შურიშ კილოთი
- * *
მუკუვოხექ კომპიუტერს დო „ბადიდი დო ზუღაშ“ 90-იან წანეფიშ ეკრანიზაფას ვუჯინექ. ბორჯგიშაშქუმალირო გუთმობდინუქ, გობრჩქინდუქ, გუთმობდინუქ დო კინ მუკმობრჩქინდუქ.შური დინახალეშე, ბარბალიშ კამერაცალო მამბარუ დო ითამ სოდგარენ, ნამეტან ლიბუ რენია დო, ეფერო კილმემბარუ, სოფილ-ქენძილ ბუშთიშ ნოსქილედეფს, ჩქიჩქუ უკვე მავითაშა მბარუნდას დო ოპაშკინუანდას უკულინ. იმბარუ ჩქიმ გური ხოლო დო ზისხირს ჸორიშიაცალო კინ აშო უყურწუანს ჯერღვეფშე. კინ მუშე კილაშქუმალირს, შქა შარაშე, აშო ორთინუანს მუშა. ტვინიშ უჯრედეფი შქირენიშ გეშა ისხარსხალუნა. შურიშ ღალა ეფერო მიჭირს, მინშა თოლშა აწმომიდირთუ, სოდგარენ ტომბას დინმუვანთხუდე დო ირიათონო ბწკურუნდე ჩქიმ შურდგუმასინ. ასთმა ქომიღუდუნ, ვაფშჷ, დღას, მარა ენა მუდგარენ შხვა რე - რინაშ, სქილადაშ ასთმა მიღუდას ოკო, მემიჩქუნ. შურდგუმაშ შურიშ ღალა მოკო. ეფერ ხვალახეთ ბგინაფულენქ დუდს, ღორონთიშ გორჩქინელ აკა ადამიერი, ადამი ვეჸიდჷ მუშ ბორჯის. რსხულიშ ირ აკანს კაკილარცალო მაძგვიტუ სქილადაშ პოტიკალაშ ნინძგეფი. ითამ ეკლესიასტეშე ეშმებჭარუნდე ასე თენეფს ირფელს. ახალს მუთას ბრაგადანქ, მარა ჩქიმო რე ახალი. ასე გამწაშე ბგინაფულენქ თეს ირფელს ჩქიმ შურიშ ინოხ დო ვორწყექ ჩქიმ სქილადაშ უმოღეობას. შარა სოლეთინ ვა რჩქჷ, ვა მიჩქჷ სოლე მევურქ დო სო ვორექ გეჩემებულინ. ვა მიჩქჷ, ადამიერიშ როლს ბლაჸაფენქ ნამდგარენ ფილმის დო ვარ თენა მა ვორექ დასურო, ჩქიმ ხე დო კუჩხით. ჩქიმ ასა-გასაშ დინახალეიან კლაუსტროფობია მონძალჷ. გალე მოკო გიმულა თიშე. შურიშ ღალა მიჭირს. იბშქვიდუქ. ჩილამურეფ მუმაღვარღვალჷ თოლეფშე, ტყობაშე. მი ვორექ? სო ვორექ? მუ ბქიმინა დო სოლე იბდა?! ა, ჩქიმ კითხირი, ჩქიმ დუდიშ მეხჷ, ნამუთ მა ამდღა დო ამსერ მიკილოთუანსინ. ითამ ახალ ბთქვიკო მუდგარენ ვარო, კოჩიშო? მიჩქჷ, ჯვეში რე ირფელ დო ბრელს უგინაფჷ თენეფი, მარა მუ ბქიმინა ასე მა, ვარი დო ვა გობხორცქი, ვარი დო ვა გიშმართინ თე ჭიროთიშენ. ნიტე, მუსხი ხანს გუმარზინე თენერ ჭუაშა. ჩქიმ ხეთ, თე ირფელიშ გეშქირატუაშა მოშქურჷ, იშ ოჭიშ ვა მიღჷ დო ვართ მიმოჩქჷ მუთუნო თაშ ბქიმინენ. შხვა შარა სო რე? მუჭო უჯგჷ თენერ ბორჯის? გიმაწურაფალ დო ეკმაჯიკაფალ მითინ ვა მაპალუ გოხოლუს. ფანიაშ ოჸოროფულეფშა მუთუნ ვა მაჩიებინე, მუთუნს ვა მიგენა, მუთუნ ვარჩქილენა ჩქიმი, ითამ გივორედე დო ჩინურო იბჩიებუდენ. მირაგადუნა - ქომიოტე ბორულეფიშ ჩიება, გვალო ვა გებორა!
ღუმა, ნორჩალს, ხვალე მითობრაგადანდი. გინოლასუაშა აკაბუცხა მემიძუდჷ. - იი, იია ბაბა, მოკაიფუნო -მაქ, - ქომივორაგადე ჩქიმო. ჩქიმ ჯიმაქ, ნამუსუთ ღვინიშ შური ეკაფურკანდჷ ნოჸორშენ, გაგიშაკურცხჷ, თეშ რაგადის გეუხედუკონ თეშ დო მი გოკაიფუნია ძიე-ვა დო ქოგიმაძიცუ. გიბჸინი. ონჯღორეშენიო? (მა ღორონთიშ ამბე მაფუდჷ, ღორონთი მოკაიფუნო - მაქ). მარა ენა ჩქიმ გვერდო შუმილ ჯიმას ვარი, ხერძელ კოჩის ვა გაგინედჷ, ინა ხოლო ტომბა ლურშე გიშაკურცხინაფილს შქა სერს ვარი, დღაშ ნამუდგა გოკონ ბორჯისით...
- * *
ოჭმარეს გელათანდუ დო ბჟა კარკაცით მუშ ჩხორიეფს ქიგნოისვანსინ, მუ გურქ ოკო რღოლუას, ხიოლიშ გეშა ველეძიცუე დო ქიანაშ დამარგებუ ღორონთს მარდი ვეგნუგე თეს ირფელს მუგოჭიშუნ... ხომ ქოშილებედჷ წკურუმია უკუმელას ქინოსქილადედიკო ირიათონონ? ვარ, მუს ჯოხო, ორთა ვალგედვალირ რე თიშო იფირქას, სი მუჭო გიშაირსხას ღურუშ ხეშენ, თიშენ ნამდა მარდუ რექ, ვარ-და ახალნორდი... მარა, მუზმა ახალს გეწკურუ თოლეფი? მინს გურქ ქოურთინუ ოჭიში, მინს მუდგარენ უსქილადუქ გოურჩქინდჷ დო თექ ქომითიტუ მუშ უჯგუშ შური, სოდეთ გოღვიღვინაფილ ნორჩალს მიარე ღანკეფიშე ფირქით მითინჯირუნ... ჩქი, რინა მუდგარენ შხვათ მიმოჩქუნა, გურს შურო ვა ვუჩანთ თის, ნამდა რინა უკვე დოჭყაფილი რენ. გეთუ, ქუმორთინ, ასე სი უკვე რინაშ შარეფს გეჸუნქ. ათე ჩქინ ჭუეფი, ჩქინ ხიოლეფ, ჩქინ გურიშ მოულეფი, ჩქინ ჸოროფა, ჩქინ ჯოგინი, ჩქინ მენჯარიშობა, ჩქინ
ჩეჟიერალა, ბედინერალა, ჯაბი... თენა ირფელ რინა რე უკვე. ჩქი თის ფირფქენთ, ნამდა ჭე მეტ ფარა ქომჩანინ, უჯგუშო იპითუნ, ვარინ თე ხვამელ ორთას მუშ კანონზომიერალა უღჷ, ირფელს აბალანსენს დო მუშ მანგის უგორუნს. მეტ გიღუნ, მეტ გოკო უკულ სი ხოლო დო ეთექ გიღჷ კინ ეთი ჯაბი დო გურჭუა, მუნერით უკულაშ გიკინდუდუნ თიმწკუმა გიღუდუნ. ინა ვარ, შილებე ხოლო უფურაშობას ქენოლენ. მუთუნ ვა უღჷ დო ვაპალუნ ი კოჩი ვა დეჯერს ეს- ქომუჩი მა სი ჭე დოსართე დო გოძირანქ ვა გიმიბრინე დო ბედინერქ ვეპია-და, თქუანს. ვარინ, მიძირჷ მა ენერეფი, ქაშის ჭე მუდგარენ კვარზალქ დო დუდშა გეუოლეს, გვალო გაჭყორდეს აიშა მუთუნ ვაპალუდესინ იქ დო ოშქაშეთ ღვალიერეფო გინირთესინ, ასე მილიონერობა ქომიკორინეს. ეთექ მედინჷ თინეფქ, ქინანთხეს დო გვალო დუდშე უღუდესინ, თინაქ ხოლო გაგწენტეს ხეშე... თელარას შხვადო მებგორუნთ, ვარინ სი რექ თელარა, მა, თინა, სი ჸუჩა მესურებუქუნ, მაჸალეეფწკუმა ართო იფშაყარუთუნ, ჸვანას ფხაჩქუნთუნ, გიმიბჩანთინ, ტყურას ვაღორენთ ართიანსინ, ჯგირობუას ფთასუნთინ... ათენა ირფელ უკვე თელარა რე დო ღურადღაშახ ათაშ მეურს ირფელ... კოჩი მუთუნით ვეგიკვირებე, თით უმოსო ამდღანერ დღას... კუნტას, ათეს ირფელს გუთმოფხვადუქ, ბგინაფულე ჩქიმ რსხულიშ ირ ნორთით თეს დო ქიდიბჭყი რინაშა ძივთიშ მუნოდვალა, მარდიშ გიმოხანტუა ორთაშ მეხჷ დო ჩქიმ შურიშ ჩხორიეფით ეფშაფაშ კარს ქოგებდირთი... მარა მუ რენ გიჩქუნანო, ითამ თე ორთა გამორსას გინწყუნსია დო დუგორაგუანს მინშა, ოჭიშით ქაშგოფორჩანს დიხას, გიოჸვილაფარ ხოჯიკიაცალო, ტომბა შურით ვა ქიმინ ირფელი დო ცანცალა, კუნტა ჭკუაშ ქორექ-და. ათექ მაღოლჷ მა ამჭუან, მუჟამცით გეგშაბკურცხი დო იაპონარეფით დოჭყაფილ, მილიონობათ კათაენნაძიცინა ბჟაქ მინმოდირთჷ ნორჩალს დუდსუნ დო ჰამოკათაფილ გურიშ ფირქეფით ფხვამე თე რინა, თე ორთა, მარდი გინუგი ირიშგუმარჩქინეს, მით პუნს დო მუთ მიღუნ თიშენ, ირნერ გოღანერ ჩილათა ქოვაპატი ჩქიმ დუდს დო გებდირთი ღორონთიერ თინშურითინ, ათე ირფელიშ უკული. გიჩქუნანო მუქ მაღოლუნ? - გვალო აკაბუცხაშ გურშენ თეშ ქომიკუვაბუნი ჩქიმ ოჸოროფულ ადამიერს, თინერ ზიტყვეფი ეკიფშკვი პიჯიშე, ნამდა ირნერ ხვამას დო
მარდიშ გაფას ძივთიქ მეუდინ იშო... დო თენა თინერ ტომბას იბგინი, ნამდა გურქ დომიღურჷ. ალებლი წყურგილეშა დო ხუუთ ებუნილ თექიან წყარ, ჩილამურხოლაფირო თეიშახ ფშვი, სონდარო ვაგოფხორცქ დახენ... მა კინ ქოდუვანთხი, მარა მიჩქჷ, მუთუნით ვენიმნჯირუქ თე ლეტას, გამუწობდირთუქ დო გუვაგინძორენქ ჩქიმ დუდიშ ხალიწუას დო რდუალას თეშ, ჩქიმ დადის უჩქჷ მუშ ჭოიეფიშ ხეშა გედიარაფან, მარა ჩქიმ ორდალ ასე ღუმუს მესიროტილ ხაშილ
ჭუჭელე ვეჸინ, ვარინ ჩქიმ მოთვენაშ ანჯაშ გიშათოლუაშო ჭვამაკი, პატიებაშ შელებაშ ღვენაშო ფირქი დო ხანდა, ირფელშა გურიშ ეუუჸუნაფუობაშ დოგურაფა დო დანდება კათაშ, ჸოროფა დო ჯგირიშ ზალება არძოშო... მიჩქჷ, თენა გემორძგვენს იშენ, მუ ამდღა, მუ ჭუმე ჩქიმ ინოხ დო ათეს რე მა არზიან რინას დო შურიშ ბედინერალათ ბჩინებულენქინ...
