ფირქეფჲ მარგალურ ნინაშ ჭუმენერ დღაშენ
ხურჩინა წყარმალცალო მოსოფჷნა მარგალურ ნინარეფჲ, ართის მაჟრა მოჸუნც, მაჟრას მასჷმა დო თაშჲ, ლაჸაფენა, მეთხოზჷნა ართიანც დო მუნეფიშ სისქვამათ ოჰამჷნა კოჩიშ გურც...
ბრელც ფიფრქენთ დო იბჩიებუთ ჩქინ ნინაშ მუმალჲშენ მარგალჲ კათა. მიარე არზჲ ისხუნუ, ანდა კოჩიშ ნარაგადჲ გითმიარზებუ. მარა მუშო გოკო, მეურც ბორჯი, მიჭუმინ დო ნარაგადჲ კინჲ ნარაგადო დჷთმოსკიდჷ. ხურჭკუმეციმილეფცალო მებდინით, მემიჩქ, მარგალეფქ. მუს გოხვარ ასე ისტორია, მითაჟამიშ ამბეეფიშ ჩხირკუა, ფაქტი ნწალე რე, გურიშ მასოფალჲ დო მაჸვილარჲ- მარგალურჲ ნინა ამდღა-ჭუმე ხეს ქიშმოდინჷნა. მუზმა ლერსი ჭარელე დო ზადელე მარგალურო, პროზაქ ხოლო კუჩხჲ ქიმიკინდუ თე ეკონია ფარანც.
ართჲ ჸაშე ელაფალირ ნინა რე ქორთულჲ დო მარგალურჲ (მუ რაგადჲ ოკო შონურჲ დო ლაზურჲ ხოლო). ქორთული საქორთუოშჲ სახენწიფო ნინა რე, მარგალურჲ რეგიონიშ ორაგადე. ორთეშ (მსოფლიოშ) ისტორიას ჩინებულჲ რე, ნამ ნინა იჭიჭარებჷნ, თინა ართ ბორჯის მადინაფუ რე. მოკო-ვამკოკანი, ფაქტეფჲ თოლიშ წოხლე მიღჷნა. ოორუე კავკაციაშ ართ ნინაქ თეშ მედინჷ, ამდღა კოც ვაუჩქჷ.
ნტერი ირო ნოჸვედჷ დო ამდღა ხოლო ჸუნც მარგალურს. ტარიელ ფუტკარაძეჯგუა ვათანძარეფჲ დო ვაი ისტორიკოსეფჲ იღვარღვუნან, თიშენ რე ჩქინ საქვარჲ გლახათ. მარგალურჲ დო შონურიშ დიალექტო გჷმოცხადება ანტი-ქორთულჲ საქვარიშჲ მეტი მუთუნჲ ვარე დო არძაშ უფურაშ დო გურიშ მასოფალჲ თინა რე, ამდღა ბრელჲ ქორთუქ ქელუდირთ ხასლას ფუტკარაძესჷნჲ. თე ამბეშ დუდჲ დო ბოლო გეჸვენჯჲ რე: მუჭოთ ჩინებულ რენი, ჩქინ ლაზჲ ჯიმალეფჲ ისტორიაშ ჭარაკვარჩხობაშენჲ, ამდღა თურქეთის ოხორანა. ბრელ გაჭირება გინიღეს უქორთუეთ. თე ეკონია ბორჯის თურქეთიშ ხემანჯღვერობაქ ეჭოფჷ თეჯგუა კანონი: კომპაქტურო მოხორე კათას სკოლას ქჷდაგურუან მუშჲ ნინანჲ. ლაზეფჲ ამდღა თურქეთის (შხვაშ ქიანას!!! ) ლაზურს გურაფულენა დო ჩქი, ჩქინ ქიანას თეშ ნებას ვამარზენა. ლაზეთის ქიჸუაფუდჷ 40 ფანიაშ ხემოჭარუა-და, დაგურუანდეს ლაზურს. ასე სამარგალოს მუშენ 40 ვარ, 400 ანთასჲ კოჩშე უმოს ვამაჭარანს ხეს მუშ ნანაშ ნინაშ გურაფას. ჸათექ ვამოხვადკონჲ თიშენჲ თე ჩიჩიეფქ მარგალურც დო შონურც ქიგიოდვეს ქორთულიშ დიალექტი დო შოვინისტურჲ პათეტიკათ მინმოთიკინანა ჟიშე. ფუტკარაძეს, ალბეთ, მარგალჲ ინტელექტუალეფჲ ღურელჲ უჩქჷ. გაჭირებულ დღაშ გჷნარჩქინას, მიქ მეჩჷ იშ გაღა,თიზმას ქიმეხვადასჷნჲ, მუჭო თეთ ართიანც გინაბუნუანს კათასინ!
უკულჲ "მარგალურჲ სეპარატიზმი" გეგმიგონეს. ჩქი ჯგირო მიჩქჷნა, რუსეთიშ იმპერიას ოკოდჷ საქორთუოშ ეშაჸოთამა დო "დოფაჩჲ დო იპატონიშ" პრინციპით სეპარატიზმიშ თასუა. მარა ომარგალეშ გიშაგორილ სქუალეფც დღას ვაულჷნა თეშ მოხუჯეთ. ირო ქორთულ საქვარიშ მაკეთებელ რდეს! ამდღა გერჩქინდეს იურა ღვინჯილია ჯგუა პროვოკატორეფქ, მარა ენეფც ჩქი, მარგალეფჲ ვუგამენთ!
ამდღანერ დღას არძაქ ართო ხუც ოკო ელუბდირთათ ართიანც. ჩქინ ნინაშჲ გინასკილიდაფარო! სკოლაშა მარგალურიშ მიშაღალა ჩქინ ოშწანურამ ჯიმალობას ხეს ვადუნჩალუნს. ჩქინჲ ჯინჯი საქორთუო რე!
ღორონთქ ჯგირობუა ვემიარკას ჩქინ ქიანას, ნინას დო კათას! ჰამენჲ!
გიორგი ხულორდავა
6 მანგი, 2014 წანა
ოფუტე სალხინო