ფარფალიეფი
მისხუნ ფარფალია ვორდე,
სუას უფათქუანდე,
ხარხუნტია პეულეფც
შურცჷ გინვორთუანდე;
კაკაბია ცჷმც ბშუნდე დო
გურშა გიბკოკობანდე,
მასკვამია მოკო ვორდე
ატამაშ პირც მობგენდე;
სითჷ სუა ქორჩანუას
ხურჭკუმი დო ფორონჯი,
ვაგორჩუდას მაჭირხოლი,
ქილორი დო ტორონჯი;
ოციმუეს ღალიშ პიც
წყუ ორთუდას ხჷრჩჷსი,
ჩქით გიფქვეთათ გიბკვენწათ
ქუას თიში ნარჩხისი;
ართიანც გუაფარფალათ
შამარაში ხოლოს,
უთანთალუას ჩხორიაქ
სუალეფიშ ოროს;
მინშა ქიგლაფართხუდენი
ვარდიშ ჭითა პიორც,
მათჷ გუგახურთქინუდე
მივოტენდე ფიორს;
ხუტიათჷ ხურხეფი დო
მეფათქუდას სუეფი,
ორთეს გამწათ ოჭუდას
ჩქინ ჸოროფაშ ჭუეფი;
დღა ორდასჷ ულიებუ
ბჟა ქვერსემი დარანა,
ოდო ირო თაში ვორდათ
რახანც ვამივარანა.