ჩქიმი შურიშ ოხვამეს
ჩქიმი შურიშ ოხვამეს
ორეკეშო გებუდი.
სი ირდიხას ორდი დო
სი ირდიხას ზეპუდი.
გოჭკირილი გვალეფი,
დინაფილი ეფუთი,
მუ ხოლოსუ ჸოფეთუ,
მუ კონწარას ბჭვებუთი.
მუჭო ირფელ გათებე,
მუჭო ირფელ ლიებე,
თენა მუჭო გიწუა,
თენა ვამაჩიებე.
მიშო ვორექ, ვამიჩქუ
მიშო ბთქუა ნაფულა,
დიხას მუშენ მინმირღვა,
მუშენჲ მინმიჭაბულა.
თოლც მურიცხი ვაგარზუ
დო გიშკირტუ კოჭოფი,
რინა ოკერკელე დო
უკულ სოდგა გოჭოფი.
სქანი ჭუა ვაჩქუდუ,
ვართ ნგარა დო ყარაფი.
ცა დო დიხას სოფუნდუ
კვარკვატელი ღვარაფი.
ქუა იცანცალუდუ,
სქან ძირაფა მორკუდუ.
შური ჩქიმდე რტებული
ჯალეფც გაკიროკუდუ.
ვეჲოჩირთუ ქიანას,
ჟიშე გოფარაქუა,
მურიცხეფი მოცენა,
ჩე კიბირით ნაქუა.
ჩქიმი შურიშ ოხვამეს
ორეკეშო გებუდი.
სი ირდიხას ორდი დო
სი ირდიხას ზეპუდი.
ზუღაშორო ედირთი,
წყარიშორო ეფუნდი,
მა სოდგარენ მიფში დო
სი სოდგარენ მეპუნდი.