- * *
დუდპეკალა ჸვილუნს! იახა, ჸვილუნს დო ინა ხოლო მუჭო! ჭიი-ჭიეთ იხუაფუქ თიშ გეშა, კვირკვის გერთაფილ ბაწარიაშორო დო დუთმოსქიდუქ უკულ ხვალე ჸვილი დო ტყები. ნერვეფშა გეიხე ირფელ დო გურ დო ჩხონჩხი გაჩოლუ, რინაშ დღალეფს გიკოლენს, ირფელიშ ეღების მიდმაიღანს დო გილურქ თელო ღურელი. მუშო ოკო რაგადი, ახალს მუთას ბრაგადანქ, ბიბლიას წკანტილო რე ენწყუმილ (დო ვართ ხვალე ბიბლიას), მუ გავალიშ მოღალა შეულებჷ დუდპეკობას ადამიერშონ, მარა ირფელს სქან ხე დო ბირგულით, სქან შურ დო გურით ქიგინანქინ, ის მუთუნ ნაკითხერ ველაზიმუ. ვარინ, „ჯორშე გიმულა“ დო გენტირინაფა ეფერო მიჭირა, ითამ მუთუნ ქვერსემ არხამაშე მიხვადუდან ვარიაშ რაგადინ... ირფელიშ უფურაში იშენი თინა რე, მუჟამცჷთ სი სქან დუდპეკობას მილასუნქ, გიორჯგინანქ სქან დუდს დო ხეს მიდეღა გიწაღალუშან, მარა მაჟირა განშე რენ ინა ვეიჭოფუნს ეს, ქაგოტენს ხეს აჸინილო დო სი დუდიშ მაჸვილაფუს ქოგეიტენს თექ... ვარინ, ევრე მუ ხოლო გლახათ გინაფულენს დუდს, ინგარს, ჩილამურს მიშახე სქანცალო, მარა ის მუშ ხასიათი ვარზენს თიშ კვარზალს, გედირთას დო დიჭყოლიდუას წყინინ, ქუმორთას სქანდა დო ქუგახუტოლასინ... მი დოსქიდუ თეთ თაქ წაგებული? მი ვემიგენს, ირ კოჩქ ჩქინ დუდპეკალას გივორჯგინათინ? გედირთი დო გეგნაჯუნი სქან მაჸალეს, მოჯგირეს დო პრობლემათ გინოჭკირილი რე. მარა ვარ, ენაშა მისხუნუნა ზოხო-ზოხო ვორდათ დო ჩილამურეფს ვუთქვარშალუათინ. ეშობას მიდართჷ ბორჯიქ, ბორჯიქ ნამუსუთ ვართ გური უღჷ დო ვართ თოლი ალარსხჷ სოლეთინ, სოთინ ვა რე დო ქოთ ირ დიხას რენ, ბორჯიქ, ნამუსუთ ბრელ ჩქინჯგურა დუდპეკშა ეკუჯინუ დო ეკაჯინე ანწ ხოლონ...
- * *
მუშ მანწარა რე, მუჟამც გიჩქუ, მუ რჸვილუნს დო მუ მუთმორლასუნსინ, მარა სი იშენ ორჩანშორო კინ თის იმაჟირანქ ირო. კითხულენქ შურიშ ემაკინალ სტატიეფს, მუჭო ოკო გინოლახე შურიელ ჭიროთინ, მუჭო ოკო გურზე ცუნამშორო მონძალაფირ ეგზისტენციურ ფირქეფს, მარა მუთუნიშ მოღე ენა ვა რე სქანო. ხექ დო ვა რექ. ჰო, ხექ, გერექ, გილურქ, მარა იშენ ვა რექ. ჭე ხანით ვარ, შურო ვა რექ! ითამ სქან მიკულირ შურდგუმა აფუდას დინოჭარილ მიდგას რენ დისკიშა დო სი ეკრანს რჩქუდე ნულეფიშ დო ართიანეფიშ უშურგურე კომპიუტერულ კომბინაციაშ ჭყოლოფათინ... თე ასა-გასა ხვალე ჭუაშ გილანთირალო მიღუდას ოკო, ვორწყექინ. კოჩიშ სქუა ვა მიწონებჷ, მიწკუმათ გურგონწყუმილო, ბოლოშა მაჩიებენ დო მუთუნ მახვარებენა ჩქიმდან. დო გიჩქუნანო მუშენინ? იშ გურშენ ვარ, მა ვა ვუჸორთ დო ვა ვანწალუაფუთინ, ვარინ თიშენ ნამდა მუთუნ ვეგშეღინე ჩქიმ ნარაგადშე, სქირი ემოციეფიშ მოხ დო თენა თიშენ ნამდა უკმაკური რე ირფელ ჩქიმ გუმოთქუალირ არზეფს, თინერ უკმაკურ, ნამდა კინ მა ვა მიჩქ მუ მოკონ. ენერ შვანს მიქ მიგეხვარას? ქეჩიებუქ თე ჭუეფშე უჯგუშ მაჸალეს დო გიჯინე ჩხომიშ აჸინილ თოლეფით, ვა უჩქ მუ გამა მერჩასუნ დო მუ ქიმინას? მუზმაშა მაფჷ ჩქიმ გურშე ირფელ ინი დინოხვილირი ეშნახეკა აშო დო აწნადველ თინეფშა, მარა უფურაშიქ იჸუ ექ- უკულ ონჯღორე პილუნდჷ. მა იშენ თეშ ქოდობსქიდი დო თეს თიქით ქოგიაძინჷ, ნამდა ასე თენეფ ფირქენა მა მუნერ გინოზგილატირ ვორექინ. გაძიცინენა უკულ, ვარა მუდგა იჸინ დო მა ავრე, ე შვანო ჭუეფი უღუს სქუაფულ ხოჯიცალო მემინთირჷ... მა მუ ეთ? დიო დღას ვა მუკურთუმჷ, ონჯღორექ, ჩქიმ გურიშ ფირქეფიშ ეშაღალაქ დო შხვაშა აწოდვალაქ აშო ვეგემიძინჷ ჭუაშან... თიშ რაგადჲ მოკო, ნამდა პოტიკი რე თენა ირფელი. ვა რე კოჩიშ სქუა მითინ, მისით თეშე გიშარსხებექინ, კინ სი მუდგარენ მანქანეფით სქან დუდ ვეგშეჸონი-და. მა დიოდღარო მუთუნშა ვეგმაგორუ. ბძირათ და მუ, მუჭო იჸი ვიშო-ვიშონ დო ვარ-და, ართ შარა რე ხოლო მიკოჩუალირი, ეკონია ტყვიაცალო, ჭკორო ქენოლუ-და, თი შვანშო მიკიჩუანს კოჩინ თეშ. ირფელიშ უნწარაში რე, რინაშ ჭკორო გინირთუქინ...
