შურდგუმა დოჭყაფილი რე
ჭარუას იბჭყანქ დო ირფელ მაკანკალჷ. მუდგა რენ არზიქ გომირჩქინდჷ ჩქიმ გაღაშ ინოხ დო ვა მოსვანჯუანს ასე. ქარღადშა გინობუნას, ქარღადშა გეწუმას მიოცადჷ ზიტყვეფი დო მა ვა მიღჷ თინეფიშ აკოჭოფუაშ დუდი. მუ რე თენა? ახალი დო კოჩის ვა მოხვალამუნ ფერი, მუთუნ ვარი! მუს ჭარუნქ, უჭარუს დო მუ გოკო თქუენ, მუშ მეღალა გოკო მაკითხირალშა, ათენა რე თარი, ვარა ჭარუათ მუ დუგოკორდჷ ვარდენცალო, ჭარუას დიგურუანქ ხოლო უჯგუშო და ვარა... უთქუალ დო ურაგადუს მუთას ბჭარუნქ იშენით, ვორწყექინ.
მუთ უმოს ბორჯი მიკმურსუნ, თით უმოსო ხვალახობას დო ირფელიშ აბსურდულობას ბგინაფულენქ კათაწკუმა. ირფელ პოტიკი რე მუსუთ კოჩი მიოცადუნ, ართ მუდგარენიშ მოხ დო თი ართ ხოლო კინ კოჩიშ გინატებელო რე კინ ათე რინას, ვეგნოზგირტას, ვარა დუდი ვა დიჸვილას მუშ ხეთინ დო ათაშ. (მოხვალამე ბრელშა თეშ ხოლო, ნამდა თი ართიქ ხოლო ვა მეხვარჷ კათას, მარა უმენტაშობაშ ამბე მაფჷ მა). მუ რე თი ართინ, თინა ვიშო-ვიშო ქობძირათ, თუდო, ჭიი-ჭიეთ გეკლარჩქინდუ.
კოჩი ირო მუშ ასა-გასაშ რძღაფას მიოცადჷ. კუჩხი გეუზგირტუ დო ქოდანთხუნ, ეკლესიაშა მეუღჷ უკულ დუდი ქირსეანი ქორე-და, ვარ-და მეჩეთშა, მუსულმან ქორე-და, ვარ-და სინაგოგაშა, ურია ქორენ-და... დო ათაშ, ღორონთიშ რწუმათ ოზალჷ ჭუაშ გორკება, რწუმაშ დო ხვამეფიშ ჰიპნოზურ ნძალათ დუდს ირთუანს დო მიოჩქჷ - აჸ, ღორონთი დობგორია, ღორონთი ხოლო ჩქიმწკუმა რენია. მითინწკუმა ვა რექ სი დო ვართ მითინ რე სქანწკუმა. ირფელ სქან ფანტაზიაშ ნაჸოფი რე დო შხვა მუთუნ ვარი. მუშო ოკო რაგადი, ასე თეს კითხულენქინ, ზისხირ ჸვაშა მუგანჯირუ, ათეისტის დო ურწუმეს, დინაფილ შურს მიძახუქ, მარა მა მუთას მონარღჷ თენა. გახორცქი გურს მუზმა გოკონ, ხვალე რექ თე ორთას დო ხვალე ურქ თე ორთაშე ხოლო. მიდგა იჸინ, თისით ქოთქუანს, რინაშე აჭიროთაფილ დო გურელაფირ კოჩი რენია თეშ მაჭარალი დო თიშენ ჭარუნსია ათაშ. ვართ ჩირთუ თინა, თაშ რე ქოთ. ედომუშამო ჩქიმ რინაშ წანეფიშ გოძვენას, ირო თი „ართი“-შ დო „თარი“-შ გორუას მეფთხოზუქ შური დო გურით. მა ხომ ჩქიმ დუდშო დასურო ვა მოკო ფური, მარა თი თარი, მუსუთ რინაშ არზი, ღორონთი, შურიშ წკონდალაშო ჭვამაკი დო ხანდა, უკულ "მელე" სამონთხეშ ხიბაშ გონჯამაშო ფირქეფით გურიშ კარკაცი ჯოხონ, ირფელ სქან მუნაგონი რე დო დუდიშ ღორება. გაჭჷ ასე თეშ მორჩქილაფა დო ალბეთ მიოტენქ კითხირსით, მარა მა იშენით ვაგინძორენქ ჭარუას თინეფშო, მით ათაშ არგამათ ვა გოუსვანს ირფელს ღოზის დო დოგმეფით ტვინგიმოხაკილეფი ვა რენან. ჩქიმ არზეფიშ უნტყუანობას, ვართ თენერ კათას ვოპიჯუქ, ვართ მა მიჩქჷ ჩე დო უჩა მუ რე თე ქიანასინ. მითინს ქოუჩქუნო შურო? თინა, მით გირაგადჷ, ამარ რე სინთე, ამარ რე უჩილათუობა დო თახმიან, ვარ-და ემერიან, თინას დიო დუდი აფჷ ღორებული დო ასე სი გაღორენს. აბა მა მუ მიჩქჷ, კინ ჩქიმჯგურა ზისხირი, ჩქიმჯგურა ხორცი, ჩქიმჯგურა გური დო გინაფეფი უღუნ ფერი კოჩიქ, ღორონთი ძირჷ დასურო დო ვარინ. აკა თე ღორონთი მა მუშენ ვა ბძირი დღას? დუდშეშე მოკო გიწუათინ, ნამდა ათეისტი ვა ვორექ, ათეისტი ხომ თინა რე, მით ივარანს ღორონთიშ სქილადასინ დო მა ის ვებვარანქ, უბრალეთ ვართ დუმადასურებე თიშ სქილადა, მა მებგორუნქ რინას ირფელს დო ირფელს კილ-კილშა გიშმაფსხუნუნქ, ირფელ მოკო იბგინე დო ჩქიმ შურით დიბგურუენ. სი ქიჩინი-და, მა ნება ვა მიღუნო ასე თენა ირფელი გითიბკითხე დო ირფელ გითობგორენ, ბლურდასო დო თეშ იბრწუმაო? მა სქან ნარაგადი დო სქანი ნაჭარა, თით უმოსო ოშიშა გიშათინილი დო გინოკეთებულ ტექსტეფი ვა დუმაჯერებე ჸვერეთ. მა ვორდი ეკლესიას, თელ ჩქიმ რსხულით დინიმნწყვი რწუმას, ეკლესიურო რინას დო ვა გიფულუნთ, შურიელ ეფურინს ბგინაფულენდი, ქო. ინა ვარი, თინერი ხიოლეფი გილაპუნდუ გურით, მოშქურუდჷ ქოთ ხიოლიშ გეშა ვა გომიხორცქას თიქ მაქ დო. უკულ გორჩქინდჷ კითხირეფქ დო თე კითხირეფიშ გამაშ გორუა ქოდიბჭყინ, პაპეფს, მორდება თქვანწკუმა დო, ბუდი-ბუდიქ გეუოლეს. სივა, ასევა რწუმა გიღუდასია, აბორჯებულ რექია, გაღა დიწკონდარია დო ირფელიშ გამას მუშ ბორჯის ქოძირუნქია. სი ხვამელი, ისხანშა, თე ჩქიმ გაღას დო ჩქიმ „მა“-ს, თიშ ნანდულობა ვა უჩქჷ, მუდგაშ ოკო ირწუმასინ, თე შვანს მუჭო? თი ჩქიმ რწუმაშ დო შურიელ ექსტაზიშ უკული, მა თი დუნასქვი გიშებღი თე რელიგიეფშე დო რწუმეფშე, ნამდა თარი რე დასურო ქორწანდას, თარი რე თელ სქან შური დო გურით ქორჯერდას, ფთქუათინ, ათე სხულიშ ჯა რე ღორონთინ დო