ოშქარ ანდერზი
ჩქიმჷ ჯიმა ტარიელჷ დგებუაძეს,
ფრანსუა ვიონიშჷ მეგურაფილო
1
ვო, ჩქიმჷ ჯიმა, ტარიელი,
ვო, ჩქიმჷ ჯიმა, დგებუაძე,
ანდერზისუ გიტენქუნი _
ეგებჷ თუთას ვეგუარზე,
ბები პუნდუ მოლერსე დო
ბაბუ ხოლო _ მებუასე,
აიშახჷ ქართის მევბუდინი,
ზუგიდისუ მევბუფქ ასე.
ვო, ჩქიმჷ ჯიმა, ტარიელი,
ხულა მაფუ ცარიელი.
ვო, ჩქიმჷ ჯიმა, ტარიელი,
ვო, ჩქიმჷ ჯიმა, დგებუაძე,
თეშჷ ბჭარუნქუ თე ანდერზის,
მუჭოთ შურიშჷ ეკულას რე,
ლაწკარს ლაწკარჷ თეში მეთხოზ, _
გურს მუმოგდას ლეკურჷ ლასრე,
ქიშილებე ჩილჷ დო სქუას
ცოდებჷ რინა გეკულასე.
გილებგაგუქ ჩაჩანცალო,
გურს დაჩხირი მაჯანჷ ძალო.
ვო, ჩქიმჷ ჯიმა, ტარიელი,
ანდერზისუ გიტენქუნი,
არქა, სოთინჷ ვემეიდინას,
მუჭოთ ბაბუშჷ კიტელქუნი.
ზუგიდური პატიცემა
მითაჟამსუ ვაგმაკვირე,
იმპორტული ლებიაშე
მოშქურჷ სტოლბას ვაგვაკირე.
ეთისხი რე შიშონილი,
ჟითო ვორეთ ტიშონილი.
ბაღანეფსუ განმუხურშე
ქუმნვოფართხა გიმნაზიას,
ხემანჯღვერო ზამირა რე,
შხვა მუ ოკო ქიმნასია,
ზოჯუნს: “სი ხინკჷ დოხინკოლი,
სი ქვირით ღუმჷ ქიმნაზია,”
მანგარს მოშქურჷ შქირენულსუ
წიგნეფქ ვეგნარყინტასია.
წი ქუვორექ, მარა წანას,
ეგებ რინაქ გეკმენწალას.
აფხაზასუ ვეჩხუპინი,
ტყვია ბზეპეს, ლიშჷ ვარია,
იგორგოთუ ქიშმარია:
“მიშჷ ივანჷ დო მიშჷ მარია,
ამარჷ, ჩქინი მარგალეფსუ
ფართას გუნჯათ ჭიშკარია,
ინეფქ ცხირა ძგვაბანი დო
ჩქი ბჯვაბათუ ჭვიშტარია.”
იგორგოთუ ქიშმარია,
ჭითა ბჟაკე ფიშქვალია.
იგორგოთუ ქიშმარია:
“ზისხირჷ გეიშურს გიშმალია,
თხირი ვოფართხაფუათუ,
ვემკიმნჭათუ შიშტარია,
ეგებ გეგნიაფხაზანინჷ
ვოუწუათ თეშჷ ვარია,
მარგალეფით გემამნგარათ
ეკოცჷმილჷ ჯიშჷ-გვარია,” _
იგორგოთუ ქიშმარია,
ჭითა ბჟაკე ფიშქვალია.
მარგალურო უცხაფუნსუ
“გალ” -სუ სალაყაია,
ვაუჩქ ცოდაქ სო დოდვას
დუდი ოლაჸვაია,
ღირთანს სინჯა შიშტიგინი,
რჩხვიანს ჸალა დაია,
ევრე აფხაზჷ, ავრე _ ქორთუ,
შქასუ _ სალაყაია.
მუსხი გოკონ ალანგარი,
ბირცხამო რე ბალანგარი.
ბრელჷ იზნახჷ დო მუთჷ იჸუნჷ
დუდჷ ქიმეჩუ აფსუას,
ჯიჯის ჸუდე დუჩვარჩვალუ,
პაღურჷ ქიმიოგჷ დასქუას,
აფხაზობას ჩემულენს დო
მუშჷ ყებურსუ გაფსუანს,
ღლამობასჷ ჩემულენსჷ,
მარა ელეხამსუანს,
მუჭოთ ალაქვაია,
ლალუნს სალაყაია.
