შარა მარგალ მეშარეში
არძო შარა ვაშარენს, ნამ შარას ვორწყეთინ,
ართ შარარე ქიანას, მით რინაშო ფიქრენსინ.
ართიანი ვამიორა, ჩქი ჩქინ რჯულს ვავონჭუთ,
ოროფაქ მემდინეს, ეშმაკებს ვომსახურუთ.
თი დღაშა ქიმეფრთით, მირონობას ვაფარენთ,
ღორონთ გოჭყოლადირო, გილურთუ დო ვაფიფქრენთ.
ჩქი ჩქინ გაჭირებებს, ირო შხვასი ვაბრალენთ,
მეშარეს შეფხვადუთო, ართიანს ვავაფასენთ.
გურიშ რჩქილა მივოტეთ, ჭკუას ეკოდინაფილო,
პიჩვან გოჭყოლადირ მაფნა, კუჭიშ აზრით შკურნაფილო.
ჩქი ოჯახი ეკოპუნა, სქუალეფიშ გოლუაფირო,
ბაღანეფ ირდუდან, ონწეშ - ოროფა ძირაფილო.
მარანი დო ხვამაშ უმშო, ოჯახი რე მუნაფილ,
ჩქინ ნათასა უნაყოფო, დოლო მუნოლუაფირ.
ოხვამეშა ეკმაულარს, გური აფუ შქურნაფილ,
ფარაშ უმშო ვეხვამუ დო, იმენდი აფუ დინაფილ.
ღურელს წესის აუგენა, თიში ღირსი ვარდასინ,
სქან ქონებაშ მაძირაფუს, ქიდეპირე ვარჩხილსინ.
ნათუას ვაივარა, მანათალიშ ქრთამითია,
ანაფორა ქიმკიქუნუ, რჯლიშ გალე კათაქია.
საბატონ დღა გოთანელს, ჩქი სანთელი ვეკმომღუნა,
შურ ეშალაფირეფს, ჩქინ იმენდი ვაუღუნა.
თანაფას უკოჩობა, ეკლესიას ვეგიოხედუ,
მარგალ მუშ ონწეშ ნინათ, ღოროთს – ქირსეს ადიდენდუ.
ოდაბადე ქიგიშინი, ბაღანობაშ წკონდა რინა,
ცაში მიოჭირნაფალო, ქელერინე ნანაშ ნინა.
ჩქინ ურჯულო ცხოვრებას, კოჩანიერს უძახუთ,
მარგალო ვარ, მათასალს, მახაჩქალო ვავორგუთ.
უფალუო გოფალერ, ქირსე ზოჯუნქ მახვამალო,
სი გორჩქინდი ქიანას, ჩქინი გიმაწურაფალო.
ახალ რჯულ იქადაქი, შურიშ გინასკილადალო,
წკონდა კათა ქიგიორინე, ფურ კათაში მანათალო.
თოლ გონჯამილ მაფუ, მარა წკურუმიას ენვოხექ,
უჯით ურჩქილექი, მარა ანკია სიტყვას ვებრჩქილექ.
მუ მოღერე სქვამი თოლი, ქირსეშ შარა უძირაფუ,
რჯულს ვეგეგონუანქო, სქანი შარარე მადინაფუ.
მოურს ღურუშ ანგელოზი, გამკირულე წანეფინ,
შიში გომზარზალუანა, ქიმიაგამუ ზარეფინ.
ჟარნეჩ დღას ძირაფილო ჩქინი საქმე უსამართლო,
მაჟარნეჩას გეგმომღანა განაჩენს სასამართლო.
შური ჩილამურით ებშა, დაჩხირიშ კარს მიკორნელო,
სამოთხეშ კარ ეკილერი, ცოდეფიშ გოშინელო.
ეკლესიას ქოშქიდეო ფური სიტყვა, ნინაშ გამო,
დუდი გემნიღი, ხატი ქოძირი, ქიდიჩოქი სანთელამო.
შხვაში გეწურაფა ვარი, თია ვორექ ეშმაკიშ,
ცოდაშ ებშა, დიდი შიშით, იმენდ მიღუ ღორონთიშ.
მართალიშ მადიდებელს,შარა ხვამელ გაფუდან,
წკონდა შარაშ მაგორალებს, ქიმეიჭირინუაფდან.