ჩე გოთანა
გოუსქვამებუნა ქართიშ ვაგზალჲ.
მა მუთ ქოფშუნ თაშნე გოვარვალერჲ დღას ვა რდჷ.
ჩქიჩქობუაშე ქართის მითიპკილოთუქ დო ჯგირო ფშუ, აკა სამანჯელჲ მიღუდჷ, მუშ გეშა ვაგზალშა გიშულა მოხიოლუდუნ – ჸუდეშე ძღვინით გოჭუჭატელ ლაგუჯის მიჯღონანდეს დო მინშა ლაგუჯის მუშ მუმაჯღონალ ხოლო მაჸუნუდჷ.
სიტიბა მუმაკათუდჷ.
ნანაშ კიდირშე ეტყაბარელ ჩქიჩქუშნერო, შქირენით მორთომაფილს დო ღიაფით ნდღულაფირს კინე ნანაიაშ კიდირს მუჭოთ წურბელა მუკოჭაბილსინ თეშ…
შურიშ ინოხ სოთინ დუტე ქო მაპალუდუ-და ყორყელს ღიჟეთოფურგითნაწიმაცალო მიტიბუდჷ ირ აკანჲ.
ოსხირიშ გითოხვამუაბორჯის კაბერჭის გეცუნაფილ ცუხიშორზაშეცალო ბნდღულუდჲ…
ერზამილ პაპროზიშ ღერეფით გილეფხაჩქუნდჲ ქართიშ ჩხურუთ ციცინაფილ ლერჩქვეფს…
საათის გივოკიკინანდჲ ირ წუთის.
ასე ვარ ასე.
მუშენ ვა მოურს მუშ ბორჯის.
წირკეშ ღალირჲ იშ დუდჲ დო მუნდჲ,
ქო მოურს აბა სო ურს.
კინ ციფერბლატის გითმიოწენს ნაკაკა თოლიშ შქირენულ რზამა.
პაპროზიშ მაჟირა ღერჲ ბარგუნს,
მასუმა მაჟირანს ლერჩქვეფს.
ეხანობას, სხულიშ გინნაკვათაშა ჸვინგით გერაგვაფილ ოქირსეშორო რკიანს მუდგარენ.
მოურს! მოურს!
შულადა დო მერთომაფათ შვაპილ დუც ონდო ჩქიჩქუობაშ ჰამო შინა გაფაფუდუნ, რანწკის კათაქ გამაკორდჷ, აწიკინჷ დო შუშას მელე კომპიუტერს მუკოხუნელ ჩეშმან ცირას ქავოსქიდჲ ჯუქურო.
პასპორტჲ დო ფარა ჭკირილშე გემთოვუსეტელე დო გიწოღალას თიშ ხოწილ კითეფიშ სიტიბას ქაშქირტჷ ჩქიმ ბუძგურიაქ…
დუც გიმე გიმუკინჷ დო აწნარცხონა თუმაქ ოგვერდაშე ჩხვინდიშახ პიჯჲ დოუფორჷ.
მუჭოთ ჯიჭონიშ გოგვიგვილერჲ ჸალეფქ მუშ ქვინჯღალ შქა დო ჯინჯისინ…
ონდო ბილეთის გიშმაჭარუნდუნ დუდშა ვეუკინუ.
კითეფს კლავიატურას უხაკუანდჷ ჯაშა ღვენწკმიშახვილაფირ კიდუცალო,
ნინა ჟინ ლერჩქვიშა მუნუძუდჷ დო გვერდო ფორილ აფუდჷ.
ბჟაშ კიდირშე მუკნაჭვალა ჩხანათ გოზიზინაფილ, ყუნწმეხარცქილ დო დიხას გეფაშქაფილ ლაგინძია ჯამკაკალშა ქო უგუდჷ თუდონ ლერჩქვჲ.