თიშ წოხოლე ხვამას ქოდიჭყანქინ, სი თიმწკუმა ხოლო ძირუნქ სანწოულობეფს, თიმწკუმა ხოლო გაფშაფუდას იჸი გური ხიოლით. ხვალე, ჸვერეთ დო კითხირეფიშ უმშო რწანდას ოკო. მუჭო გამაშ გორუას ქოდიჭყა დო ირფელ ფუჩხაცალო აკოიცენს. თქვა მუჭო მიგოჩქუნა, ჯვეშ კოლხეფს, ჭყონი, ბჟა დო თუთა ღორონთეფო მიოჩქუდესინ, თინეფი ვარდესო ბედინერეფი, თინეფი ვარწყედესო სანწოულობეფს, სქილიდაფეფს ლეხიშ დო თაშ? შელორსუა მუ რდჷ აბა შხვა მეტი? ამდღა ხოლო მუშენ უღჷ შელორსას ნძალა? მუშენ ვა ღურუ თი კოჩი, მისით შხამარამ გვერი აჩამუ დო ჩქიმ დადი შეულორსენსინ? მეჭეჭი მუშენ დინუ ხეს ხვალე შელორსათ? გვალო ჯგირო ორწყედეს თი ჯვეშეფი ხოლო თე სანწოულობეფს დო თენა ზოგადო რწუმაშ ნძალა რე, რწუმაშ ბუნება რე თენერი. კოჩის სანწოულიშ ქიმინუა შეულებუნ, ინა იშ გურშენ ვარე, გოსინთორაფილიე შურიელო, ღორონთ ძირჷ დო ასე ხოლო თიქ ოქიმინაფუ თე თოისერი თისიან, ვარინ კოჩიშ გაღას, ბრელ ვარჯიშუეფიშ, იოგაშ, დუდიშ წვართუაშო ქვერსემ ჭვამაკუათ, ხვამეფით, შელორსეფით დო თაშ, შეულებჷ ფურინასინ თინა ხოლო, მარა აქ ღორონთი მუთუნ შქას ვა რე. ათეცალ თოისერეფიშ ქიმინუათ, მიმაჯინე კათას ქაბლაცალო ეკიჸუნუანა უკულ გურუეფი, აშრამეფი აფუნა გონწყუმილი ვიშო-ვიშონ დო მილიონობათ კოჩის ტვინს გიმუხაკუნან. მუზმა რცუ-გურუ რე, დუდშე ბოლოშა აფერისტი დო გითოღალირი, სქვამ ზიტყვეფით დო ზიტყვეფიშ ვერწემ მაგიურობაშ გიმორინაფათ, კათას დუდს ათმუბორჯენა დო მილიონეფს შიბულენა, ხორციელ ჩხონაფას გეთხოზუნა. ავრე, თინეფიშ ლექცია ქომირჩქილეკონ, ჟიროში დო ოთხოში დოლარეფი იგე ოკო. სი ათენერი ღორონთშა მენჭაფილ კოჩი ქორექ-და, ათე საცოდალ კათას ხოლო ფარას მუს გიწმოტყურუ, ქოქიმინი თეში, ნამდა ფარაშ გაფა უციო ვარდასინ დო მიდგას ოკონ, თიქ მუშ კორინშა დოიდვას, მუზმა მუს უსხუნდასინ. ეფშა რე ამდღა გვალო გურუეფით, მინეფქით ტექნოლოგიურ გოვითარაფაშ კონკას მეჭირინაფილ, მარა შურიელ რინას დო ადამიერულ, გურიწყულ ხიოლეფს მორკებულ ამერიკალეფიშ დო ევროპალეფიშ ტვინი გიმოხაკეს დო გიმოხაკუნა ანწ ხოლონ. მოდათ გინირთჷ ამდღა ბჟაეიოლიშ შურიელ რინაქ, იოგაქ, მედიტაციაქ, გურუეფიშ გაღორონთებაქ, აშრამეფს მილარინაქ... გაფულენა დო