ჩქიმ აიეტ დო ქუჯის
მა გიჩინანთ ჩქიმ ბოშეფი,
-ჩქინ ოკოლხეს ქუმინჯით,
ხანი მიარეშ კინოხ
სოიშახ ონჭჷდ, მუ დიდი რდ...
მუთუნ გინაჭყვიდალ იჸინ,
მუს გიწინთჷნ, მირჩქილით:
ორქო ოშშა გეწონით დო
ტერ-მოჯგირე ქიჩინით...
მალიმარო ხაზირ ორდათ,
რაშს მოსართე მუნჭირით,
გითმაჩამალ - გიმმაჩამალს
ოლი შარა მუჭკირით...
თანჯემს მიდგა მანჯირუნი
თისით შარა მუჭკირით,
ტერეფ იშო გეგნოფართხით
თავრე ჭურჭინ - ჭურჭინით...
ლაზონას თქვან ჯუმალეფს
გაჯუნით გურ- კიდირით,
ლერს - არიკი ართო ჭარით,
ართო სხაპით, იბირით...
ირფელიში ოწოხოლეთ
ონწეშ ნინას მუკულეთ,
ნინა-ჩქინი ოხვამერი
- ვაგურუათ უგურეთ...
ბონას, ტომბათ ოგურეთ,
ჭარუა - კითხირს გუძინით,
ტერი ღვას იჭვალიკანდას:
მუს რე ვორწყეთ, მუ ბძირით!
ქვირ - ომბოლეფს, ქესატეფს
შურ დო გურით მეხვარით,
ჯგირობუა ქუას გედვით
-ჯგირობუათ გეხარით....
პოეტეფს დო ჭარუეფსჷ
შურ დო გურით ხე უნწყით,
საწმოხონოთ ისარეჯელით
ხონარ ხონარს მეუნწყით...
იფრელქ ვეშაგალებესჷდა
თქვან დუს ხათე ქუჩინით,
მუმა თქვანიშ დჷნაჩინა
თქვან სქუალეფს დუჩინით...