ჰოდო, ჩქიმი ბინეხისუ
ასეთ მიკიკიკონუ,
ცოდაშჷ ბიგათ ნახანდი,
პიჯშა ქეთილიჸონუ,
ჩქიმჷ შქირატილჷ ყებურსჷ,
მუშჷ გემოშა იჸონუ,
ღორონთიში გამნარყი
ეშმაკითუ იჸონუ!
მუჭოთ ალაქვაია,
ლალუნს სალაყაია.
მიფშინეთუ ჸონუა,
ჯიშიშჷ გინოპონუა,
ბჸონი, მარა მუ ბჸონი,
ვაცანძარა კუპონი,
შაგრენიში ტყებცალო
ხეშა ქეშებწკუპონი,
დოლარს ქელუმაჸალე,
სტერლინგის ქელუჸონი,
ბჸონი, მარა მუ ბჸონი,
ვაცანძარა კუპონი!
ვადომტებუ სოვრეთინჷ
მიკონი დო მუკონი,
მინშა ტანი გუხვარჩალე,
მინშა კუჩხი გუბონი,
მინშა ოჭიშჷ ღულოზირჷ
ლანდარცალო გუბონი,
უჭყანე დო უჸონის
მუსხი ბარჯგი დუპონი,
ბჸონი, მარა მუ ბჸონი,
ვაცანძარა კუპონი!
იშენჷ გილებანდალუ,
ითამჷ მაფაქ ჭყუკონი,
ხეს თიცალო ქეშმოდინჷ
ითამჷ პაპაქ ნწყუკონი,
მუ მიჭირდუ ცოდების,
ჭირქა ღვინი ბჩუკონი.
მუ მიჭირდუ ცოდების,
ფუჩხა ღუმუ ბჩუკონი,
ბჸონი, მარა მუ ბჸონი,
ვაცანძარა კუპონი!
ვამგმარინუ ჩეჩმასუ,
მუჟამს ძალამჷ ბკუკონი,
ვამგმარინუ საფურკეთ,
ფსქაქ მიოტუ ბუკონი,
ინათჷ ხვიმრაქ ვამაძგიბჷ,
ჸუდეს ნწალუნს ჭუკონი,
ვარა ფურჩა რდუკონი,
გინი გიშამრდუკონი,
ბჸონი, მარა მუ ბჸონი,
ვაცანძარა კუპონი!
ძამს ოკოდეს ინაშე
მუთუნქ გიშართუკონი,
ძამს ოკოდეს შხურეფჷ შქას
ერჯო მიშარდუკონი,
თეშჷ მამალას მის ოკოდჷ
შური გოყვიტუკონი,
ბჸონი, მარა მუ ბჸონი,
ირკოჩიში უკონი,
პუტჩელეფიშჷ ჩხონაფას
ვაცანძარა კუპონი!
II
ვო, ჩქიმჷ ჯიმა, ტარიელი,
ვო, ჩქიმჷ ჯიმა, დგებუაძე,
კუპონიშე გიბჩვამბარინჷ,
ოთქუალარჷ გვალო ანწჷ რე,
ნაგანი დო ავტომატი
მორხინილი ერჯიშჷ ყანწჷ რე.
გეგიძესუ ქავოდირთი,
მარა იშე თურმე ბრანწჷ რე,
ფუთის გემეფჷ იჸვინთუნა,
ჩქიმო _ ონწე ვედიკვანწრე.
თისხი ჭუაქ გეგნომლუ
ოში წიგნო ვეკინძე,
ესოფილი ფულაქიშე
გური ოკო გეკიმნწყე,
თურმე ართი მორქიათ
ფუტურო ჯათ ვემინწყვე.
მა მიდგაქუ გემჯიკუნი,
დუდი ოკო მებქინძე,
ჸათე ხვამელჷ გეგიძეს,
ნინა ნოღვე ჭე გინძე.
