ოჩხომურიში სუკი
გეგნითანთ დღაქ,
გვალას ქაფორ ბჟაქ,
ყუდეში ულას ქიგიანწყუ
ცხენი, ჩხოუ, შხური, თხაქ.
დღას გუხორცქუ უჯგუშ გურქუ,
შურც ოჸოთანც გეგნითანთ,
საქონელი ჸუდეშჷ მალი
წყარი პიჯემც ეკიგვართ,
დღაშიშჷ ხანდათ შულადირი
ემერ ჸაზახი ქიმიჸვანთ...
ირფელც ართო მუკი-მუკი
უჩა ნაბადი გინაქუნცუ,
სოთინჷ ვარე შურიშჷ ქალი,
ირფელც ღურელ შორო ლურცუ.
მინი-ემერი, მინი-ამარი,
მარწკინია გონათუნცუ,
დო სორშე ოშა-გოშა
სარაკუნაშჷ ხონარჷ მურცუ.
დოღუ ჸოროფე სერიში ბორჯიში,
ხვალე ართჷ მინჯე თე რჩინ ყორშიში,
თუთას უღაჭალ გური მულირო:
"მუს გონჯარ ვორდე მა თაქ ფულირო?!"
თაქი თე სუკის მუდგენი ბორც მიდგენც
ცაცხუში ჯალეფი ქჷმკურგუაფუ,
დო თიში თუდო ჩქინი ჯვეშისჷ
მანგარი რულით დურულუაფუ.
ვართი ჩიტეფიში ღურჭული,
ვართ ახალ გოკურცხინელი
მარჭირხოლიში ჭურჭული.
ვართი ჸიონი მუმულიშჷ,
ვართჷ წერო გინმაფურინე,
ენემცჷ მუთუნი ვახათრჷ
მუთუნიშენჷ ვაგაკურცხინე.
ღიფა დაჩხირი გინძე ყებურიში
ვაგატიბუანც ინემც ანწი.
ინეფიში ვარე ანწი ქეფალა,
კულაში კარკალი დო გინძე ყანწი.
თი ბორჯის თაქი, ათე გახოს,
თინეფი უფით დიხას ჩხაპუნდეს,
ინეფიშ კილე დღასჷ ვეჯინედგჷ,
ინემც მოსვანჯა ვაუჭარდეს...
ოჩხომური, 1916 წ.