- * *
კათაშა თოლიშ გოთინუა ვა შეილებუნ, გლახა დო უბადო შურიშ ადამიერობაშა მიმაწურაფალ რენია... მარა მა ხომ ქომიჩქ, გურშა მითინიშ ჯოგინ ვალამიძჷ დო მითინშო ფურ ვა მოკონჲ. პიჯიქილე, ირკოჩიშო ჯგირობუას დო წიმიულას იბზალანქ ხვალე. ქო, შილებე მომენტალურო გევაჸუნე ნერვეფს დო ფთქუე, დღას ვა მოკო თე ადამიერი მუთუნშო -მაქინ, მარა ეს გიჩქუნანო უკულ მუ მოჸუნსინ?- ჩილამურეფს იბრჩხუქ დო დუდს დიხაშა ენმიბნთხორანქ. აკა ადამიერი ვა რე თე დიხაუჩას, მით ბჯოგუნ. ასე, ადამიერს ვა მიოჭარათ ოღონც ვითოშობათ კოჩიშ მაჸვილარ დო გუმანწარაფალ პუტინი დო მილიონშა უფურაში მუშ შურიელ მუმა-
სტალინი... გიწინა, იშენ ადამიერ რენია ხომ. სი ხვამელი, ლილუ ჩქიჩქუეფშე მოჸუნაფილ, რჩინუეფით თებულ, მუდა ადამიშ სქი ჸვილეს დო მიდუღეს კათას შურდგუმაშ ნებან ფერ ადამიერეფი; მუჭო იბჸოროფუა? ენა შილებე ქირსექ შილებუასინ, მარა მა ხომ ქირსეშ კუჩხიშ ნაბონაშა ვა მიმართე. დუდს ვებჩიჩიენქ, უბრალეთ მა დასურო უჟინაშ შურიშ დო უნძალიერაშ ნებაშჸოფაშ მაღვენჯი ადამიერო ბკოროცხუნქ ქირსეს, მიქით თიშ მადიდა სიტომბას დინანჭჷ,
ნამუშათ მა დღას ვა მიმართინე, ენერქ დებადე ოკო. ცოდა რე მუსუთ ბრაგადანქინ ენა მორწუმეშ თოლს, მარა მუ ფქიმინა, მა თაშ მიმოჩქ დო. ქობჩირთუქ-და, კინ ქირსეშ მარდი მირსხენს, თქვა ვა გოფსარჯათ. ირო უდიდაშ დუნოშურიშ ღიაბი ალაბძჷ გურს, გილულჲ დო ეფერ გინა ალმორე, ჩქიმ შურდგუმა დო სქილადა ირ კოჩს ონუდას დო შურშურაიათ მითიბღე ოკო დუდი ხვალახობაშ კარეშან. ითამ ჟირ დო უმოს ადამიერ ვორდე ართ
რსხულიშ ინოხ... მიჩქ, მუთ ქიბჩინ, ირფელ ღოლამჷ შხვასით, ირფელს თეს მუშ ჯოხო გეძჷ ფსიქოლოგიას- კომპლექსეფი, გოჟირაფა დო მიჩქუნო ხოლო მუნ, მარა ჯარხანას გელაფირ თქვან უმოღე ენწყუმეფი, მა მუთას მოხვარ ენა...
2014 წანა