“თურქიშჷ გემი მადირთუნჷ
სქანო დიჩოლუნია,
ვითი უღუ კამეში
სქანო დიჯოლუნია,
ჸუმენელი ხორხოტა
ღვინით დიშოლუნია,
მუთჷ ვარენო ვეჭიშენჷ,
სქანო ჭიშოლუნია,”
ჸათე ხვამელჷ გეგიძეს,
ნინა ნოღვე ჭე გინძე.
კონკერშა რე დორღვაფილჷ
კოფე ბრაზილიაში,
შანქარჷ მოცენს კუბაშე
ცირეფიშჷ ურჩიაში,
ცას მურიცხიქ ვემესქიდჷ
ჭაჭილქ ძიაძიაში,
მაშაყარალჷ მინორე,
მაკორობალჷ მი აში,
ჸათე ხვამელჷ გეგიძეს
ნინა ნოღვე ჭე გინძე.
ავრე ართო ქეთომირჩჷ
ორთუმელშა ფართალი,
ირანული ნოხეფცუ
ქუდაჭყაფუ ხვართქალი.
ჩილამური, მუ გოჭირჷ,
მუ რე მალეტკვარტკვალი?!
გებტურინუნქ ფირქეფსუ:
“ბაღუ ღუმუშჷ ტკარტკალი!”
ჸათე ხვამელჷ გეგიძეს,
ნინა ნოღვე ჭე გინძე.
ვადუტებუ მუთუნი
მენძელს პიჯჷ დო ნინა შქას,
ხუმლას ალადირენს დო
ხინძირს ცირათ გინაშქვანს,
გეგნოლასე გურჭუა
უჰანდობას გინარჩქვანს,
ოქროშჷ ნისორს ბაჯაღლოშჷ
მონეტეფით მინაფშანს.
ჸათე ხვამელჷ გეგიძეს,
ნინა ნოღვე ჭე გინძე.
ჯაშჷ ნათქუელჷ ქოიჩქუნა:
მუს რე დიმარკენსია,
არგუნჷ, მარა ნოჸელა
ტარო ქიგიოგესია,
მოკვანწილი ნტერი რე _
ჯიმა ქიგიოდვესია,
გეგნოხუეს ყამბარჷ დო
ტკიბირჷ ქიგიორთვესია.
უჯგუ შარეფჷ მოჭკირე
დო ვემკინჭე მოჯგირე.
მოჭკადილი დიპლომეფს
ყამათჷ უქარქაშუანს,
წიგნი ვაფუ ნაკითხრა,
ჭკუაქ სოვრე აშუას,
დუდშა ჭირქას ქიგმიდგჷნს,
ქვარას გულუფაშუანს,
ჩქიმჷ ცხვაბარელჷ ლერსეფსუ
მუშოთ ულაბაშუანს.
გვალო ქულა ვარენ დო
ძალამს ქელემაშუანს.
ქენარჩინუ ცირეფი
მაფშალიაშჷ მანგური,
მუმას ლაბერწჷ მეტახუ,
დიდას შქიდუ პაღური,
ქიგიშირუ ჯიმალეფჷ,
უჸორს გილაფახური,
თენაქ მუჟამს ერჩქინდჷნ
ეთექ მუშენჷ ვაბღური?!
უჸორს ჭიფას წკვირინი,
რე უჯიშო გირინი.
ქენგახორუ ჸუდესუ
სოიშახჷ ჭყიანს თულეფი,
სოიშახჷ ინდურჷ როპოტანს
დო ეფშა რე კულეფი,
ჩაირცხინუანს ფარეფსუ
ტკვაჩილსუ თუ ხურდასუ,
ხურჩას რენი გოგონუნჷ _
წურაფლენა ურთასუ,
არისტოტელჷ მემქარებ
დუს ეთეში ურთანსუ.
ლიმა რენი იტყობუ
ნუნისი დო ხარანსუ,
გალე შურსუ ხირულენს,
დინახალე ღვარანსუ,
თხირსუ გილეგუდორუ
ჸურუმულო იბირსუ,
პოემა დო რომანეფს
ენაცირანს ტკიბირსუ,
მარა ლერსეფს უმორსენს
როფოია კიბირსუ.
ბრელჷ მოჯგირეს მეუკათუ
ორთუმელშა კანტუზია,
უკახალე ქეთიჯირქუ,
მიდგა ჸუნდუ ლამპუზია,
ჭე კუნტასჷ ქიფჩუათჷნ,
დუდშა გინმისხაპუნსია,
თოლიშჷ უდუვალაფუო
ბაბმუშიშისჷ კვამპუნსია.
