ფარა.
გოლა ადგირს, ტყას მეურს ართი რჩინუ კოჩი. მიოჯინუო, საროტის, შქადიხას, ქიგეძჷ დიდი ძანძა ტომარე. ქიმერთჷ ხოლოშა დო ხე ქიმეთხუნი, არდგილიშე ვადასაბაკუუ. მონწყჷ დუდინი, მუს ორწყე, დუდიშა გოტკაჩილი რე ფარათ! მუ ქიმინასინი, ვა უჩქჷ. ართი ქოცადჷ, მარა ხუჯიშა ვა კინადვინჷ. ნაბეტანი მონკა რე; მუთუნქ ვა გიშუურთ, გინოჭყვიდჷ სერგალაფა.
მიდასერგელუანს ართი რუო – ვითი ნობიჯგუსინი, გაჩენდუ, მუთ შეულებუნი, მანგარას ქიგიაშქვანს ბიგას ტომარეს დო ქიგიოდუდინანს, ქიგიორაგადანს: „ათენა დოღუპუნს კათას!“ ტყას აბრაგეფი მითნოხვენა. სუმი აბრაგემქ, თოფეფი მორხინილემქ, ქუდოხვადეს თე ბადიდის დო კითხეს: – ბადიდი, მუ მეგიღუ ტომარეთია?
ქოძირეს ფარანი, ახიოლეს; ათეშენი მითოხენა ტყას დო აბრაგენა. რჩინუს ქოჩინთეს პაღური დო ტომარე მიდუღეს.
აბრაგენქ ქაკნიდვეს ხუჯიშა ფარათ ეფშა ტომარე დო მიდართეს. ე რჩინუ თაქ ქიდიტეს.
მეულა საროტისინი, ქოძირეს გოლაში ჯინს ჭიჭე სოფელი. ქაგააშინეს შქირენქ დო თქუეს: ჩქინდე ართიქ ოკო მიდართას სოფელიშა ოჭკომალიშ მაღალუშა, ჟირქ ფარაწკუმა ოკო ქიდოსკიდასია, ვანდუნა ართმაჟიას.
ქარღვეს კალი, ქიშეხვადჷ ართის კალქ. გედირთჷ ექ დო მიდართჷ სოფელიშა. ქიმერთ ართ ოჯახიშა დო ოჭკომალიში მომზადება ქითხუ; ფარა ბრელი უღუ.
ოჭკომალეფი ქანაანწყუუ ოსადილე კარანჩხას, ქაკულურღუ კილე დო მოლართჷ. მოურს დო ფიქრენს: ასე თექ ქიმეურქინი, თე ფარაქ სუმო ოკო გირთას. ეს ვა უჯგუნო, ოჭკომალი მოპწამალუე დო თელი ფარა მა გიმოსკიდასინი?
ათე ჟანს ფარაწკუმა დოსკილადირი ჟირი აბრაგიშე ართ–ართიქ თქუ: ჩქინ მაჸალე დიირთუნი, ფარა სუმო ოკო გოფრთათ; ვა უჯგუნო, თინა დოპილათ დო ფარა ჟირო, შქას გიფრთათინი? გაგმანწყის ათენერი გეგმა.
ქომორთუ ოჭკომალამი მაჸალექინი, ქარაგვეს დო დოჸვილეს. ქოდოდოხოდეს ართ ვერჩე ადგირს, გეშანწკარეს კარანჩხაშე ოჭკომალობა, ქოდიჭყეს ჭკომუა.
გიშეთუ ჭე ხანქინი, ჟირხოლო აბრაგიქ თე ფარათ ეფშა ტომარეწკუმა ქიდაანთხჷ დო დოღურჷ.
მუურს რჩინუ მუში ბიგათ, მააბაკანს. მიოჯონუო, ქოძირუ, ვერჩეს, შქაბანია დიხას ქიგიჩიკინანს ფარამი ტომარე დო მიკი–მოკი ქუგუუსვანჯჷ სუმი აბრაგეფი.
ბადიდის ვა გუჩაკვირუაფ ენა: მა ვა ფთქვიო, დოღუპუნსმ აქი თე ფარა კათასინი?
ქუმოკიდჷ ხე ფარამ ტომარეს დო მეუსარგელჷ. გაჩენდუნი, ქიგიაშქვანს, მუთ შეულებუნი, ბიგას ტომარეს დო ქიგიორაგადანს: დოღუპუნს ათე ფარა კათას!