რაში (ჰამლეტ ნადარაია)
მევურქ, მივრულექ, მეფურინუნს რაში გებენი,
უჩა ყორანი ეკმოღვარანს წასაგებელი,
გოურქი რაში, სოთინ ვარე გაჩერებელი,
დო ქარს ქიმეჩი ფიქრი ჩქიმი მაღონებელი.
გოკვათი ქარი, გოსოფი წყარი,
გოლი, გოურქი, გოლემს მოფერდას,
ოლი დღალეფი დომიკუნტარი
უმუსვანჯებუ რულა ჸოფედას.
ვართი სინჩხეს დო ვართი ჰანდარას
ვადუშკურონდა სი უბედური,
ვართ გოცოდუდას შულადაშენი
დუდგოჯოგელი სკანი მენდული.
მუმაშორანი ჩქიმი დიხას დო
საჯიმალოსით გეშმოჸოთანი,
ვართ უძირუდა ჩქიმიანემს დო
ვართ მინგარანი, ვართი მორთანი.
სოდეთ დისერას თექი გოთანდას
თინა რდას ჩქიმი დიხა მადენი,
მურუცხემს ქუწინქ თი ორაგადეს,
მუთ მითინიშა ვერაგადენი.
გურიშ წადილენქ ზღვას ქაკათუ, ტალღემს ქაუნეს,
დო სი მეგანდვი ჩქიმი დუდი შერო მარულეს,
გოურქი რაში, სოთინ ვარე გაჩერებელი,
დო ქარს ქიმეჩი ფიქრი ჩქიმი მაღონებელი.
ვამთხორელედა ჩქიმი ქიანას
ჩქიმიანეფიშ საფულეშ ხოლოს,
ჸოროფილიში ჩილამურემქი
ქიგნმოწიასინ ვამოკო ხოლო.
ყორანი გონწყუნს ჩქიმი საფულეს,
ჩქიმოთი ვეჸი ათე ქიანა,
ჭაიკონეფი ქუნმორღვანს დიხას,
ქუნმოთვალანა, ქუნმორკიანა.
უჩილამურეთ, უმინჯო ღურელს
სუნჯი ქიგმოწენს, – დუდი გუალე,
ჩქიმიანეფიშ სამაგიეროთ
ძერა იჸუაფ ომორგუალე.
გოლი, გოურქი, ჩქიმი ფურინჯა,
ბედიში იშო მოკო ვორდენი,
თიშა დიოდე ვაფშკურინებუ
ვართ აწი მოკო დოფშკურონდენი.
გოკონ ვღურედა უმინჯურო თიშე ოხერი,
ვორექი თიში მოზისხირე, მორიე მტერი,
გოურქი რაში, სოთინ ვარე გაჩერებელი,
დო ქარს ქიმეჩი ფიქრი ჩქიმი მაღონებელი.
მარა ჩიჩურო იშენთ ვეგშურსუ
ჩქინი რულაშე ათენერიშე,
შარა უკვათუ სკანი ნაცალა
ხომ ქუდოსკიდუ ამიერიშე.
ჩქინი უკული ჩქინიანეფი
მუთუნი ფერდემს ვეწოხვადუნა,
დო გემუანო მუში ცხენეფით
უშულადუო მიდეკვანწუნა.
მევურქ, მივრულექ, მეფურინუნს რაში გებენი,
უჩა ყორანი ეკმოღვარანს წასაგებელი,
გოურქი რაში, სოთინ ვარე გაჩერებელი,
დო ქარს ქიმეჩი ფიქრი ჩქიმი მაღონებელი.