მის რე ელმოსხაპანსჷნი
თე მართალო გამბუზია!
III
ენა გვალო ნარკვანა _
ჯიმაკოჩიქ გეკმაძირუ,
შურქ უმოსო გეკმაწილოხჷ
დო გურქ გვალო გეკმაწირუ...
კოჩიქ, მარა მუ კოჩიქ,
ჩქიმი ჯიმა შუკოჩიქ,
სენშა ნიჩვი ქიმემგუ,
მუჟამს ჩხორო თუ ქოფჩი,
მუ ბღოლიკო, გამბედუნჷ,
თხორილს ქენვოღუბოჩი.
შუკო
_ ჯგირი რენ თუ ფური,
ჩქინჷ ჯიმა რე გური,
ფეტელა რე გვარო,
ჯინჯო _ ოტობური,
მარგალურო ჭარუნს,
ირო მუშო ჭვარუნს, _
ესე იგი ქოფთქუათი
შურკუნტალა ბჩალუნს,
შურო სინდის ვანოღვენო
თე მართალო ჩარუმს?!
უძღანძღალუ: ძღაბ ჸუნსია,
რომანს გილაძღაბუნსია,
ჯიმაქ, ჯიმას მათხოზუნი,
გილანთირუნდჷ ლაღუმცია.
ურაგადუ: უჸორს შუმა,
ოსურეფიშჷ ღლაბუცია,
ვართჷ შონს გჷ დო ვართჷ აფხაზას
დო ვართჷ ხოლო _ მარგალსია,
დიშუმუნი ქიდიჭყანს
შარაშჷ გილაფარკალსია.
ბოშის ვაკეთენქია დო
ჟირშა მუგიავა ნირზი,
ჟირშა ეთის ქიგვარძღია,
ჟირშა ეთის ქიგვაყირზი.
მუთუნჷ ვოუღჷ ცოდასია,
იშენჷ მეთხოზჷ მოდასია.
ქელეფულუ ბოში პუნსუნჷ,
გვარჷ დაძახუ მოთასია.
კოჩიქ, მარა მუ კოჩიქ,
ჩქიმი ჯიმა შუკოჩიქ.
ეთექ ქუწი: “ვო, შუკო,
ქანას შურო ქოშუქო,
სქანცალეფით მინორთელს
დო პარტახო გინორთელს?!”
ქუწი ირფელჷ მუთ ხვადუდჷ:
“მუქთა ღვინსჷ ქოშუნქო?
დიანთელჷ დო მუანთელეფს
ხოლო ქიგლატორშუნქო?!
თუთაშხაში ჭყელჷ რექო,
წყარქ გენუო ნოშურქო?
გურიშჷ ლერსი ირჷ დიხას
გეგონი დო ბიდიხა.
მუთა გაფუ ნაგურეფი,
დუდშა მეიგამჷ ანგურეფი,
მუჟამს ართათ დორშაყარეს
დრანდას სქანი მანგურეფი,
მუშენი და ჩე დადული,
ჸიონუა ნაგურეფი,
დოიჸვილესჷნ, გობერჯღელე
დო ქიმწიჭყი ხანგურეფი.
წიმი სოვრე მიკინანდჷ,
წიგნის მიშეკიკინანდჷ,
“დონ კიხოტო” ჩინებულს,
ავრე გურით შიკინანდჷ,
ჭიჭე ბჟაკე მერჩასჷნ,
სანჩო პანსა დიგორუ,
თიშჷ მოსალი ბაღდადის
ბრელი ვირი ინკორუ.
გილეშითუ ღაფილო,
კუდელკილარღვაფილო.”
ქუწი: “ვაჟას დუწონესუ
ართშა ნინა ჩარგალური,
მორო იშა ვოუშქიდუნა
სქანიცალი ჩვანგალური,
ვართი ხოლო უღონობა _
ჸვერეთ გილეჩანგალუნი,
წკვარამჷ წოლაშჷ ნარაგვინა,
ჟანგამი დო ჯანგარული,
ხვამელს აკაკჷ ონირზუდუ,
ართჷ რე ჩქიმი მარგალური!”
