შურიშხაში (საბატონიში) სონეტი
საბატონ დღას გაუსინჯი კინე ართიშა,
დაბა, მუნერქი გიშაირთუ ათე მარაქი,
სით ვაგანტინუ, იშენ ძირუნქ თეშ წორც, ვარა კინ
აშო მალული, ვარა იშო ულ მაჟირაშა.
შხვასით კითხი, მიოდირთე ჸეთი კოცი მასუმაშა,
მუ რენია, მუ გიწისი, თოლწკურელო არაგვინი,
გირაგადუქ, კინე ვენდა, თავრე ვორწყექ, ვარე თინი,
ვარა ქოთქვი, მუს თქუანა, ვაგამართდა მაანთხაშა.
ქარბორიას მიდაჸუნუ უკახალენ თი წანემქი,
ათე რინაშ ჩილამურქი, ჰამო ჸოფაშ წამემქი,
ვემიჸიდირე დღასი ღურუ ნამთინ ფარათი
დო ვაიჩქ სოდე მუკოტყობუ, ნამუ ღანდასი,
მი სო ურცუნი კოც ვაუჩქ, ნამუ შარათი,
უჩქდასინ არზი ვაღვენუდუ ათე ხანდასი.