ფირქეფი
გუმოსქირაფილ ვორექ ხიოლშე.
ლერსიშ ჭარუას იბჭყა.
ხიოლი დო ლერსი ართო ვეგლულა.
იშენ ვადომხუნ ლერსი ბჭარიკონ,
მუდგარენქ ქუდმოხუნუ დო ბჭარუნქ ამარი.
ჩხოროშა მაფჷ გური გუნაკიჩა.
გობთინუ დო გოფაფჩუ თის ხოლო. ცოდა რე,
მუ ხან რე კვარკვატელო დო გვალისერო ალმაგვაგუნ.
ადამიერიშ ონოფულუს იძირებე, მუ კოჩი რენ თინა,
სალამუსო უმოსო წუმარჩქინანც კათას.
სქილედიშ გუნარსხუას ირო იბურჯანც მუდგარენ,
ინწკირუ დო იტახუ. გიშულა ოკო ჩქიმდე მუდგარენც,
თენა მინშა ფირქი რე, მინშა არზი დო მინშა შურო მუთუნ ვარ.
ეთინა, პოტიკის უძახუნან, მარა
თინა არძაშ უმოს ნძალიერ ჸოფე უკორინებ კორინიშ გეშა.
გუნაციმა, გუნაციორა ნარღეფც მოუფინჷ ირფელი.
ჯგირი, თეს ციმუაცალო დოფშაყარა, მარა სო იბღა უკული,
იბღენ მუშა იბღა, ნამ კარაჩხას ოკო მეურჩქინე აკანი, კინ გურც-და ვარა.
ირფელი გურც. შხვადო იღენ ხოლო მუ რე,
ქინკოიცენც იშო დო იშე ხოლო მუთუნს ველუდა საჯგიროს.
ბორია დო ჭვემა, ორთაშ ეღები ჸოფე, სი ვადგანძალებე იშა
დითირევა სქან ეღებიან.
რე ბორია და ოკო უჯინე, სოიშა ვედერჩქალებუნ.
თაშ რე რინა, ართი ჭიჭე ჭურჭული რექ თე ქვერსემ ორთას დო
კოჩი ვაგოკითხჷ მუთუნც.
კოჩი გოკითხუდას ეგჷბა მარა, ადამიერც ვაკითხუნა დო
სი თეს ქიმიაბაღუქჷ-და, მიარჩქვანე ოკო.
ვარ-და, ანგილოზო მოირთუმდუკო იმწკჷმა,
მასქურიშ გუნარქიას შურო ვეგინანდი.
მერეთ რე რინა, ადამიერო მოულა ხოლო ნორკე რინა რე,
იცაფული, იცაფული დო ბოლოს ქუდოსქიდი მუთუნქ
თი დიხა გუნაზაშე-და, ეთინა რექ დო გეუჯერდი თის.
იშო-აშო გიგვარგვასეს, გიგვარგვასეს დო გაგშეჸონეს მუდგარენ სქანდე.
გეთუ.
ანწი სი ოკო ირსიოლე, ორთაშ სისქვამე დო სიჯგირე ქინირსხუენ დო
ჭიჭე უჯგუშობას ქიმიოჭირინუენ ეგჷბა.
ვარა მუჭო დუდშე ფთქვინ თეში,
ნორკე რექ, ნორკე დო სქანი გაკეპება გვალო დუგაჭიჭარენს,
ჭიჭეთ დუდი მირჩქინი, მარა ირო ირდი.