შუკო
_ შურო ჭკუა ქოიღუდუკონჷ
ჩქიმჷ პატიოსანჷ სახელჷ “შუკო”
სქანჷ ფასონელჷ ნაცხაფაშა
ვემშაიშინუაფუდუკო.
სი ვარენო ლერსუაშე
მორუდენი თეშჷ ეფშინი,
მუ ჯანსულოშჷ მასხაპალშა
ქოიგჷ ჸეთი ოშმეშინი.
თიცალჷ დღასჷ ენგოჸოთა
დაბადებას იჭყანდენი,
ტვინი გითხუმურანდას დო
დუს კაკლარით ინჭყანდენი. _
ვადაჸუნდა _ ხეთე ძირუნქ
ჩეჩმას მუჭო ბირცხანდენი,
ვითოჟირშა როხუნდენჷ დო
კინი დუდშე იჭყანდენი,
უფი ქეშქელიებუნი,
ჩილამურსუ ჩხვიჩხვანდენი.
თინერეფსუ ბედუნია,
ტიფას შუკოშჷ მონდურია!
შუკო
_ დაჩიჩიებულჷ რეთუ,
ეთექ მითილით გვალო,
ზუგიდს მუშჷ სახე მიდუღით,
გეგნართინეთუ გალო,
თოლჷ გიყიყანა ქართშა,
დუს მიკოდვანთუ ძალო,
მის მუშო ოკოთ ხორცო დო
მის მუშო ოკოთ ძვალო, _
ა, ბაბა, შუკოშჷ ნაკვალი,
მერმეწანს თიში რაქვალი. _
ეს მითინ ვაკითხულენთი,
ვართ რკარნახენა გუმანი,
დიდა ჸონილი გაფუნა,
ჸონილი გაფუნა მუმანი,
ენა გიჩქნა დო ინა _ ვარჷ
თქვათ დიჸონუთუ ჭუმანი,
ზუგიდქ გეთუ დო მეტჷ ვარე,
ანწი თე შიბლა ჭკუმანი. _
მის ერგებ შუკოშჷ კირტაფი?
ვეთებუ თიში ღირთაფი.
შიბლაშჷ შიება ეშჷ ვარე
დუდშე ძალამო ვაიღუდა,
ევროპას გეგმვოჭორუა
აზიაქ ბრელი გარღუდა.
მარა მუ ბღოლა მიდგარენს
ჩინიშჷ კიდალაქ ვარხუდა?!
ვარდა ეშობას ბედურაქ
თოლეფი ქუმუღარღუდა?!
ჟუმინუნს თიში მართახი,
დოქურსუ ქანა ჩათლახი.
შუკო
_ ჯვარჷ გიწერა მადაშენი,
მენჯირელო იდიარეთ,
ქუდი ნოქუდია რენჷ დო
ზუგიდჷ ნოზუგიდია რე...
ზუგიდითუ ვაჭრენსჷ დო
ნავაჭრითუ ხარენსჷნი...
ეთი ზუგიდარი ბხოკი,
ხოლო ზუგიდარენსჷნი. _
მორთჷ ასე დო უკირტონე,
ქუას კიბირჷ მუგირდონე. _
მუ მოხვადჷ ჭუმანინი,
ამდღა მიჩქუ ხუთიშა,
კენჭის მითინს ვენუჸოთა
საარჩევნო ყუთიშა.
ასე ბჭარუნქ ლერსისუ დო
უკულჷ დობჭარ ნოველას,
ედუ გილმობჷ ათეშჷ ჯერღვის,
ასლანჷ _ ჯერღვიშჷ ნოჸელას. _
მოსათმენო ძნელი რე,
დისიდენტი მენძელი რე. _
მიბურჯუანს აზრეფი დო
მიხვინთქუანს შაყირეფი...
ჸათიშჷ მაწუალეფჷ რენა,
ჸეთიშჷ პარიკმახერეფი.
ხუმა მიდგაშა მეიჩამუ,
მუ თეშა დო მუ _ თიშა,
კენჭის მითინს ვენუჸოთა
საარჩევნო ყუთიშა._
ირუმუ დო ქუმუხუჯე,
ვარა ცქებზი ქუმუღჷ ჸუჩე.
