ფრაგმენტები
2
საღორონთო კოჩი ორე
სი წოხოლე აწოიხენი
გოძიცელო, გემუანო,
ჩიებასჷ ურჩქილენი,
აშო ხოლოს მოკჷნელო
სქვამ თოლითჷ გიჯინენი.
მუდგა დროსჷ ვარძირენი
იშო გამიჩენდჷ გური,
ნინა ვეკჷმარაგადე
რსიოლც მიჭყანც ხათე დუდი,
თოლი სინთე მიდინჷ დო
ქათომცენცჷ იშო კუჩხი.
სახე მაფუ დოლოშფერი -
ჸოროფარე თეშინერი.
ტანც თაკარი გორზამილო
გჷმილენცჷ რგილი უფი,
ბუძგურია ქჷგმოდჷრთჷ
ითამ ღურას მივოდჷრთი,
შურ სოდგარენ ინმაქანცჷ
ვაბღურე დო ეგებ დიბრთი.
3
საფოში მაჸალე ძღაბი ითხუაფუ
დობღურენი ქომისხუნუ
ხვალე დოსქჷლადაშა
გვალო მუჭო მიდინჷქჷ
ვარძირჷნქო აკაშა.
ჩილამურით მეთხუებუ
შარა აკართაფუსუ:
"შურ მაფ ეშაწკიტონილი
გურ რე ეშალაფუსუ,
ჩარცხიაში ჟამი ორე
საფო ჩქიმი დაია,
ირკოჩიში ოსხუნური
ცირა ოწკანტაია,,
მანგიორი მა უწიი:
"შარა ჯგჷრი რჸოფუდასჷ,
ნამ ჸუდეშა მინორთენი
იღბალი მერჸუნაფუდასჷ,
სქანი საფო ქორშჷდასჷ
ვაგიჭყოლიდუა დღასჷ.
ქჷგიშინი ია ია
მიწილჷნა ბრელშა ართო,
ვარდეფი დო პეულითჷ
ეფშა გაფუდ ლუბა კართე.
კისერც გიგოხანტურუდუ
მინდორიში სი ძიეფი,
ართიანიში ჸოროფათჷ
ვებრძღუდითჷ ჩქჷ ცირეფი.
სქანწკმა ართო ლაჸაფითჷ
სო ვავორდი სო ვემიფში,
მუშ მაჯგჷრა შური ინთხანდჷ
სქან სამეფო მირონიში.
ანწი ჯგჷრო გოლუაფირო
ახალ შეხვალამაშა,
შურო ღორონთქ გომტჷბუდა
ხოლო ქორძირ აკაშა.
1
გოფშა თუთა ელელი
ფერდ ქაძირი მელენი,
მურიცხეფი ძიუთუ
თოლეფც უძღვარუანა,
თუთა ჯიმა რენია
სინთეს უხვარუანა.
7
ჩქიმი გური თქვანწკჷმარე
თქვანი გოლუაფირო,
ირო დუცუ გოილუანთჷ
თქვანი ხვამა მაფ ირო
12
მუჭოთ ჯასჷ ბურჯაფითჷ
ბორიარე აშერენცჷ
სახანთი ხოლო თისჷ ორთჷ
კოჩიშ ტანშა მიშელენც.
9
სქანი ხუმა - სირინოზი
ხასიათი - ჭაბურია,
უმოს ხოლოს ქოპუასჷ,
ხეთჷ ქჷმმონჭაფუნია.
13
რინაშ გემო მემიდინე
გური შქასჷ გორთიო,
შურიში ეშმაღალარო დო
მაჭყვიდალო მორთიო,
ასე შურო ვარშჷქჷ დო
გვალო გჷგოჭყორდიო!
11
არძა დროში ახალეფცჷ
ჩხე ზჷსხჷრი ახანგენცჷ.
14
ჩქიმდე მეტის შხვა გიჸორცო
კისერ მუკატახალი!
ანწი ვართი გეკვირუა
მათ დობგორე ახალი.
16
სქანიცალი მა ვამძირჷ ძღაბი
სოურე მორთი, სოურე კჷლასხაპი.
15
ირო მოკო ჯგჷრ გიკეთე
ღორონთ ქჷდმაცალენდასჷ,
ვაგმაგინჷ მუშენი რე
სქანდე ვორწყექჷ წვალებას.
19
ირკოჩიშა მისხუნუდი
ქორშჷ მუჭო მიჸორდინი,
გამარტებაში თჷრიცალო
უკული მუშენ მიკოდინი.