ჟინცაში გოჭყორაფა
უღონობაშ ნირსი გობძუ, შულადირი მაფუ თოლი,
გიმიჯინი ძღაბი გალე კარც ცხენამი კოჩი გერენია
უჯგუ აშო გემნიჸონი ხეხარგელო მერთენია.
ა-პატონი ჩქიმი სუმარი, მოზოჯითუ ყებურიშა
დია-მუმა ვარე მარა გეიხუნუა ხეგურიშა.
მინაულშა ვამომრთუმუ უჩარდიას მებგორუნქუ
ემერი ვორწყექ ოლაფარეს ყამბარემცუ მეთოლუნცუ!
ე-სი ბაგი გემიგაგი, სი ვარექუ თინიში მანგი
სორე ლატი საკოლხოზო, საწყობის მუშენ ვადარღვი!
-სქვილი მაღაზა ვაკეთიდო თინა ბზუმი ებჭკირი თანგი
წანას ვარა ქიმარჩქვენუ მინდორც მუშენი წიმიბხანგი!
სი მოდუდე სოფელიში, გიჯგუ მიოტე ხოხორია,
ამდღარი ჩქიმი ხელუაშე ჩქიჩქიში ლუკმა მოკონია,
ევრე მუთუნქ ვაგაშუდა კომუნისტეფი გოკონია!
ინა ბრანწი, ვერწიოლა, ძღაბის დუც მუს აწონენქუ
წაქაში ჸვაჯეფი გინადველი დუცუ ეჩწანერო ათონენქუ!
-ოზეში კარცუ ქოქიმინუ ბაგი დო ბეფთუქი ფოფორია,
ართი ციმბირშა ორსქინანდუ, მაჟრა წაქას ქოღოლია!
მოხელე დო დუდი მანჯღვერც ქიმშერთუ ძღაბი შქას
-მუა ჩქიმი ქიმურდასუ გოიჭყორუანა ცასი!...