მა
_ ენა ასე, მარა ადრე
ხომ ტკაბუნდი “მუკუზანსუ?!”
არჩევნეფცუ უფურკუანდჷ
სახფრონტელი პუპუზასუ,
თიმწკალა რდჷ ჩხოროწყუსუ
ქიგგორღვესუ ჯგირჷ დო სქვამი,
ხეშა კულა ქეშაიდვესუ,
განთხშა ქეთოიკირეს სკამი.
ვემგარკესუ სუმჷ სუტკასუ
თუ ჭვილი დო გებჟალია,
პუპუზაში მხარდამჭერო
მუჟამს კირცხშა გემშალია,
ქიმეიხუნეს მობანეთუ
საპოჟნიკჷ დო ფერშალია.
არძა ხონარჷ დოღიმინწუ
ოჯალეშჷ დო “მუკუზანქუ” ,
ასეთ ქორშუ სი ბედურა
თიმწკმა გაღოლჷ მუ კუზაქუ,
არჩევნეფიშჷ ვარიასუ
ასე რენო უკუსანქუ?!
შუკო
_ დიო ხოლო ვურზუქ ჩხურუს,
დიო ხოლო ვურზუქ შქირენს,
ინჭაცალო ინვოჯინექ
ჩქიმჷ ცხოვრებას ინორშვინელს.
ენეფქ სახელი იკეთესი,
ჩქიმჷ სოთინი ვამიშინეს, __
ადრე მუშო ჭვარუნსია,
ასე ითამ ვამიჩინენს. _
ლერიშჷ ბების ქელვოსხაპი,
ბონდოშჷ ბები ვამიშინერს...
IV
ვო, ჩქიმჷ ჯიმა, ტარიელი,
ქისა თისხი დონჭკვილითუ,
ანწი ვარა მიჩომლეთ დო
ჭე ორტყაფუს მუნჭირითუ!
სამარგალო გოჭვარითჷნ,
თეს ჭინჷ ვარა დუჭკირითუ,
აკა ფაცხას დოღობუნსუ
თამაკონსუ მუშჷ ჭირითუ,
ეგებჷ ართშა დორხვადანი
ელარჯი დო თუ ჭვილითუ.
“სოსო, ლაიტი ქუდურღვიშო,
მუნაწია ანჯერიში,
მუხუდოშე ვეგეცოდას,
ჭკიდ აჸინშო დამჯერიში,
ვარა ფართას გაცხადენსშო
ბრეზენტიში პერჩატკეფსუ,
ოძახებელქ ვაგაჸუას:
“წიე, გეგნიფერჩვა ტყებსუ!”
თქუალაშე მუ გაღოლე?
ეგებჷ მუთუნჷ მიკარღოლე?!
ბაღანობაშჷ ჯიმაკოჩი
ქორექშოდა, გურიშჷ, ალე,
მეუ ლესიჭინეშა დო
თოლეფს ძალამს გურიალე,
ფეტერიში მოთა გოხოლჷ,
ინა გვერდო ურია რე,
თოფურცალო მუშუსუნშო,
სოდგა ბანძღი-ნდურია რე.
უკუდელე ხოჯიცალო,
მიჩერჩელშო ოძიცალო.
მიჩქუ მუთა გაპალუნშო
დიო დღარო, წიე, მიქა,
ჯონჷ ფიფიას გეგნაბარას
ქუჸიდასშო ართი ძიქვა,
თოფურითუ დორშვაპასშო
ბზაკალიში კუნტა ბიგა,
დო გორგალსუ უზეპუას
ველუდასშო სოიშახჷ დიფა.
თეშჷ თქუალას გაბარენქუ,
მუჟამს ირფელს გაფარენქუ.
ქუწი უკულჷ რწუნებულს:
“ენას ჸუდე ვაკოდუო,
ოდიშისუ დახორეთუნ,
უხოლაშ აფ საკოდუო.
ეთექ თისხი გიოჭყესუ,
დახე დიტუ საქორთუო.
მანცხვარჷ კარსუ ქიმუზიმათ
დიხა ოთხი ალაბიშო,
ნამთინეშა ქჷმაკითხანს
უკულჷ მუში ჯალაბიშო.
