უჩინებ მაფურინჯე
რინას ეკი ეკოჸუნცუ, მინ ტყობუ დო მა პუნქ მინჯე,
ეთინა რე შურც ინომხე, მუდგარენი მაფურინჯე.
ჩქიმით რენ დო ჩქიმით ვარე, ჸოფირენცჷ მუშითია,
ირფელც მუში რინა ოკო, ირფელც უღუ მუში თია.
თუთა გურო ინმაგვაგვუ, ბჟა თოლეფო ქალმარსხია,
ლილუ ჩქიჩქუ სო მიმოტეს, ჩილამურამ ალაფრსხია.
ცა შურეფით გოფერელე, ბირგულ უშქუ არძა გვალას,
ჩხომიშ ჸუდე ქიდიბტე დო შარას გეპუნქ გუნავალას.
ხუმბაბა დო ნანინგირა, თიამათი დო თი ნანა,
სქან ნაჯინჯა ეთექი რე, ჭვემეფ ალმოფურცქინანა.
მასქურცალო ინმაქაქალ მუთ თი ბორჯეფც მორჩქილენი,
ღურუ მუჟამ მიკიფსური, კათეფ ვარდეს გორჩქინელი.
რინას ეკი ეკოჸუნცუ, მინ ტყობუ დო მა პუნქ მინჯე,
მა ვებჩინენქ, შურც ინომხე, მუდგარენი მაფურინჯე.