ოხვამეშ ძეკვენეფცალო გოთოლირჲ ჸვინგ დო ყორყელჲ ტყარ ტორონჯიშ ნინძგიშფერო უჭვიანდჷ დო ექი-აქო ჭუჭელეშ ნაცხვაცხვაცალო ჩინჩანა ფარაშ მაფართა-მაფართას აფუდჷ ეჭითინაფილჲ.
ორქოშ ჯვარჲ გიობუდჷ, ქვერსემჲ დო სქვამჲ, დახე თიშ მადიდა ქო რდჷ, ნამდა ჯვარიშ დუდჲ გოძღოძღოწკუმა აჭყაფუდჷ… ჯვარიშ ქვინჯჲ, სოდეთ ქირსეს მუშ გელისმარელ კუჩხეფჲ მაზაკვალიშ ხოკოშა მუნუძუნ, ძუძუეფიშ ღარდაჭყაფუშა აშუსვანჯუდჷ.
წყინწყარპიც, სობოგა დო ჯვეშ ხიბლას ბაღანობას შინკას იფხირდითინ თიქ ქუგმაშინჷ უნელო. მონჭანუა მიშატყურაფილ ბიაშფერჲ, წყინწყარპიჯიშ 2 სვეტერია დო წიწინაფილ შინკა ინუჸვინთუდჷ რკინაშარაშ მოხანდეშ ჩე ოთანთანალაია მუკოქვენჯიშა…
დიო ხოლო ალსამეთიშ ბაღის დუნარზემჲ ალდაჩხირჲ ინაბარბანჩუდჷ ორქოშ ხეშე გიშნაჭახნაკა ძუძუეფშა.
ფეთქუნდჷ დო ინარაჸვალუდჷ პუტარგით გოპულატირჲ დადულ კალმახაცალო…
- ა, პატონჲ, მიდეღითია, – მიწუ დო ბილეთჲ გეგთმოჭირინუნ, კვირკვეს ნაფართხა ჸუმურცალო ქუგმოცუ ჯამკაკალქით, ტყარ ტორონჯქით, ბიაქით, შინკაქით დო კალმახაქით.
მერქაშ მამალას დიფრთჲ თექიანობაშა დო მიდგარენ ოსურქ ოჭიშის ხე ქიგემთვათვჷ, მიმაშქვით ბილეთშავან, გვალო გაგშაპკურცხჲ დო დოპკვარჩხანე.
ქართიშ ჭუხის მეფხარუნქ ირანულ დო ფრანგულ შურამიათ გოზიონთილ შოშეს დო ჩქიმ პაპროზიშ მაშქვიდაია ფურკის ვუკუმუანქ თეშით ხუთილ ჰავას.
ბაბაღუზეთ ვორექ ნაბტან.
გურჲ მონკათ უზუმპუანს ოგურეს,
შურიშღალას მიკმოპჭირდუქ,
ნასინჩხუცალო გუმორზანს.
გავრიშორო ებუძოლაფირ ვორექ. აფუნჲ რე.
აფუნჲ დუთმოდირთუ დო ფუნას იჭყანს შურიშ ინოხჲ.
მაჯერღვია იჭყანს ასე ეშულას.
ჩქიმ ანგაროს ფალუნს მაჯერღვია,
ოთხირეს გინიშ ჯღონჯღო.
ჩხონაფილ ჩქიმ ბებჲ წვანერს ორთუდჷ თიშის.
კალიაშ წვანერს ახაზირენდჷ ხოლო, ხალირ თხირით ეზადილს.
რკინაშარას მელე-მოლე ოძიგირე მოუძჷ დო თექ გილაპჸუნდჲ მა კალიაშ ოწილუშა. ეკი დო დიკი მიბლენდით თოლონჭეშახ დო აკა ჩახვია ემაფშინედეს-და, ხიოლით ცას ვონჭუდით.
ცხვარე დო ნწარე ელაჭკომაფუშ ზადუაშე თელ საგანოს შინელ რდუ ჩქიმ ბებჲ.
