სქანი შური ცაშ თია რე
სი სქან ლერსის მიკოზგანჯჷქ,
უანჯე დო ნათანჯარი,
მანცხვარს ხოლო დოსქანჩჷნდჷ
ე წჷრხი დო ქარამჷ ჯვარი.
ძიუთ ინოდგჷ შურ ჭურასჷ
გობურჭულერ-გოცხონტილი,
სკვინჩა გილგოჭურჭულანსჷ,
ორწყე, მუჭო დოწკონდინი.
ვაგაჭიშუ სანწალესჷ
ჭარაშ ჯიმუშ ჯიმუაქჷ,
ვაგაწისუ ცაშ ჭალესჷ
მურიცხეფიშ ციმუაქჷ.
ძიუთ ართ წიგნჷ აკოჲკინძჷ,
ართო წყითე ჩილამური,
ცაშა ცინდა ვემეიძჷ,
ხოლო მუ რე გილამუნი.
მუ ქიაჩიქ გიჭყუ შარა,
მიქ გინოჲთანგ ჸვანა ცაშა,
ანგილოზეფ დორთხილანა,
ქჷგარზიდა თანაფაშა.
უკულ ქირსე წეკითხენსჷ
სქან ზისხირით ნაჭარასჷ,
მერკულია მურიცხეფცჷ
მუშჷ ხეთ დოიკაჭალანცჷ.
ოღონც თოლია დადიარე,
ჭარა, ქოიჩქჷ, მის მარენი,
სქან შურ ხოლო ცაშ თია რე
ლერსის მიკოლისმარელი.