ულებურ ხიოლი
ძალამო ოზარუდჷ გალე გიმულა, მარა ოსინთეშე გიმიჯინუნჷ, ბჟათ გოსინთორელ ელ-მოლუშ ძირაფაქ გურ აუხინარჷ დო გინოჭყვიდჷ გიმულებუდუკო გალენ, ქენუკაშაფუდუკო წკონდა ჰეერინ... შარას თოლეფქ გეიარზჷ დო გინოჭყვიდჷ წინგეფიშ მაღაზიაშა მითულა, სოდეთ ართ მუშ ოჸოროფულ ავტორიშ წინგი ქიჸიდჷ. მაღაზიაშე გალე გიმულირს, მიდგარენქ, შქა ხანშა მენჭაფილ კოჩიქ ქაუხვადჷ დო დიდ მორდებაშ თუდო ფარა ქოთხუ. ფარა, ნამუდგათ ალუძუდჷ ჸუდეშე გინულირსინ, წინგის ქიმეჩჷ დო გურქ დოჭყორდჷ ასე ძალამო, მუთუნით ვემიახვარებედჷ კოჩიშან. უწუ, თეთრი ხოლო ვალამიძჷ დო ქუდამჯერქიაო... გაგინძორჷ შარა მოფირტვინაფილქ. უნელო, მუდგარენქ გონათჷ მუშ დუდიშ დინოხ, ქუგაშინჷ, წოხლენ დღას ჟირ ლარიან კინიჩუ ჯინსიშ ჭიჭე ჯიბეშან, გეხარჷ დო შურერზამილქ უკახალე დირთჷ. გორჷ, გორჷ დო ქიმიოგორუ კოჩის, ონჯღორიანო უწუ, დომღორებუქ, ნობღვენია ფარა დო ქუდაკინუ ხეს. კოჩიშ თოლეფშე მუქუთ ეშასოფუნ, ბჟაშ გურშე ეშახარცქილ ჩხორიეფს მოგენდჷ უმოსო, დიადიხაშა მინჭუაფჷ კოჩიშობაშ გატიბაფალონ, ეთიცალს. გეგნახუტოლეს ართიანს, ბრელ ხანიშ უძირაფუ მაჸალეეფცალო დო ხიოლიშ გინაფა, ნამუდგაქუთ გურშა დინაკათესინ, ვეიწონედჷ მუთუნით.
უბაძაძეთ მუთუნ ვამოხვადუ. ირფელს მუშ ღანკი დო სამანჯელ უღუნია, - მიშჷ დო მეხარენდჷ ჸუდეშა...