სუნელს კაკუნდჷ თიჯგურას, ტაბაკის თიშ დო ღუმუშ მეტ ვა გიღუდუკო მუთუნ გილადვალარინ, ვა გეონჯღორებუდჷ.
ძღაბალობაშე უქომოჯნეთ დოსქილადირჲ, ქომოლიშ საქვარსით გეგაფილი რდჷ,
ღვინს დუთმოდგუნდჷ სქვერიშ ზისხირჯგურას,
ორინჯჲ დო მაფურინჯეს ულუანდჷ ანდას.
კიფერიშ ჯინს კველას გეხედჷ დო ხაშილ ჭუჭელეთ ოდიარუანდჷ ჭოიეფსინ, ამდღარ დღაცალო ფშუ. მა ხოლოშა ვემვოთინანდჷ, კითის მიცვანგუნდეს ჭოიეფჲ დო მოშქურუდჷ ღურუსხის.
ოკუჩხანეშე ათოვუჯანუდჲ ბების,
შხვადო ვებნჯირუდჲ სოთინ.
ონჯირეწკუმა, კიდალაშა ხატჲ მუკუბუდჷ,
ჯეგემარა დო ჩქიჩქჷ ქირსეშ ხატჲ.
ართ დუცხე ქიცა უღუდჷ, დღაშ დო სერით თინა კინაკირუდჷ. ოჭუმარეს გამწოდოხოდუდჷ, ხატის ელაჯინედჷ დო იხვამანდჷ.
ათე წუთის ხოლო ალმასიმე თიშ მარგალურ ხვამა:
„ქიანაშ გორჩქინუ ღორონთ დო მარდიანჲ,
სქან ოროს ქუგობლუაფუდა,
ჩქიმ სქუა დო მოთას,
ჩქიმ დინოს,
თოლსინთე ქიმეჩჲ დო ირნერ ჭუაშე ირსხჲ.
მა თინეფიშ ჯგირობუაშა ქაშმოჯინე.
უბადო თოლით მაჯინეს,
მითინ ქო რე თეჯგურა-და,
თოლჲ გელუწკურჲ დო ქვარა დუფშინე.“
ათეს თქუანდჷ, პიჯვარს გეგლიჭარუნდჷ დო გედირთუდჷ.
ვანაფერო ჩქიმ ბებიქ მითინ დოჭყუკონ.
თეშით შურუქალჲ ოსური რდჷ.
დო, ვა პჭყენქია მა მითინს, თქუანდჷ.
ჭყალა ვა შინერისა დო გინოჩამა,
მითინ ოჭყალ ქო რენია-ვა-და
ირ ღორონთიშ ოჭუმარეს ხატის ვოხვეწუქ დო ვახვამანქია დო მოჯგირე დო მოუბადეს თინა გეგშაგორუნსია.
გერგობათუთას დოღურჷ.
ჩქიმ გეშა პიც თუმა ვა მიჩანუა დო გობურძგონილქ ვა გილეძგვიბინუა-ვა, დომჩინჷ.
მუშ ეკონია ხვამა ხატის ქატუ ანარკიაშე ჰამოთ ელნამბარა მასქურცალო.
ამსერ ჸუდეშა მევურქ.
ბებიშ ჟარნეჩიშ უკულ ვა პოფექ სამარგალოს.
ბაბა დო ნანა თექ მიწონებჷ.
ჩქიმ ნაკვაჩხირჯგურა დაია.
ჩქიმ ჯაბუნაკიშორჲ ჸუდე.
ჩქიმ ატამეფჲ დო სხულეფჲ,
უშქურჲ დო წყი,
მარსინაია ხვიმა დო ჩაფულა ლუღჲ,
ხოჯიშთოლიშ დო ალადასტურიშ ღულა-ღულა ჯინჯეფჲ, ანდაშა წილირჲ დო წილოხირჲ, ანდა მეშარე დო მოჯგირეშ ოსხირსმელე ბირა-სხაპუათ გინმაზარებელჲ.
