ცირა დო მაფურინჯეფი
დოთუ დო თირქ ირფელი ჩეთ გეგნოღაფ. ჸინი დო ჩხურუქ გოსქანჩ წყარი დო დიხა. მაფურინჯეფც გუჭირდეს დუდიში ეჯუმალაქ დო ოფუტეშა მალაფურინეს. ჭიჭე ცირაქ ქოძირ მუში აბარწას აწიწანწალდეს შქირენული ბარღეფი, გურმეჭვიეფი, მასაქელეფი. ეცოდ თინეფქ დო ართი ხუ ქობალიში კაკალი ქაწურღ აბარწას. დიო გენთხეს მაფურინჯეფქ, მარა ცირაქ ჸუდეშა მინილჷნი, ვალიში მამალას გეკორობეს ნინძგით კაკალეფი. ეთი დღაში უკული ცირა ირი ოჭმარე დო ონჯუას აწურღვანდ აბარწას მაფურინჯეფც კაკალც, ცონცის, ნოცერც. ათაში გეგნაღალაფუ ზოთონჯი.
დიხაქ გოტიბ, თირქ გონდღულ დო მაფურინჯეფქ მიოტეს ცირაში აბარწა. მოწყინდ ჭიჭე ძღაბიქ. იფირქ, უმარდულეფი ჸოფენანია მაფურინჯეფი, მადლობა ხოლო ვადუჩინუნანი თეში მიდართესია ტყაშა. მაფალუქ გოფალ. ჩხანაქ ირფელი მწვანეთ გოქუჩუჩუ. ცირა ოზეს ლაჸაფენდ დო შურო ვაშჷდ სოდგარენი ფურინელი მაფურინჯეფი.
ოზეში წოხოლე დიდი, საორიე ცხიმური გეჩანდ. მაფურინჯეფც ქიგმუხუნნა თიში ნოჸელეფშა დო არძო ართო სქვამას ღურჭულანდეს. ნაიაქ უწუ ცირას: ამარი რენანია სქანი ჩიტეფი, ართო გაკოშაყარენა დო ბირა დო ღურჭულით გიგანანია მარდის.