ვო, ჩქიმჷ ჯიმა, ტარიელი,
ვო, ჩქიმჷ ჯიმა დგებუაძე,
ქარწყექ, ჸათე შურჷ დო გური
მუშჷ მანწარათ მეპურასკე,
ბჸოფერედკო მეკაპუსტე,
ვარა ხოლო _ მეპურასკე,
ხვამელჷ თქვანი მახორობა,
მუსხითჷ ჩქიმი მებურასხე!
ვადამჯერქდა, ჯა-ქუათუ
შუკოს ქიმეიკათუანთუ.
ანთარიაშჷ მობირეშის
ქელუდირთშო, ქანთარია,
ჯვარშე გეგმუკერკელეთშო
მარმალირო ფანთარია,
მოხელესუ ქიმეჩითშო
ქიდიჭყასუ ტანტალია,
მერგებნანშო, გეუოლუნ
მუჟამს შურიშჷ ხანტალია.
გუნვოძახა ვარდა შუკოს
დო გოფუჟღანთ მიკონს-მუკონს.
მუ გათქუე ირაკლიშა,
ჯიშტის ჭყიშჷნს ხოჩა მარე,
ჭიჭე მეჩამა ქორდასშო,
მუჟამს ბრელიშჷ მოჩამარე,
ჭყონ-ჭუბური მოკვათიშო
დო ძალამას გოჩვამბარე,
დადვანიში კამაზეფი
წვათა-წვანშა მოჭვამბარე.
ვარა ქუმურს მოზარეთშო,
შუკო ჭუჭელჷ-ოსარეთშო.
ტარიელი, სი გიცადი,
ტარიელი, ჯიმა, სი _ სუ,
ანდერზისუ გაბარენქუ
მუჭოთ ნოტარიუსისუ,
ჩქიმჷ დაზღვევაშჷ ქარღადეფი
დასტობითუ ტკვაჩუნია,
აიშახ ბრელი ეკმათხოზჷ დო
ანწით მიმინჯ ფაჩულია.
მარა ირფელქჷ მისირუდა
დო გვალო სერქ დიზირუდა,
ქარღადეფი ფშინეთი დო
ნუგზარჷ შარა მის კილუნშო,
აკა წიგნი გეგშუშქვათუ
მუჟამს ღურუთ დიშქვილუნშო.
ორთუმელშა ქიმწუდვათუ
სიტყვა მუდგა მიშინუშო,
კინჷ ახალშო დუბეშტათუ
კითხირითუ დიშირუნშო.
სამარგალოშჷ ჯინჯი რენშო,
საფულეშა დინჯირენშო.
ჸეხ, მივოტე ღვინიშ შუმა
დო შურქ ქიდიჭყ ცხურცხინუა,
სერ-სერითუ მანცხვარჷ კარსუ,
სპილოს ვევოკურცხინუა,
ვართჷ ნირსეფსუ მებთხოზუქუ,
ცუნდიშჷ ნალით ჭკადილეფსუ,
ჯვეშობურო ვაბღურჯოლუნქ
თხუმუეფი ჭყვადილეფსუ.
მივალუანს ხეს აგაგა
დო ჟი დო ჟი მივოგაგა.
ეში _ ყებურს ეკვოხექუ,
შუკოშჷ ლერსეფს მეხართელი,
ჩქიჩქუეფი ჭაჭალანა,
თუთა გელურს ჩე ღართელი.
ოსურცალო რჩხვიანს ტურა
დო ლანჯიში ზიმოთი რე,
ძვალსუ ხორცი ეთხიებუ,
სო რე შური გიმოთირე?!
არძა კარჷ რე ენჯამილი,
შურჷ ბჟაშა რე მეჩამილი.
თაში, ნამდა, ტარიელი,
გვარიანას ქომიჯგუქი,
ჸუდეს ჩეჩმა გეძიკუნი,
არძინბაშა ქომიჩუქი,
ნატყვიარი ბუტკა გემდგუ
ფაიფურიშჷ აკანისუ,
ართი კოჩშა გეგნომიჩი,
თინა ორკუ აკა ისუ.
მუჟამს პაღურს ქოდაცნანი
დო ქასქიდუ ჸუჯი ფალო,
მინშა ოსქო გეგმადირთუ,
მინი _ ჯოღორიშჷ დაკირალო.
1998 წ.