სქან გოძიცა
თე გოძიცა სქან სახეს ვარ
ცას ხოლო მიკავალანც.
მა ვონჯა ოსინთეს დო
თევრეშე იბჯინექ.
ირფელს მუჭო ვაკათავა-
მიწუ კუმაქ,
- ვაკათა მაქ.
ჩიტიქ მიწუ- ჯაშე გეფუბრინ დო
ჯათ გინიბრთია.
ჯაქ ალმოფუცქინ-
ოშვითოშო მენწკარილი
ნარღი ვორდია.
ეშე-ეშე ულა ჩქიმო ვაგოჭყაფენია.
მუშ მასკვამათ ვალუნც,
მუშ მასკვამა რდუ გოღა ბჟაშ ბარჩხალი.
ირფელ სქანდე მუკოტირხუ,
ირფელ სი გუგართაფუ.
ენა ხვალე ჩქიმო, მარა
ათე ორთას თენა თაშ ქიმმოჩქუ
მა ართ ჭიჭე ჭურჭულც-და,
თიქ ირფელც ოკო ვაგანჭასო?!
სქან გოძიცა გინმოფორ მა ასე,
სქან თოლინაკაკა ჩქიმ შურიშ
ოტიბინე რე დო
მუშენ ოკო დიმტირე მა სოთინ,
მუშენ ოკო იბთუე სოთინი,
ჩიტო ფურინელქ ჯა მუშენ
ოკო ვეგიბტუე ჩქიმ დუდშე,
დო ჯაქ მუშენ ოკო ვაგოფაჩას
ფსუალეფი?!
სქან ძიცას გინმიბრულექ მუჭოთ შარას
დო უკმელას ვადაცადინე ნამთინ აკანც,
ვართ შხვაშო დო ვართ მუშო.
ბორიაქ თქუნ იქ დობგორ
დო ბორია ბთქვინ იქ კინე ბორია დოგორ.
ჩქიმ ნინაქ გეკობრაგადუ,
თიქ ხოლო ძიცაქ იჸუ, სქან ძიცაქ.
სქან ძიცა ბორჯიშ პეულეფც ხანტუნც
ვარჩხილიშფერ თუთაშ სუნჯის,
ორწკინაფუა
დო გოხონარელი ნოთელი ინჯამუ.
საფულაშე ეშულირ კოჩ რდენ ხოლო
გობირუანც.
გიძიცე, კინე გიძიცე.
ირფელ სქან ძიცა რე.
მა ვონჯა ოსინთეს დო
ინვორექ სქან ძიცას.
იშო მუშა იბჯინა,
ჩქიმ დუდშა ინმიბჯინექ
მუთ ჩქიმო ვაგოჭყაფენი!