ჩქიმი კუნთხუ
დეკვირით მუშ მასკვამა რე
ჸოროფაშ ნამინჯარუ,
ჩქიმი კუნთხუ – ჩქიმ სამარე,
შხვადო ღურა ვამიჭარუ;
ირო ორდა მახარია,
თოლიგე დო შურიგე.
უღუდუ დო უღუ ძალი
სქან ხვამას დო სქან ჭყალას,
ბჟა რინაში მაძინალი
დუცუ გიგობარჩხალანს;
ირო ორდა მახარია,
თოლიგე დო შურიგე.
გოპირელექ უქაცვალოთ,
თოლ ვამიჯერს სქან რდალას,
საქორთუოს თუთაცალო
დო მი მიშაყანთალანქ;
ირო ორდა მახარია,
თოლიგე დო შურიგე.
სქან, კიდირი – ჩქიმი ნანა,
ხავერდი რე ხუჭუჭული,
გოლეფ ელგორჯგიმინანა
ჩაით გინოქუქუჩული;
ირო ორდა მახარია,
თოლიგე დო შურიგე.
რინ მუშ მოკო ვამიჸორდენ
რინს თაშ ეფას მინ უტენს...
ირო მოკო ვარდი ორდენ,
გურსუ გიმობინუდენ;
ირო ორდა მახარია,
თოლიგე დო შურიგე.
დეკვირით მუშ მასკვამა რე
ჸოროფაშ ნამინჯარუ,
ჩქიმი კუნთხუ – ჩქიმ სამარე,
შხვადო ღურა ვამიჭარუ.