ლეკეფიშ ორხაგუცალო გოჭარჭულერჲ ორტვინჲ მიწონებჷ.
ჩქიმ ჯოღორჲ მიწონებჷ მუშ ყვაყვალა ლაკვწკუმა,
დო ჩქიმ ქაბულა მიწონებჷ.
შურჲ მიწონებჷ,
ჩქიმ ბაღანობაშ შურჲ,
ჩქიმ არკვანს,
ჩქიმ ნორჩალს,
ჩქიმ ჸუდეშ კიდალეფს უნთხანსინ თი შურჲ.
ჩქიმ ოზეს ოხვამეცალო კუმაფილ მარენჯობა დო შურდგუმაშ შურჲ.
ამსერ ჸუდეშა მევურქ,
საბატონ-ჟაშხას გიმაცადებელო.
მეტ ვა ფჩოდჷ.
მარა თენათ ბლეცერანს დო გურს მირდუნს.
ჩხვირკიშქვარაშფერო აკოსერილ ქართიშ ცას ელვოკიკინანქ დო კინ პაპროზით გილმეფხაჩქუნქ ლერჩქვეფს.
ვაგონშა გემთვოსერგელე ჩქიმ მეკონეფჲ.
კოჩიშობას სოდომ დო გომორჲ მიკნაველ აფუნ, ათაქიან შურით მეხვადუქ.
ბგორუნქ ჩქიმ კუპეს დო ჩქიმ მეკონეფს გილახვენჯიშ თუდო მითვოქვირსანქ.
ართ ნოშქერქილიაჯგურა უჩა ოსურჲ მითოხე დო მეჩხორიეშ ხალირ თასეფს ხვატუნს.
ტინტილაჯგურა თოლეფს აჭი-დო-გაჭითუმარმალუანს დო ნარჩაშე ეჸუნაფილ ქუდიშ წვანდიშახ ბზიმუნს.
მა გალე იბჯინექ დო შურჲ მოლჷ აყარებაშა.
ჩქინ კუპეშ გიმალწკუმა რხინაფილ ბადიდჲ ალარე.
ღვანწკჲ დო ჸვინგჲ თეშ აფჷ ღვირნაჭკილჲ, ნაწყარუშ გეშა ჭიფა-ჭიფას გუნახარცქა ლეკშა მოუგენს.
ჩხვინდჲ გეჯღვალიკერჲ დო ტერტე.
კიბირჲ ვა გიაპალუდას ოკო სარალოს დო ჟინ ნოლჲ დო ლერჩქვჲ ოშმეშამო მარჭვაშა დინუსვანჯჷ.
მუჭო გოლოფაშ გეშა მესქირაფილ წყარჲ ღარს მოკათაფაბორჯის დიჭყანს თხირთხინ დო ხირხინსინ, ეთეშ თხირთხინუნს, იცანცალჷ, უზინდუანს დო უკილოთუანს, მარა მუშ ხვალიშ ეკმაღალარო ხოლო ვერგჷ, გიოხე.
უნელო, შქახანიშ ჩხეშაგოთვითვინაფილ ოსურჲ ქო მადირთჷ დო, თოლგითოწკურილო, კანდიორო ალარაგადანს, მიკმაშქვითია აკა პატონჲ.
სარკოს ვორწყექ – თე გოფშა ოსურიშ ძირაფა დო რხინაფილ ბადიდჲ ბოშკოჩო გინმირთუ.
თოლეფჲ ურწკინუნს.
მუმულცალო ჩირღონდუ.
გითოღალირო ელუძიცანს გოფშა ოსურს, კოსტუმიშ ძგოპის მუთუნ ტანგოშ მასხაპალცალო ფიორით კინუკინანს-დო, მოზოჯითია – მიკმაშქვანს მეშარეს.
