ღურაში ნება უღუ ხვალე
მის უჩქ მუ ჟამს თე ქიანაქ
გოდირთუ დო ქოდირთუნი,
კოსი შური ადგუმუ დო,
შურქ ბორიათ ქოდირქუნი;
მინი გვალო ირჩინუ დო,
ოთხი ფათი მოდირკუნი,
მინქი დაბადებაშ დღაშე
დიხას დუდი ქოდირგუნი?!
ღორონთქ კოსი სვენა მეჩუ,
ორენჯს კიბირ დო ბირგული,
ოგვერდალოთ შკირენულო
ორე მარა ქოთ ქირგუნი?..
ქოჸოფენო ვარა დიხაქ
კოჩიშ ცოდათ გოდირკუნი?!
მუში ნარდიქ ართ მაჟია
აკოჭკომეს სოთ ქირდუნი.
მინშო ა თე ქიანა რე:
ოლონტყეში, ოთიფური;
ართი მანგო მიოჩქუნა: ქოთ
ჯგირი დო ქოთი ფური.
ართ მაჟიას მუშენ ჭკუნა,
ეშაჭყვიდეს ქოთი თური...
ადამ-სკუაშ გორჩქინაშე
ღორონთქ ხოლო გოჩირთუნი.
კოს მიარო ბორჯი ოკო
ონდო შური ადგუმუნი;
ერჩქინაში უკულნეშე
დიხას ორე თაქ დგუმური.
წაწამიე გორჩქინაშე
ონდო ღურუ ანდგუმუნი,
წკვერეტიშე გიშნაულას
ღორონთქ რინი თაქ დუმუნინ.
ღორონთი ვამიჩქ სოდე რენ დო
სვენა ორე კოჩიში მინჯე,
ითამუ დო: "თე დიხა რე
შურ დო ხორციშ გასასინჯე";
ღორონთს ირო იშინუანთ,
ორდოსი დო ქოთ მაინჯეთ.
კოჩიშ მონძე ვარწანა დო
ღორონთ რწანან ვადაიჯერთ.
კოჩიშ ჭკუა-ჰორიზონტ რე
კოსმოსიშე ვარე გალე;
თე გორჩქინა მიქი რკითხუ,
ვაგოკოდას მუ გუგალე?!
ანდაღებული ქოჸოფენო
დიხას ჟიდო უღურალე?
შურდგუმილი ერჩქინელსი
ღურაშ ნება უღუ ხვალე.