღუ კაბეტ პიანი,
გილეჩხარკალუ უმოღეთჷ თიში ჩონგური,
მუზმა ქოთქუანც, – თინა ორე ჰამო, რხიანი.
საანწიანო ქიდიტუე ოკო არხამა,
ჩხვერიშ კაკალო გითოცუმე ცაშე ფირქეფი,
ქიმკივალუანქ, დიფორუქუ კინე არგამათ,
სი გიღ ფირქი დო ფირქიშ იშო, ხოლო ქირქეფი.
ალმაკათინე წყარმალუშე, მერეს შუშელი,
ორქით ულირი, ოხურგესჷ გილნაწირედი,
მურიცხეფიშე მუკნასოფა ჭვილი სქილედი,
პეულეფიშე ეშულირი ხვამაშ კუმელი.
ჩქინი გოშინა, მუთუნც ვა გჷ, უჩინებუე,
ირიათონცჷ თიშა აფუ გინნალუეფი.
სქან ძირაფათჷ გური ასეთ მაფუ ჭვებული,
ვა მოიძირენ, გუმასოფჷნა იშენ ჭუეფი.
ღულა შოშეშ პიც მიწიძირე ართი ჯარგვალი,
სოდეთ ჩქიჩქჷსჷ მინომრთუმუ ჯვეშო, ოწმახო.
ულირ-მულირიშ თექ მიძირუ რზაფაშ გვარგვალი,
დო თი მერქაში ჩილამური როხო აწმახუ.
დიადიხავა, უთქუალჷ ჩქიმდა მიდგარენც,
ათეს აჩქვენუ, მი რექ, მუ რექ, მუშა მოზოჯი.
ნჯღელი ზისხირი უჩა რენ დო, მინშა ჭითა რენ,
ვარა აფუნცჷ მუშენ თირანცჷ, ჩელა ზოთონჯი.
მუთუნ ვეპალუ, ვა მიჩქუნა მიშა მეფრთათჷ,
ირიათონი ქუგოკონ-და, ღურუშ ჯინჯიე.
ვარა ქარსამეფც ქუართათჷ, დუდი გებჩათჷ,
კილერ კარეფი დუნორთისჷ ხოლო გინჯინე.
ჩიბეს მულვორექ, სო იბდიკო, დუც უფორუა,
აკიძირძონეს ე წანეფქჷ, მერქა უნელო.
მუსუთ დურთაფუნ, თისჷ ოკო ირო ნორუა,
ჭვემა იჭყაფუ, ცა მიჯინე გინოქუნელი.
ძუბა გვალაშა მიკომრინუ სქან მაულარო,
ართო ზღვარილი, ჭვემათ ტანი აკოშოლირი.
გუგაგინენო თე ბორიას მუ ულამუნი,
მუს ურაგადუ ჩქიმი გური ოშშა ჭყოლირი.
დიო ვამჩქუნა უგუთებუ შარა სო რენი,
მუთ მიჩქუნანი დიო თინა ხოლო ვამჩქუნა.
შუროთ ვა რძირი სქან დუდ თაქჷ აკიბგორენი,
მიდგა მიძირუნ ასე თინეფ ხოლო ვარჩქუნა.
ართო ჩხვიჩხველი, პოპორანცჷ ჯღამა ცარგვალი,
ზუღა ვერჩხისჷ მუწორე დო მიწინეველუ.
მიწიხერკელუ ჩქიმი გური მუჭოთ მარქვალი,
ორთას სითინჩა ქიგნოდვალუ, ირფელქ დენელუ.
ქეკიბუმნუა არძა შარას, მუთჷ ქორენი,
დო გაქშაფაფრთხუ უბადოეფც ჩქიმი ტანიშე,
ორსანტიშ შურცჷ ქინიფრსხუა, გაგშართოლენი,
დო გაგშაფრთი-და, კინ გაგშულუ სქანი განიშე.