სქან სანთელო! სი ქორშჷნო, კუჩხის კუჩხი გილარდგინი? -- ნანა, ნანინანა,
სქან სანთელო! სი ქორშჷნო, კუჩხის კუჩხი გილარდგინი? -- ნანა, ნანინანა, ჰოუ ნინანა! ნანანინა.
მოსვასვილი, მოკვანწილი, ჟი ბალკონს (ჷ) გილარდინი;
მა ეულირი ბოში ვორდი, სი უწიფული ცირა რდინი.
თინა ვარა ვა გიჩქჷნო, ჩქიმი გურიშ კჷლა რდინი.
შური ჩქიმი შულადილშო მაშვანდებელი ბინა რდინი.
თოლჷშა ვამომიოლჷდინი სი ჩქიმოთ(ჷ) თინა რდინი.
დიო ხოლო იმენდი რე, ჭიჭეს ვარა ქორშუდე̄.
შხვაშა ირო ქომისხუნუქ, სი დანჩხჷრს(ჷ) ქობჭუნდე̄,
ატარამო მუკურდე̄, ჩქიმი ზისხჷრს(უ) ქოშუნდე̄;
დო მა ირო თინა მოკო, ირო გურს(უ) ქორჭუნდე̄.
დანჩხჷრო გოულირი ვორექ. ნოტე ჯიხას ვონდუდე̄!
ვარა დიხას, ვარა ცას(ჷ) -- სოლეთინი ვონჭუდე̄;
ვარა ჩქიმო, ვარა შხვაშო, ნოტე მუთუნს ვორთუდე̄!
ვარა ღურელს, ვარა თელს(ა) -- აკას მუთუნს ვორგუდე̄!
თენა ცოდა მუჭო ვარე, თეცალს კოს(უ) ორთუდე̄?
მარა ენა მუთ მიმოჩქ(ჷ), უკული ვადმოკორდჷდე̄?
ღურა დღაშა ქოგიჯინექ, გვალო ვაგჷგოჭყორდჷდე̄.
გურს(უ) ვარა ვა დორჭუნსო, უსქანეთჷ ბჭყორდჷდე̄?
ინა ღორონთქ ნუმ ქიმინ(უ), მა სი ვა გოცოდუდე̄! *