ტრაქტორი
ახალი რინაშიქ, გეგლარწკინ ბჟაქჷ,
გეგნიხალიწჷ ჯვეშჲ ქიანაქჷ,
ირჲ კინოლაფირჲ კუჭუხურაში
ქჷმშასინთუ თე ბჟაშ ჩხორიაქჷ.
ყაზახიქ ქიგეგჷ რინაშ კანონეფჲ
უმოღეთ ქიჩინ კაღუშჲ ოგაფეფჲ,
ქიჩინ იწვალებუდ ნაბტანს ორინჯეფჲ,
დუდო მუ, უკულჲ კამბეშჲ დო ხოჯეფჲ...
ქაჩინ ხვალე მუ, ორთალს ვარჯგინანს,
ხვალახეთ ხაჩქას მუთა ხერს მეჩანს
ქიჩინ დო ორთუ ხეს უვალუანს
მეზობელჲ კათას იმაჸალუანს.
კოლექტივჲ მანწყის, ართო ხანდენა,
მარა ოგაფათ ვაცოდილენა,
დუდობას ქოთხის კინაში ხოჯი
დო თით ორთასჷ იმორჩილენა.
კინაში ხოჩქ ქჷმორთ ღუმინ–ღვარაფით,
სოფელიშ შუკა, ლეტაშ შარეფით,
ლეტაშ შარეფო ოკოხანტურუ –
მუში კუჩხიში, კიბირ – ჩქვალეფით.
გაჯინ ყაზახენქ, ხოც ნომონუე,
სახელო ტრაქტორჲ ნოჯოხობუე,
სქან ჟირ დო სუმი ორთალ დიხასჷ
ართი მინუტის დუნოსოფუე.
თქვის – კოჩიშ თოლი მუს ნოძირუე,
რჩქინა, გურაფა მუ ნოღირუე.
ხეშ ნაკეთებუ კინაში ხოჯი...
ხოჯჲ დო კამეშის გინორჯგინუე.
გევონწყათ ანწი ჩელა–ბუსქასჷ,
თენა ქუსქუათ ოხონალ გურთანს,
ქოთჷ ხონუნს, ქოთ ოღარს იღანსჷ
ვართი შურდუ დო ვართ მიოკუსანს.
შურდგუმილ ხოჯი ანწ ვავაწვალათ
მენძელი კათაქ ოკო მიბცალათ
კინაში ხოჯი ართო ქიპიდათ:
ოღალ თით მიბღათ, დიხა თით ბხონათ.
დო ათენერი ჯვეში ქიანაქ
ახალჲ ქიანათ გეგნიხალიზჷ,
სოდეთ ეიშახ აგაფა ხონჷნდ,
ასე ტრაქტორი გილეხირიზჷ.
1937 წ.