პოეტი'
ირფელს ოჭიშჷ ქურთინე დო
ხალხიშჷ გური ვადინუა,
ომბოლს ცხირა დაცხირაფე,
ტყურათ ვეგლახანდინუა,
ჸვერეს ხინჯი ქიმევჭიშე,
სერეფიშა ვარჯგინუა,
ჸუნგას ბირა ქიდარზაფე,
უკოჩანა ვარჩქილუა,
ირფელს ოჭიშჷ ქურთინე დო,
შქას ქიმშანთხი გაზებელსუ,
დიხაშჷ გურშა ქენაჸუნი,
ომბოლსუ დო მარსხებელსუ,
ვაგაშქურნას – სქანი ჟიშე,
უღურალა არსებენსუ,
ირჷ ჭუასუ გოიჭვარუნსუ,
უგურზებჷ დო გარზებელსუ.
ირფელს ოჭიშჷ ქურთინე დო,
შარა გონწყი მობირეში,
ხუმლა ჩხვიჩხვის დუხვანცალე,
ნოჸელჷ პირით გოპირეში,
სანთელეფი ვაშქირიტა,
მოხვამე დო მოპირეში.
ხანგას ტანშე გეიშუფართხი,
ალდაჩხირი ონკირეში.
ხალხიშჷ გური ვადინე დო
ირფელს ოჭიშჷ ქურთინედა,
დექექებუქ ერებამო,
ცაშა გეშახურთქინედა,
მოთალეფი ეგკათხოზუ,
ასე გოკონჷ უჩილე რდა,
ცინდა რინაშჷ მაძგაბალი,
უღურალსჷ ურჩქილედა.