სო რე?
სო რე ჩქიმი ობინეხე,
ჩქიმ ჭოდი დო ჩქიმ პანეში,
ჭვიტლურ დო ჩეჭიფეში,
კაჭიჭი დო ოჯალეში.
ჩქიმ შონურ დო ხოჯიშ თოლი,
კოლოში დო ეგუძგური,
ვაი, ბრელი მუ იბჩია,
კოს მუთუნშა ვეგუძ გური.
მემაჯინეს თე ონჭეშე
გურშა ბრელ მაფ ნახვატეფი,
ბორჯიშ გასჷ ქიგედინე
ჩქიმ ნოა დო მახვატელი.
ჩქიმ ლაგვანი- ჸვაფიჩალი
სუმარეფით ჸუმენული,
მუ ჯვეშეფიშ მუკნაულა,
ჸუჩა ჭიფას მინმეულუ.
ჸასჷ ზესქვი ვეგლებირსჷ,
მაფშალიას ქუფურინჷ,
ზღვადალიშე იაზონსჷ
მანებელო ქუმურინჷ.
მედეასით მუს მოკითხე,
შხვაში კაბას ითირანსჷ,
მუნაფაშე ჩეთი ვარი,
მალას ჭითათ მითირანსჷ.
სო გილაფრთა უშარეთჷ,
სონ გერგეზი, სო გიფცხირი,
საწმოხონოს ონჭუნ ნერი
ღორონთ, სინთე ქუმოძირი.
მუკი-მუკი იბჯინექ დო
გუმაღერღენწ ოშფა დემი,
ღორონთ, რთხულე, ქუმანჯღვერე,
„ჩელაშორო“ ვეშმოჸთენი.
სო რე ჩქიმი ობინეხე,
ჩქიმ ლაგვანი, ჸვაფიჩალი,
აიეტიშ ჭალეწკუმა
კინე ხინჯ მაფ გაბიჯალი.
6.01.2016 წანა, ქართი.