ცურუ.
მინდორიას მჷწოჩანს,
ართი ხუმლა ჯა,
მუშ ფურცელი ვაპალუუ
მჷკობ ხვალე ჭა.
ხანქჷ მერუ დო დახომუ
ჭყანაქ მიდურთ ჸას
ჩხვირკალ–ჩხვირკალ ნოჸელიას,
წვანდი უციკანს.
ჸათე ცურუ საშველს ვარზენს
გაკჷრ, გაკჷრ ტანს,
შურო ვანარღ ჯაშ ხუმაფა,
ცურუ ფურცელანს.
–ცურუ! მუშენ ოშქვიდუა,
მიაშქვი, დეთხი ჯას,
ხანერობა უბაღინე
თითჷ ქოფურცელანს...
გურამ ცურუ ომირკინანს:
–მუს ვოცილუქ მა,
თელი ტანს გუვოკირუქ
ჸინსჷ ვემუშქვა,
მწვანე კაბას მჷკვოქუნა,
ზოთონ(ჯი)ს ჩხურუ ვაფ,
ზარხულს ხოლო ვოფორუქუ,
გოიგონებნო დღას,
ჩქიმი უმუშო მუ ოხვარ
დღალეფ თვალირ აფ...
მიდგაჸინი ჯინს მოკვათჷნს
დიშქათ მიდეღანს,
ასე მწვანეთ ოქვიჩინანს
თაშ მიდეღანს დღას,
ხვალე ცურუ ვერდუუნდო,
აბა მუ ქიმნას,
ცურუ ის ვაფირქენს
ჯას ოშქვიდუანს,
მარა ართო გასაკვირი
თენა ხომ ქორე,
ხვალე „კუჩშა“ ვეგიადგინე
საცოდალი რე...
დიო ჯინჯის ქეთქარჩაფუ,
აკაშა ჯას ქეიაჸუნდა
ჯღასჷთ გიაშქვანს,
დუს მიკიმარგენს დო
წვანს მოულუანს.
არძო ნოჸელს გაგარგატ
„შურს უსხუნუანს“
ხვალე მუშ დუდი უჭირს დო
ჯას ოხომუანს...
„ჯვეშ კოჩიში“ ნარაგადჷ
ართ ქიგიფშინათ:
„გერეშ გერე ირო ორდ,
იროთ იჸუაფ“...