ჩოლერ კოჩიშ გური
თიშ უფურაშ გინაფა მუთუნ ვარე, მუჟამცით, მუთუნს ვაგინაფულენქინ. რექ დო ვართ რექ, ითამ. გოკო მიდგარენქ მორთას დო გიწუას, ქო რექ, ამარ გეხექ ჩქიმ თოლიშ წოხოლევან, ქუმოიწკიტონუას, ჭუაქ ჭეთ ვარა გაგშგოკურცხინუასინ, მარა მითინ ვაგაპალუ თეცალ მუკი-მუკი. ითამ, გეძირაფა რე თელ ათე რინა დო დღას ვადაბადებექ. ჩოლერ რე დინახალეშე ირფელი. შურიშ კლაუსტროფობიას დიხაუჩას მუთუნნერ ჭუა ვალნოზიმუენ, ორწყექ. ენოხვილ შური ტანს დო ოკო ეშასოფასინ, დუდიშულო ოკო გილაფურინედასინ, მარა ვაუღ ფსუა, ვაუღ ოლუ... უჯინექ კოსმოსიშენ გინოღალირ სერიალეფს, გურაფულენქ ახალ-ახალ, გასახანგებელ ამბეეფს ქიანაშენ, ორწყექ მუ ჭიჭე დო აკაბუცხა რექინ, კითხულენქ ფილოსოფიურ ნაჭარეფს, მეთხოზუქ იოგას, მედიტირენქ, იმაჟირანქ მანტრეფს, ოღოზუქ ეზოთერულ წიგნეფს, ურჩქილექ მუსიკას, მარა მუთუნ ვაგოხვარ, ვა რექ...
დო თეცალ შვანს, ქუმორჭარუნს, ჰო ქუმორჭარუნს თინა დო აფენთებულ სახე დეგერჩქალებ, მალწყარცალო ხვარხვალს ქიდიჭყანქ დო ქიმიოღვარანქ - მიჸორს თელ კოჩიშობა, მიჸორქ მიდგა ვარდენ!
მარა ენა აშ ვა რე.
ვარჭარუნს ინა დო კინ თი ამბე იგინძარებ, ჟი ებჭარინ!..
თენა ხოლო მიკილენს, მარა სი ხოლო მიკილი ეშობას დო მუს გოხვარ ენა...