შურიშლაფა
სქანჷ სისმარეფსუ გულუღუქ, ნანა,
უჩათ გონწერილჷ მარცხას ფშუქ მა სი,
მორო ქეკვალი ირნერი ჭყანა,
უქვინჯე ცას დო ღვინიშჷ შუმასი.
ნანა, ქონებამჷ ცირა მოძირეს,
თიშჷ მაჯანგარა _ ინგირს ვარჩხუნი,
ნანა, ქომიწი მუ ბჟა მოწინე,
შური ოშნერო მიკმაკვარჩხუნი?!
მუშენ ვემნტირექ შუბარზამჷ ხორცის,
ღვინშე ჩქიმცალო ბრელი დინაფე,
მუმაშჷ საფულე ევრე ქოგჷ წონწის,
ავრე აფთიაქჷ გოწკვირინაფე.
ჸათე კვარჩხჷ რინას მუს ევალექუ,
თიცალჷ ლანდღვა დო თიცალჷ ტომბა რე,
დიო გობძვალეს მორიალეფქუ,
უკულჷ ქომრთინუ ქიანაქ ოფარე.
სქანჷ სისმარეფსუ გულუღუქ, ნანა,
მაფაშე ჭყელი, ზღვარზღვილ-შოლირი,
ჟინცას ზისხირელჷ თოლით ნარჩქვანა _
ვოძუქ ლურიშე გიშათოლირი.
ვუჯინექ მინშა პოპორელჷ ინგირს,
მუჟამს სოვრეთინჷ ვეპალუ მორსხა,
მუჟამ შურჷ ჸურანს დო ართო ინკირს,
მუჟამს კუჩხეფსუ ეთმორღვუ ნორცხვა.
სქანჷ სისმარეფსუ გილუღუქ, ნანა,
უჩათ გონწერილჷ მარცხას ფშუქ მა სი,
მორო ქეკვალი ირნერი ჭყანა,
უქვინჯე ცას დო ღვნიშჷ შუმასი.