ბადიდის მაბოშიაშ გურ ალაძჷ.
ათე ბადიდიშ გურიშ უჯგუშო მითინს ვეიასხუნე ქომოლიშ თექიანურ რინაშ ფილოსოფიურ სმელენჯეფჲ.
ჩქიმ კუპეშა ართ ეხომაფილ ოსურს ჭოკაჯგურა მარდუკოჩჲ მითმაზარენს. ოხვარჷ.
ქორთულო რაგადანა.
მარა მარგალეფ რენა, აბაშარეფჲ, გიოხე ჟირხოლოს.
აკოტახილ ქორთულით ეთმუნწყუნს ოსურჲ მუშ ჯიმასქუას, ჩქიმ დორთაშახ მუთუნ ვა გილალუა-ვა ბინას.
ჭიჭე უმოს გიშათინილ, მარა იშენით აკოლაბარსელ ქორთულით გამენს ჯიმასქუა, ვა გაშქურინასია.
გუთმაჯუნუ დო იტენს.
ჩქიმ კუპეს ხოლო ართ მეშარე შარენს.
ზერზელია დო გვანილ კოჩჲ,
წალენჯიხარ რე.
შუმილ რე დო მუდგარენ ლაგარდე კოჩიშ მეჯინა უღჷ.
თენა ხოლო ქორთულო იჩიებჷ.
იჩიებჷ ვარ, იკილოთჷ დო ისოფუ, მარა ვა აკანწყუ მუთუნქ.
მა შურიშქალჲ ვა მაფჷ.
თუდონ გილახვენჯიშ ბილეთჲ მიღჷ დო ვუჯინექ მუჟამ ეშეხირხოლუნა ჟინ, შულადირ ვორექ დო დორულაფა მოკო.
სუმხოლო ჭკვაპალანა მუდგარენს.
სუმხოლო ქორთულო.
თე აბაშარჲ ცაგანო ელმორაგადანს, ჟიშე დონჯირელს მარსიოლუაფუნია.
მა თოლჸუჯის ვა ვარზენქ.
ოსურეფჲ ვექანცუნა.
ასე გეხენა დო უჯინენა, დაბა მუჟამს გითოფჩანს ჩქიმ ნერვეფჲ დო ჟინ გილანჯირალშა ეშაპცოჸუნქინ.
მიარე ხანს აჸის ოჯინექ.
კინე მუქ გეშეხირხოლ.
ასე ჟირხოლო გურმოულირ რენა დო ჩქიმ საჸალეშ ჩიებას იჭყანა.
მარგალ ქო ვორექინ ვა ოგონუნა დო გინილეს მარგალურშა.
ბერიას ფულირ ნინათ უღუდუა მარგალურჲ დო ლემენცეფწკუმა ლიმაბორჯის ოტყვინაფალო მარგალურს ხვარენდესიავან, თი ამბექ ქო გუმაშინჷ ხათე.
ტყობინ დო ფულუაშ ნინა რენო მარგალურჲ?
საჸალეშ გითარაგადალჲ?
მემჩქუნდა ვარ.
გითვოჯანუქ დო ჸუჯხირზელო ვურჩქილექ მუჭო ეთმოპჭარუნან.
ამდღანერ ახალობას მუთუნ კილჲ ქო უღუნ-და,
სერიალეფს დო „დემონკრატიას“ მუთუნ გლახა ქო უღოლამუნ-და, ირფელ ართო მა ქუმკმოჭარეს.
სერიალიშ ჸალა ოსურეფქ.
მა შურიშქალჲ ვა მაფუნ, დასურო ვა ნოჩქვენია ეს ჩქინობურა-ვა-დო, ოჩიჩალო გახაზირებულ კოკუშეფცალო გოფაჩეს ფსუა დო კუდელჲ, ფურცქინშე რდგაბალშა გინილეს.
უნელო ჩქიმ ტელეფონქ ქო მიორანწკალუ.
