ჩილამურით ნარაგადი
გოლას დემკოჩი გიმარე,
დიხა იჭყანს ნწალუას,
ვოტყუქუ ჩქიმი ჯიმა რე,
გურს დაჩხირ უსანწალუანს.
მუშ გაჭირებას იჩიებ,
ჩილამურს უტყვარჩალუანს,
გაფაფ უჩინებ–ნაჩინებ
თე რაგად მოგენს თვალუას.
მთელ საქორთუო ქჲმიბღით
ხუჯით ამდღარშა მარგალეფქ,
მუზმა თანთუა გინიბღით,
დიდ აიეტიშ ბაღანემქ.
ენა ირფელი თექ ქორდას,
იშენ ვამაფნა მარდიერი,
ვამიჩქ მუშენი ოკო რდან,
ათე ზომაშა კანდიერი.
ამდღაშა გლახა ვამთქუალ,
გვალო დუც ქუმნობდოხოდეს,
ჭყონდიდელ ჸუნდეს მარდუალ
თეიშა დასურო ძოკო რდეს.
მორდუ აფხაზა მომდურეს,
მუნემქ პატონო გინმართეს,
ჯვეშ ისტორია დომფულეს
მოგურუანა გინორთელს.
დუდ მარგალური ვამჩქუნა
ქორთულით ქუჯიშ ნინა რე,
ვამიჸვილუნა, ვამრჩუნა
ნიჭ მიღუდეს დო თინა რე.
ჩქინ ბოგიშ–ბოგიშ დოხორეს
დემ–კოჩეფიში ძინა რე,
ენემქ ცოტნეშათ დომგორეს,
ნინაქ ქომსხაპ დო თინა რე.
ჩქინი მათანგა ვარენა,
თეშენ ნწალუნა ქიანას,
ჩქინ ჩილამურით ხარენა
ჩქი იბძიცანთუნ რკიანა.
სამარგალოს ლიმა რენ,
შუნა, სხაპუნა, იბირა,
იბძახუქ ჩქინი ჯიმა რე
დო ხასლას ელვოძიგვინა.
გური ჭვილი რე გურ ქორთუ
მიჩქუ დო, თეშენ ფთვინულე,
ჩქინი ელ–მოლუ მიქ გორთუ,
თეთ ფხარენქჷ დო ბძინულე.
ბრელ უგამაგეთ გილართეს,
ენა ქიანას მიოხე,
ართი მუნეფიშ გილარდე...
ამდღა დუდ–კოჩო მიკომხე.
ოდო პიც ენმოღიანა,
მარგალ რენია უთური...
ჩქი ჟიშე ღორონთ ფთხილანა
ვამოჩირთუნა მუთუნი.
იბრდუდით ოდოიათი,
მიჩქუდეს ოლურ კულა რე,
ბრუია ბონდოიასი,
დარულაფარო თქუანდეს.
გიპკურცხინუათ მარგალეფ,
ლურენჯეფს ქარწყეთ მორუნა,
ჯვეშო პოფეთჷ მანგარეფი,
ამდღა ცოცხალო ფთხორუნა.
ეფუთის ვორეთ შინელი,
ჩქინი წაულა ტყურა რე,
მიდგარენს ეკოძინელი
ვორდათუნ, თელო ღურა რე.
დღასჷ ვაპოფეთ მარგალეფი
ბრელ, მარა ვორდით ჯგირეფი,
ძინა ჸოფედას! ქუგგალეთ!
მოხიოლ, ენგოჯინეთი...
02.07.2001 წ.