ცა კუთანც
ცა კუთანც, კვინჩას უჩქ თაში გოლაფა
და გოქექინი.
ცანცალჲ, რსიოლჲ დო კვეწელი.
რინაშ დღალეფი ართიანც გითმიოტახანა დუც,
მინ ბინეხო ეშმურც დიხაშე, მინ კუმპალ ტიანო
მიკოტვეტვ ორთაშ გერშვილ ნახუბას.
კურცხას ვორექ ,რინა სახეს ითირანც,
ბრელშა შეფხვადუდი მარა ვამჩინებ დო მიკომლუაფ იშო.
ასე თონწყუო გინიფრთე ოკო.
კუჩხორი კათა მიარე მუკოურც, მათ უჯინექ თენეფც,
დუდი მოუღუნა, შხვეფ მოჸუნა დო მუთუ ანწი
გინირთუნანი თინა ხოლო ალაკვირებულ აფუნა.
კუჭალერი მუნაფა დო ნარღი- თის ძაფო მიშაშილი,
ირფელც გინაქუნც.
ლაბარსელ მაფუ გური, ნოქურ თის გიოხე დო
სქან სახე ნოქურცალო.
რინტუშ ბოწოწიშ ლაგუჯის აგურუ დღაშე-დღაშე
ჩქიმ გური. ინმიშაყარანც ჭუეფც დო ხიოლეფც.
ლადარქიანა დიხაშჲ ჸოროფა საკვენ ვარე,
ლაკვა ფირქეფ დო კუნტა შური ვამაძირე
ოდაბადეს,
ლანჯიშ ჯაშჲ ფურცელშორო იკიჩუ ირფელი,
თუთა ჩხომიშ ლაჸუჯცალო იმბარუ,
დო მასქურ ირშიალჷ.
ლერთქემი ჯაბი დო ხიოლ იშაყარუ,
გეშეკაშუნქ შურც დო ადამიერობა ქაწკოდინუ თოლც, ვარა
ჟინერო გინირთუქ წუნ დო მერქაშ მამალას.
ჯალეფც გამკურღვაფუნა ხიოლ ნაჸოფეფ
დო ალეცერენა,
ჭუმან ოკო მორთან თე ქიანაშან თინეფც
ჩქი ვა ვორწყეთ, მარა დიდალეფ გინაფულენა.
ლილაქვირცალო ქუდოფცუმექ ჸათე დიხას,
კარდალაშა ხოლო ვენმართჷ, მარა
ართ ბორჯის ვაგგოჭყორდანი
ჸუბერ ვორდი ჩანარიში.
ლუბა ეფშა აფუ ორთას, ბჟათ მალეცერენა დო
მირდია ფხვამანა.
მათ იბრდუქ, იბრდუქ დო ფკუთა
კვინჩა ჩიტცალო.
ლურენჯო ინახუნეს ოგვაჯეს დო
ვაუჩქ მუშენინ.
მაბორალი ხაბალური გემირღვანც ფსუას
დო ჩქიმ ორაგადე იფათქ დო იფათქ
ცა დო დიხა ათოშვიტაფილო.