ქვერსემ ვორექ, გვალო რცამი
ჭუაშ მიკოჸუბეჩუა,
მუ გიწუა, მუ გეჩუა.
რინაშ კონწოლ მიკინებუ
ოშა–გოშათ მუბეჭუა.
ასა–გასა ცუნაფილი,
უშარობას წურაფილი.
ცურუბია ოგვაჯეს
ჩიტო დინოხუნაფილი.
ორთან ჩქიმი ცა დო გვალა,
აშო ულა, ეკნათვალა.
ორკიანე მუხურ, ორო,
ნოქური დო გუნაკვალა.
ოროხ–მოროხ, ოროჟვენი,
შურიშ ტიოზ, რსხულიშ რზენი.
ორსანტ ვორექ მა ჩქიმ ნინაშ
ამდღა ფობრუნც თიში რშვენი.
მუთუნ ვამაფ ნაშიბოტა,
ვაგაძირე ინა სოთა,
ლერს ლილუ რე, თოთო, თოთა,
ჩქიმ მულაშა ნაკილოთა.
გინმოქუნცუ ჯიგან–შქერი
ბორო ვარე, გამაჭკვერი.
ციმინტია, ციციბელი
ფირქ ქუდობცუმ ართო ქვერი.
რჩქინა ჭიჭე, რჩქინა ბრელი,
ოქიანე ჭერჭე, ჭყელი.
დღა ნათასა, ფალუ სერი
რინა იშენ ფალისერი.
რაჩხა გვალაშ მუკნასოფა
გურ მაფ ინოგვალისერი.
ჯილე–დარან, მოლილერი,
ორთას ვორექ მორინელი.
ჯიჯაღცალო წიმი მეულ,
ყილო ვორექ მოლიმერი.
ჟირგურამო ვამომრთუმუ,
მარა ბჯოხო გონორთელი.
თოლი მაფუ მურიცხცალო,
ერზამილ დო გონოთელი.
ქვერსემ ვორექ, გვალო რცამი,
სუაჭარგა, სუაცამი.