მარგალურო.
მარგალურ ბირა დინომჭარჷ დო თის ურწკიალუანს ირო.
გეპჭოფჲ დო ქო დოვურაგადე.
მარგალურო.
ჩიება გავასურჲ დო ეიბჯინინ, თე ოსურეფჲ ეშ მაფართა-მაფართა თოლეფით ქომიკიკინანა.
მუჭო ქო ბძირეს დო თიშვანს დიტყობეს.
გოსისონდეს და მა ხოლო ქო დუმარულჷ.
ცხენწყარჲ მინიბლით დო გუმაკურცხინჷ.
გეიფხაბარკჲ, ხე დო პიჯჲ გამწიბობნჲ დო ხათე პაპროზის ქო მოვუნტე.
მისერგელუდჷ ანაყუ ვაგონმობუნაფილ მანქანა, ჩქი მახინწალჲ მიჯოხონან თინა.
მიშჷ დო მეხინწანდჷ ლურენჯჲ კათას,
თე კათაშ სისმარეფს,
თი სისმარეფიშ ჰამოს დო ჭუას
დო მუს ხოლო აჭუდჷ პუხუს.
ვანაფერო მიძირჷ თეჯგურა ოჭუმარე ჩქიმ ოფუტეს.
ფორონჯიშფერო გოთანელჲ,
ცაშე რგილ დო ჰამო შურიშღალა გიმოუღუდჷ დო დიხას ნირსის ოჸარშანდუნ ფერჲ.
მიფშჲჸუდეშა კუჩხით, დიო ხოლო შქაგვერდო გოთანელ ოჭუმარეს დო ლურით ჟიჟინაფილ პიჯჲ ურთაშ ოფარეს მუკოკვენწელერ გუმათანე მურიცხშა მემიჭოფუდჷ.
ნანაშ გურჲ შხვა რე გვალო.
პიჯშე ზიტყვა ვეკობლაფჷ, საბატონს მოვურქ მაქინ,
მარა ტანშა ქო უგინაფჷ,
გოთანაშა გეუდგინჷ,
ყებურს დაჩხირჲ დუბენებჷ,
წყარჲ ქუგვარგვალუაფჷ დო ამარ, შარამიოლს ქო მუმაზადჷ.
ბაბაქ ხოლო ჯვემაშ ფუთქაფით გეგმორთჷ დო ქო გუმაკირეს ჟირხოლოქ.
ჯოღორქ ვა აწოფხვადუნ, გიფჩაკვირე, დღას ვა გიხვილუნა დო სო რე, მუშენ ვა ლალუნს-მაქ.
- ჯოღორქ ულირ საბატონს მანქანას ქათასხაპუა.
მიწუ ბაბაქ მორდებულო.
მუშ ნაჸვილა რდუკონ თეშ.
გურს მუდგარენქ ქალმანწკირჷ ნაჭვემერჲ დო ნაგოლოფა ყამბარცალო.
ჸუდეშა გემნოფრთჲ.
ნაჩინებჷ შურქ ქო მარაგჷ.
უკახალე ოზეშა გეგმოფრთჲ.
ნაჩინებჷ შურქ ქო მარაგჷ.
ჸუდეშ უკახალე ვით წანაშ წოხლე ჩქიმ დუნარგუა ჭყონს ქავოკინდე თოლჲ.
მორდე დო გოფშაფე,
ტანჲ დოსქუ დო დოგიროხუ.
ჯერღვჲ გამანგარებჷ.
ხასილაშ მეძობელქ გამნმაკათჷ ხათე.
ქო გიობია უწუ ბაბას დო დოფხვამუ.
ქეგთიგურგინუ სქვერიშ ზისხირჲ დო ბირგულშა გოფაჩილ ხე ქიტკატკჷ – აჸ, ანწჲ ონჯუაშახ ჩერიაცალო იპკიონტუქია მა. გეიხირხოლჷ დო ბირა-ბირათ მუშ ოჩხოულეშა ქიგნაჭკირჷ.
