რინა
კოჩქ ვაგოზურდა, ხანდა დო ლჷმათ
რინას დაღალი თია–საღალე,
სქან(ი) რინას შხვაშის ვაუძინანა
მუსხიშახ ეშე ვა დუმაღალე...
ართშა ერჩქინდი, ართშა ღურუქუ,
ქიჰამ(ი) ღურაშა ირფელიშ გემო,
თე ცხოვრებაშა ირკოც უკათჷ,
აბა ქიანა ართიში რენო?!
ღურაშ უკული მეტ(ი) რინა ვა რე,
ეცად(ი) თაქ ორდე გიმოთ რინელი,
თევრენ დორთელი თაქ კოც ვაუძირ,
ვართ თაურე ულირ(ი,) თექი შინელი,
კუნტა ცხოვრება– წვალებათ ეფშა,
დრო გჷწონტებულ(ი) ვა მიჭირინე,
თოლეფც ვაშურდას ოშქათ ჩხვინდინი,
თოლეფ ოთოლეს ვადინტჷრინე.
ათეშენი რე ირო ლჷმა რე,
დო ცხოვრება რე დიდ(ი) ზღვა დურუმი,
მინ(ი) „პროპკაცალო“ ჟი მინიფაფუ,
გიმე ინმინწყუ ქუა ჸურუმი...
ზღვაქ ვადოსქირას, ქუაქ ვანდღულას,
ათაშ(ი) იჸუაფ(უ) ნირზება, რკინი,
უბადო შურიშ წჷრდეს ოჩხუპუ,
ჯვეშშე მოძუნა ნირზება – წყინი.
ათაშ(ი) ირთუუ ჩქჷნი ცხოვრება,
კოჩ(ი) დო ეშმაკი რინას მართენა,
არძას ობაღჷ ათე ქიანა,
მარა ართიანც ნებას ვარზენა!..