შხვადოშხვა (ზაალ ჯალაღონია)
სო იშაყარ თეზმა როუ,
ვარა თეზმა ქენჩეფი.
მუ რე გილერულენან
ქა გიროჩილ ერჯეფი.
ართ მეჯინათ კოჩეფი დო
შურით გვალო ღეჯეფი.
მოსახვარე ხოლო მუ რე,
გურც გებჯან შხუ მორა.
ქიმმაშქვენი თენეფც არძას
ქალეფც ქიგვოჩხუმორა.
შურით აკოტალიკერეფ
თუდო ათმოყვიანა.
გაღაინოჯღვალიკერეფც
მეუღ ბაბა ქიანა.
- (ზაალ დო გიგა)
- (ზაალ დო გიგა)
უშანქარე დირფა, გოშანქარელ სხულით,
ჸოროფიან სუფრა, ქვერსემ, ტომბა შურით.
წკონდა მარგალ კათა, მუშ ნინა დო თურით,
ჯგირით გიშნაგორა, ვართ სოლეთინ ფურით.
ირთუნდ ჯიმალობას გოდაჩხირელ გურით.
მუნაფა დო თიშე ახალ კილნაველ თუთა -
მასქილედ ოსური
მუშ ბაღანათ.
- აფორისტული
ჯასთაგანი ერჩქინდუნი, უმოღე რე ოგურუენ,
კოჩქჷ კოცჷ ვაგურუ-და - სი მუთ გოკო უგურუენ.
ათე რინა თეჯგურა რე, გოკონ თეშ დო თაშით თქუენ,
ჸუდეს ოსხირ ვათურენ-და, ჸუდე ირო ეკმართურენ.
ღეჯიშ სქუა ღეჯ იჸუაფ, მუ რე უკულ ჭიჭე თუ რენ.
ბორიაშ ხონარით გოქუნილი,
შოშეს მიწვორექ დო
ათე გერან ზოთონც
ტიბ ხვამას ეკმოიჭიშუა.
მაჭირხოლიშ ფსუალეფც
მიკობუდ ჩქიმ ბაღანობა.
ასე ხოლო თის მიკობ...
ჩქიმ დუც ქინვოსხაპი
თიშ მატომბაქ იჸუ,
ასე ეშულა მიჭირც.
ირფელ მუშ ბორჯის გეურე
დო ირფელც მუშ ბორჯი
ეთებუ.
ირიათონ მეშარე ქორექდა,
უგუთებუ რე სქან შარალუა დო
უგუწყანე რე სქანი ლერსი
ოწონდეშ იშო ხოლო
კალშქვითულო
გობუნაფილი.
თუთა ჭვათანც,
მურიცხი ჭვათანც.
ნჯილოცალო აშაბჯანუქ
ისიროტაშ ნარღის
დო მუდგარენიშ ეკოღვარაფი
მოკო...
ართ დღაშ ლერსი
მა დღას ვამიჭარუ
სანთელშორო
ნდღულაფირც.
მუთუნ ვაგონჭაფ ჩქიმ
ზალამეფც.
მიბში დო დუც იბჩუანდი.
მუზმა ვორდინ, თიზმა
მიბში
დო
ალმათირე ვამოკოდუ
ხვალე დუს იბთირანდი,
დო
გინოთირილეფც
ვოთირუდი.
ჩქიმ ღარტაკი გოშინეფქ
ქომუჩეს შარა
კოთაკონკაშა ეშებლიკონი.
ქუა ქუა რენი,
თინა ხოლო
ვეჭყაფუ დო ვეთებუ თექ,
სოდეთ გეძუნი.
ისიორ კუმა.
ჩქიმ აგაგა
ხვალე ჩქიმო ვარე...
ჩქიმ ნარზა,
ჩხორიაშ მუკნაჭკირა
ათე ხინჯის გინოფინ...
ფუცქინ მუმარჩქილე -
ზუღაშა მუნაფეფც ინულებუნა...
სინთეშ ნჭუაფათ განკიბრული
ართი ტყა,
ართი ოჭმარე...
ჩქიმ უჭარუ ლერსეფც
კუჩხუჩაფლე ვახოლუქ
დო თექ ხოლო ქიბკითხე:
სოლე მოულა თე ლერსეფი?!
ოწონდეს ინოხვილირ კოჩი
დიო მა ვამიძირუ დო
ლერსეფც მუ აჩერენს?!
აფორისტული
ჯასთაგანი ერჩქინდუნი, უმოღე რე ოგურუენ.
კოჩქჷ კოცჷ ვაგურუ-და, სი მუთ გოკო უგურუენ.
ათე რინა თეჯგურა რე, გოკონ თეშ დო თაშით თქუენ.
ჸუდეს ოსხირ ვათურენ-და, ჸუდე ირო ეკმართუ რენ.
ღეჯიშ სქუა ღეჯ იჸუაფ, მუ რე უკულ ჭიჭე თუ რენ.