გაფულენა ცოდა ბჟადალარეფი ფარას დო ჸიდულენს ი გურუ უკული მოტოციკლის, ვერტ-ფურინჯის, მერსედესიშ ეკონია მოდელს დო თაშ... მუსუთ თე გურუეფი იჩიებუნან, გლახა მუთუნ ვა რე, ბრელ მუთუნ სქვამი რე დო არიკული, ფანტასტიური, მარა მუდგას იჩიებუნან თის, მუნეფი ვართუნან, მუჭო გოკო თინეფს ეკაჸუნენ? მუშ გურშენ იბდი მა ეკლესიაშე? მუშ გურშენ დევეთხი ირნერი რელიგიას დო ენიმნწყვი ჩქიმ დუდს? სოთინ მუთუნნერ გამა ვა გაგორე თე რინას კოჩის, სო რე ღორონთი, ქორენო ღორონთი, ქომოფხვადუქო სამონთხეს, მი ვორექ, მუ ვორექ... პოტიკი რე თენა ირფელი სქან გალე. ბუდიზმის არძაშ უმოს პატის თიშენ ვარზენქ ხოლო, ნამდა ათეს იჩიებჷ, ვა რე თქვან დუდიშ გალე ბედინერება, ღორონთი დო ვართ მუთუნი, ირფელი თქვან დინახალე რენია... მარა რელიგიათ დო დოგმათ იშენ მუთუნ ვეგნიშქვე ოკო, მემჩქუნ. ცოდა რექ, რელიგიას ჸუნაფილ კოჩის მუდგარენ ხატეფი გოირჩქინდუ დო იჩოქი დო გილახოხი უკულ ბირგულეფით, ობი ჩილამურეფი დო იძახი, ღორონთშა გედვალირი ჯოხოეფი, დიდ რექშო სი. ვაიძირჷ, ვა გიგინაფჷ დო ამახექ ცას. სქან შურიშ თოლეფით ძირაფაშ ამბეს ვორექ დო ვართ ხოლო იშენ-შენი ფიზიკურ თოლეფით ძირე ღორონთინ. ღორონთი მუნერ რე დო სო რენ თიშ ენწყუმას ქოდიჭყანს კოჩინ, თინა უკმელა სენას, უჩა კატუს მეგორუნს დო თენა თიმწკუმა, მუჟამცით თი კატუ, თექ შურო ვა მილახენ. ჩქიმ არზით, კოჩიშ ტვინი ვა რე თეშ მონწყილი, ნამდა თიშ მადიდა მიდგარენ, მისით ჯოხო ქიანაშ გუმარჩქინე ღორონთინ, გეგასინ, დიგურუასინ დო თის დინანჭასინ, ათე რინას, ათე ფორმათ, ათე ასა-გასათ ვარა თაშ რე იშენით. უკულ, ვიშო, მის უჩქჷ მუ, მუჭო იჸინ. კანკალეშა თის ხოლო ვუჩანქ გურს, ეგება-და თე ცოდას მუსუთ ვუძახუთუნ, თენა ხოლო პოტიკი რე ირფელი-და მაქ. ეგება-და, დახე ოში კოჩიშ მაჸვილარ „ბრეივიკი“ რექო, დო ვარ მილიონობათ ეკმაჸვენჯეფი უჸუნსუნ ეფერ ქირსენ, სონდარო ათე დიადიხას სქან კუჩხეფით გილურქინ, მუთუნს, მუთუნნერ შანულობა ვა უღუდას, ეგება-და, ცოდა დო მარდი მუთუნ ვარდას ღურაშ უკულ დო თაქ, ათე რინას იკოროცხუდას ირფელ თენა თაშ. აბა თე ხვამელ ღორონთქ, თი სუმ თუთერ ბაღანა მუშენ ვეგნატუ ავარიას, ღურაშე, ბჟა ვაფუდჷ დიო პიჯის მუნოსქირაფილინ? მუშ ცოდამი მუმაშ ბრალი რდჷ ირფელი ვარო, შუმილო გეხედჷ მანქანასინ? აბა ჯგირს ორთ ამდღა დო ამსერ ი კოჩი დო იშენ ფური აღოლენ, თიმწკუმა სო რე თი ღორონთი? ხვალე ფურიშ ძირაფა შეულებჷ დო „გაჭირებულს გეუნჭირიაქ“ მოხვადასო ოკო? მა ვა მიჩქჷ, ბრელს ბორდიშო დო ბადალო მაძირე მუსუთ ბჭარუნქუნ, მარა მორთი, ჭე ხანს ჰიპნოზიშე გიშებლათ დო გურიშ თოლეფით ქოდევეკვირათ ირფელს, გიშებლათ ირნერ რწუმა დო რიტუალეფიშ ქიმინუაშე დო კურცხე თოლეფით ქოვუჯინათ და ირფელს, ქორენო თახმი, ნანდული მუდგაშ ბწანან? სოლე მიჩქუნა თაშიენ? კათა, ვა უჩქუნ ფერ ღორონთიშ გურშენ მილიონეფს ჸვილუნდჷ შქა ოშწანურეფშე მოჸუნაფილ დო ხოლო უმოს ჯვეშოთ. ამდღათ თეცალ ამბე მიღუნა მინ აკანეფს. ვარ ჩქიმი, ვარ ჩქიმი ღორონთი რე ნანდული დო ეთინა ირწუმი, ვარ-და ყორყელს გეგკლარჭკირუნქია დო ორთჷ ქოთ თეს, ვა დაჸუნუქუნ. დუდს ლაფი მინუვობი მა სქანი რწუმას დო სქან ღორონთს, მიდგას კათაშ ზისხირი ჸუმენს დო სი ტვინს ვაგმოინწყუნს ათაშ ვაქიმინენ თიშონ. ხე, ვარა ჯანჷ ასე სქან მუნაგონ „ღორონთი“ სოდგა რენ დო გურგოსქანჩილო მიოჯინე კათაშ კილაბუნაფას, ბაღანეფიშა ყორყელიშ გითოჭკირუას დო კათაშ რხუალას ავტომატეფით... მის მუშო ოკო თეცალ ღორონთი? ხოლო ართშა იმაბჟირანქ, ღორონთი ვარსებენს დო ირფელიშ გუმარჩქინე ღორონთი სოთინ ვა რე დო დიბჭყოლიდუათიან, თეს ვებჩიებუქ, პიჯიქილე, მა ბწანს მუდგარენ ქვერსემიშ, მუდგარენ უზომე ნძალაშ დო კანონზომიერალაშ, ვერწემი ღორონთიშ დო მიმოჩქჷ, ნამდა თე ღორონთეფი ჩქი ვორეთ, ჩქინ შურდგუმათ, ჩქინ ჸოროფათ, ჩქინ ალარინათ, ჩქინ ხუჯიშ მეჩამათ ართიანშა, ჭუაშ მოქექაფათ, პატიებათ, გურიშ მეჩამათ, შურიშ მეჩამათ, შხვაშ თურიშ დო ჩქინდე გინორთელიშ შურ დო გურით ეჭოფუათ, კოჩეფშე ჩილიშ დო ოსურკოჩეფიშ მუნეფიშ მანგო მერჩქინათ, უჩატყებამიშ დო ვარ შხვა ფერ ტყებამიშ ართიანშე უგშურთუობათ დო ათაშ ჸოროფა-ჸოროფათ ღურადღაშა ართიანიშ მენთირუათ, მეღალათ, მეჸონაფათ, მუჭო გისხუნუნან. ათენა რე თი „ართი“, ნამუთ ჟი ფშინენ. ამდღა თენა რე ჩქინ რინა, ამდღა თაქ ვორეთ, შურდგუმა დოჭყაფილი რე დო მეურს ირიათო ბორჯიშ ეკრანს. „მელე“ მუ იჸი დო მუ ვარინ, ის იშენით ბძირუნთ უკული, მოკონა დო ვარინ...