ცაქიაშ ლერსი
მაყარე
ძღაბი, გედი მალასჷ დო ქიმკიქუნი ბარგია!
სქან უჯგუშის მეჸუნქ ვარა, ვარე სქანი მანგია!
პეპუ მიქა გოხოლუნა, თქვანი აფხანაგია!
თეშ ვარიას რაგადანქო, მუშე გინიხანგია?
ცაქია
მა ის დღას ვა ვაჸუნუქ, მუჭო ჩქიმი სოფროსჷნი.
მა ის ვეკუდოხოდუქ, ქომისქჷნდას ორქოსჷნი!
თეს ვა რდუო მირიგენდუნ, ჩქიმი სინდა გოწოსჷნი?
ინა იცალ ბოში ვა რე, ჩქიმ დაიას მოწონსჷნი!
მაყარე
დიდეფიშე ნათქვამი რე, თქვანი აკოკათუა.
თეშ ვარია ვა გჷგალე, ეშენ მუთუნ ვა თქუა!
ოკო გეგნოგიჸონათჷ, პეპუს აფუ ნათხუა.
ნებით მოლაზოჯი, ვარა ქჷმორხვადჷ ხართუა!
ცაქია
თქვა თის გური ვა უჩათჷ, მა ვებრგჷქჷ ცირათჷნი!
გომიტენთჷნ, იპრტებუქჷ, თუთას ქჷდმოხვილათჷნი!
თქვანოთ საუჯგუშო ორე, მა თქვა ვეგმოდინათჷნი!
მაყარე
ცირა, ხვალე ვა გიჩქჷდა, ხოლო ქორე მაყარეფი!
ეჩდოვითი კოჩი ვორეთ, ალაფშარე ლაფარეფი.
ნაგურალენქ ებყარითჷ, მონძალუნა ყანთარეფი.
ცაქია
ჯიმა, უკული, სო მიშით, ვა რდით ჩქიმი ნაჭანეფი!
ვარა სინდა სო მიშჷ დო, ვარა მუში მაყარეფი?
მა მუშენი გეთმოდინჷთ, მოხუცებულ, საწყალეფი?
ვართ პეპუ-დჷ ბაღანა დო ვართი თქვა რდით მახანეფი!
მაყარე
ეში ნება სო გიღუნა, ესხი ქიმეჩიათინი!
ვარა ჩქჷნი დგომარება, თაქ თქვა ქჷგმიძიათჷნი!
დუდ კვათილო ქჷდოგიტენთ, უბადოთ მიქციათჷნი!
თქვანო საუჯგუშო ორე ბედი ვა დელიათჷნი!
სინდა
- მუ ამბე რე ჩენდჷთჷნი! ვა არწყეთო გოთანა რე?
დინახალე ჩიება დო გალე მანგარი ჸოთამა რე.
ვადუნძალათ, ვეიოდგინათ, ვანებუნ-და, ცოდა მარე!
ძღაბი ვარიას იტყუნდა, ენა შურო ვა მჷმალე.
სპირდონ გულუა და არსენ ჩხაპელია. სოფელი კოჩარა. 1933