სახუმარო
ჩქიმი რინა, რინა ვარე,
ტანჯა რედო გაწვალება...
მორთი აშო ჯიმა კოჩი,
დომისხუნი საშუალება!
მარებელც შეულებუ,
ჩქიმი ნერი კოჩიში რსხება,
გამირიგით მა ოსური,
უღუდას ფარან ფერი;
ახალგაზრდა რჷნტჷ ძღაბი
ჩქიმო ვარე ანწი სერი.
ჯვეში დედჷბი, ბრელ ფარამი
საჩქიმო რე შესაფერი -
ლეჩქვის ინა ვეღაფუნცუ,
ვასაჭირ ჭითა ფერი,
ახალგაზრდა, რჷნტჷ ძღაბი
ღორონთქ მაშორ მა პუნდას,
მა მისხუნუ ჯვეში დედჷბი
ყებურც ეკოკვაკუდას.
ახალგაზდა მუშინებაშა
კიკოცალო სხაპუნდას!
ახალგაზრდა რჷნტჷ ძღაბი
შხვაშხვანერც მიგორუანც,
დოზუკოლი დოუჭყენი
ნინას დოირთინუანც,
ხანგური ძიცას ქჷდიჭყანც,
ჭკვერულც დღას ვათქუანცჷ,
დროთ გვალო გეგმორჩანც,
ბოშიქ ქელოუხათრუას...
ეცალი ცოდაში გადიდება
ღორონთქ ვამნოკათუას
მა მისხუნუ ჯვეში დედჷბი
ჭკუაში კოლოფი პუნდაჷნი,
მუში მოჭვა დო წიწილებც
კეტით ეკოჸუნდასჷნი,
მა თის შორშე უჯინედე,
სათმოთ თუთუმც შუნდასჷნი.
ღორონთი თი დღა ქჷმოძირი,
თეცალი დედჷბი პუნდასჷნი!
ყებურც ვამიშქჷრიტჷნც
ხინკის ქიგიოფიცოლანც,
გიოჭალც ქიგიოჭანც,
ძიქვას ქიგიობუჯღოლანც,
ოჭკუმალც ვეწონენც,
მუდგას მიოძგჷძგონანც,
ლებიას დომიზადჷნც დო
ღუმუს ქიმნაწკჷრწკოლანც.
სქანი პამადა ვასაჭირ,
ვეგიოდინ ბონუას,
მის გიწონებუ დედჷბინი,
მუმეხვარით გორუას!