საღარია
გოქუცი, ჩქიმი საღარია,
მა მეიშქვა სადიოსუ,
სქანი მულა ქაგინაფე
არძაში მინდორ-სტადიონს.
სქან ნოქურსუ ქუგუალე,
წიმოხუშა ნჭუაფასუ,
თოლ გესვეტილს თოლი გელუნჯი,
ქუგაშინენი სქანი ფასი.
ტატოშ მერანს ველაუნა,
იქ დოტკუმორ მუშ მენწყერი,
ჩქინ ნაშარუს შხვა უჯინე,
შხვა დადია, შხვა მენცარი.
მითაჟამეფი კიჟინუნა,
ლიმა რე დო ბორთაფი რე,
ჩქიმ უჯგუშო სი ქოიჩქუ
დუმაბადეში მოთა მი რე.
უკოროცხ ვალი გებძუნა,
ჩქინ ჩხანა დო ჩქინ ჯვეშიში,
ირო ოკო ვორდითუკო
მანჯღვერი დო მინჯე თიში.
მარა ირო გეგნომზღოდეს
თინ შარა დო თოლიშ ონჭე,
გორჩქინაშე დინჯარესუ
ჩქინ სვენა დო თიშ სიმონჭა.
გოქუცი, ქორთხი ვებორჯენი,
წიმ ქირქე დო გარამი რე,
შხვაშ თურშა მუ მარაგადე,
ჩქიმ გუმნაჭყან ვალამირე.
ჭკვერას ორდა გოლუაფირო,
ვაგგაყალას სადიოქ,
ჯგირი შურით ნარზიებუშ
მუკონწარელ მანგიორქ.
სი ოჭიშის შხვა კოჩი გერხე,
გუნარჩქინა ანთარიში,
მარენჯეფშა მიმაღალარი
ჩხანაშ წკონდა მართალიში.
გოქუცი, გოქუცი, საღარია,
ჩქიმ საჯიშე, გერგეზ ვარყა,
მალას ირ კოს გიორჯგინანს
სქან სქუა დო სქანი ნარყი.
გოქუცი ჩქიმი საღარია,
მა მეიშქვა სადიოს,
სქანი მოულა ქაგინაფე
არძაშ მინდორ-სტადიონს.
15/12/2015 წანა, ჩხოროწყუ