დაიაქ გოკურცხჷ.
უნივერსიტეტიშ გამორსაშო იხაზირებჷ დო ინგლისურს გურაფულენს.
ქიმმეხვარია.
ვოხვარუქ.
ინგლისურს გურაფულენა თიშ მახანეფჲ,
ართიანიშ ორაგადეთ ქორთულ უღუნა.
მარგალურ ვა რე მოდას.
ნანა ჩახვიაშა ღვინს, ოჭკომალს დო ცუხიშორზაშეს დინმომინწკარანს დო დაიაწკუმა ართო სასაფლაშა მევურქ.
დოპუნქ არძას დო სქვერიშ ზისხირით ვუჩხაპუნქ გურპიჯის.
ოდუდალე ქუას გითმიოწენს ნდღულაფირ ცუხიშ ჩხე ჩილამურეფჲ.
ბაბუ დო ბებიშ ოდუდალეჸურე ჟირხოლო ორზაშე შქირტუ.
იპუცუქ დო ბაბუშის ვუნტენქინ იზმახანს
ბებიშის მუშით ეთმიანტებუ.
უჭყანიე ჩხანა გიმაფარკალჷ დუც დო ბორია იწარწალჷ.
დაიას ვურაგადუქ, სასაფლას დინორენ თი ხანგა ქო მიგორე აკა, ოჭკომალჲ ქო დოვუტუათ-მაქ.
დოღურუა იქ.
ზოთონჯის დო ზარხულს კუჩხუჩაფულე გილეშჷ. მუშ ჸუდე ქო გიოფარფალუ დო მიდგარენიშ გინორთვილ სასაფლას გითოჯანუდჷ.
გათებე სარალო.
იშ დუნანჯირა აკანჲ გოუქვარქვაშუნა დო ასე ცას მიკოჭაბჷ ხანგაშ შინა. სოთინ ვა რე მეტჲ.
მიჸორს სასაფლას დინოხუნა.
თაქ გოუხვადუქ ანდა საღორონთო დუნაზუკოლას, მეტ სოთინ ვარ.
დიხაშ ჭყანას ხოლო, ჸვანა დო ორტვინიშ უმოსო თაქ იგინანქ.
დიხაშ გუმარჩქინე, მადიარაფალ დო მაჩუალარ ჭყანას.
თაქ იგინანქ დიხაშ უნტუარობას დო დიხაშ აშხარობას.
მითაჟამიშ გოზიორილ ოდუდალე ქუალეფს დო ლეყეფამ ჯვარეფს ვართ წანა მუკოჭარჷ დო ვართ ნაჭარა ეშეკითხირე.
მი ათუნთხორჷ თე ქუალეფს?
მითინს ვა შჷ.
მარა თი კათა 100, 200 დო გოკონ 300 წანაშ წოხლე ჩქიმცალო გილაბაჯგანდჷ თაქ დო ჩქიმცალო გაჯინედჷ ჯაშ ჯინს გითონთხორილ მუშ წიმოხონეფიშ ქუალეფს.
ამდღა მა გილვობაჯგანქ.
მიკილენს წანეფჲ დო ჩქიმ ფუთქურამ ქუას ხოლო გაჯინედასიჸუაფჷ მიდგარენ.
დიხაუჩა ირთანს.
ქიანა გვარგვალანს.
დო მუთუნ ვეთირუ.
უდეშა დორთელს გონწყილ ტაბაკჲ დუთმოფხვადუ.
ღუმუ, ჸვალჲ, ლებია რკვანილჲ, ლეჭკერე, ქოთომ ჭვილჲ დო სქვერიშ ზისხირჲ. მეძობელს შურჲ ონთხჷ დო დუც მინმორე კინ. იხვამანს, შუნს დო მეურს. აკოსერუაშახ ხოლო ართ ჟირშა ქაჭიშუანს თაშ.
მაჟირა მეძობელ მოურს.
ოსურჲ.
ტაბაკშა ვოპეჯუქ დო დუც იჸვილაფჷ.
მარხვას ვორექია.
იპიჩანს.
ამარდე, ხუთ თუთაშ წოხლე ნაღურა ჩქიმ ბებჲ თაშ თქუანდჷ: იპიჩანსია, პიჩვანს გერენია.
აჸ, თე ოსურჲ ჩქიმ ბებშე 20 წანათ რე უკულაშჲ დო მა ძიუთ გუვოშინჲ თე ზიტყვა.
მა ვეპიპჩანქ დო განგერებულ ვუზვირთუანქ ჭითა კვარწახის აშაწაწაფილ ჩელაია ხორცის.
მუთუნ ვა თირე თაქ.
კინე ხაჩქუნა,
კინე ბარგუნა,
კინე ტახუნა,
კინე ქუნა,
კინე ჭყანჭყუნა,
კინე შუნა,
კინე ნირზენა,
კინე ლაჸაფენა,
კინე ოგორანა,
კინე ონდურუნა,
კინე უჸორა დო
კინე ჯოგუნა.
კინე ართ აკანს გირსიოლუნა დო დიხას ჭაბაკანა.
ახალს მუთუნს ვართუნა.
მანგიორ, ჯვეშის გითმიჭყოლიდუანა.
ოსოგოთე თაშ ჸოფე დო თაშ იჸუაფჷ.
მა გურჲ პჭყორდჷ დო თეშ ვიშო მუთუნიშ მოღე ვა ვორექ.
ჩქიმ მეძობელ მივალუანს ხეს. მინილია.
რჩინჷ კოჩჲ რე,
ართო ტიბჷ დო გემუანჲ.
შუმა უჸორს.
ჩილს უძახჷ, ღვინჲ ქო მარულევა.
გვერდჲ ლიტრა ონტირაშე უღუნ ფერჲ შუშაშ კულას გითმიობუნს.
მა ვარიას გივორექ.
მი გირჩქილე.
აჯამუშო მომირე: ვარა შუმა, ვარა ღურა-ვა.
მარზენს მუშ ლანდღვე ჟოგუშის დო ფუშანს.
უკულ ბჯუნუნს დო ფხვამანს.
ორკოლს ხეს გითმუჭირინუანს დო მა მიმნტებუქ.
ხვალე იშ ჸუდეშე ვარ.
ჟაშხა რე დო მიმნტებუქ.
ჩქიმ თურკათას,
ჩქიმ ზისხირს,
ოდღახურ ოხოფანცალო გოფშა კუნთხუს იპტენქ დო მიმნტებუქ,
დო ბჯოგჷ ჩქიმჯგურა მანტენჯეფჲ.
ვაგონშე მუთმუვოკინდუა თოლს ჩქიმ ჸუდეშ აბარწას, ხეს მივალუანა ჸუდეშარეფინ დო მუჭოთ ირონ, ასე ხოლო თხირიშ გურიშ მაფშხვა ჩილამურიშ კაკალჲ მიხოწუნს გიმე ღვას.
ითამ თეთ გიშმეპიდენქ ცოდას.
გინმოპკვათუნქ ჩხოუშიას,
ჯუმს,
ხობწყარს,
ცჷის,
ტეხირს,
ნოღელას,
აბაშას,
ცხენწყარს დო უკახალე დოსქილადირ ართ ტკუ დიხა მეტებულ ჸოროფილცალო ეკმოძახანს: „ვა გიჸორქო მა,
ვა მორწონქო მა;
იშენ ქო გორლუაფუდა,
სქანი ჭირიმა“.
ეკმოძახანს დო ფურიალეს გილაცაცილ ჩქიმ შურიშ შქაბანს დინმოძახანს.
გივი გ. ქარჩავა
2011-შ აფუნჲ
ქართჲ