ძღაბი დო ბოშიში ლერსი
ბოში
ირო მართალ მის ათქუე ეჸუნელო თქვანი ცქვაფა?
სისქვამეშე თქვა ზოჯჷნთჷ, არძა ცირეფიში მაფა.
მილჲონიშა ქომისხუნუ თქვან ძირაფა, თოლიშ რძღაფა
დუსუ ვა მჷგოწონუა ჩქიმ ნინაში რაგადით.
მა ცირეფი ბრელ მიძირუ რუსი, ქორთუ, მარგალითი.
ბჟა დო თუთას სი აჩაგრე, მანათებელი სერიში.
ჭირი ქობღოლამუდასჷ სქანი ჩელა კისერიში.
ნოტე მუთუნი ქომუჩას სი რექჷნი თიში ნერი!
გიშნაგორა ოკო ორდე, სარსალია გიღუ წელი.
ზისუნახენს გიგურუა, სი რექ ედემიში ნარდი.
სქანი ხოლოს მითი რენი, ვაი, შური, თიში მარდი!
ირფელიში უჯგუში რე შაფანცქ-ლიმონათიშ შუმა.
მაფშალიაშ უჯგუში რე, სქანი შვენიერი ხუმა.
თოლი ალმასიშ ელარძუ, აბრეშუმიშ სქანი თუმა!
ვაი შური თიში მარდი, მით ცხოვრენსჷნ სქანი წკჷმა!
ცირა
გორწყექ ბოში ჭარუნქჷნი, ნინათ ქოგიბირუაფუ!
ზარალიშა მიშაჲრთუმუ, მელან დოგისქირუაფუ!
სქანი-ჯგურა ბოში ვარი, უჯგუშ დომინდღულუაფუ.
ჩქიმი გალე ვა ძირიო დანარჩენი შხვა ცირეფი?
მა ჯარიშა გიშებლენქინ, ბრელი პუნცუ მაჯინეფი.
ჩქიმი ხოლოს ვა ფალუნცუ სქანი ჯგუა ნადირეფი.
ეჩი წანერ ბოში მოკო, მა ქომონჯო პუნდასჷნი.
იარაღიშ დოკვანწილი ოკო გჷმართუდასჷნი.
სქან ჸუდეშა მუშა იბდა, უჩათ ქიგერჭუდასჷნი!
ბოში, ალმოსხაპანქჷნი, სქანი დუდი გეეწონი!
მა სონდარო ვა გაჸუნე, იმ დღარ-დღაშა დეეხონი.
გურს მუშენი მიწუხე, ვა გაჸუნუქ, გეეგონი!
ბოში
თეზმა ჩქიმი გოლანძღუა, ცირა, ჯგირი რჸოფუდასჷ!
მა ვარიას ვა გიწოლე, სქანდე თენა ქომღუდას.
მათ ეფერსი დოგისხუნუ, გურს დაჩხირი გონტუდასჷ.
ვიშო თოფურ მეგიჯღონი, მომიჯღონიო ნიორი?
ირო დუდშა იცქვანქჷნი, სი ოკო რდე კანდიორი!
ჯგირიშენი ჯგირ გაღოლე, უბადოშენ მანგიორი.
ყორანს ვარდი მუშოთ ოკო ნინძგით გილუღუდასჷნი?
თუნთის სხაპუა ვა დაშვენს, ბიწქის გიორთუდასჷნი!
სი თეშნეშე ვა დარშვენსჷ, ჩქიმნერ ბოში რჸუნდასჷნი!
გოლანძღუა სი გოკოდა, ანწი მა მუგორჩქილუა!
ნინას მოგიწამალანქ დო გურიშა ქინგოჯინუა.
ქომონჯალას ვე ელუდა, ჸუდეს ქინჷგორჩინუა.
აბა, ცირა, დემეკვირი, დოპჭარათ სქანი ლერსი!
საზოგადო-ქიანაშოთ, სქანი ხასიათი, წესი.
ხვალე რექჷნ, ისვისვინა, უდაბნოში რაში ცალო.
ნინა მოწამალერ გაფუ, მაჩამინჯე გვერი ცალო.
ტყურა კოსჷ ქოძირჷნქუნ, იჯინექჷ ჭკვერი ცალო.
მუჟანს ბოშეფს ქოძირჷნქჷნ, დუს ქჷმნალჷქ შერი ცალო.
ცირა
ვარიასჷ გიჩინანდი, ჭყორიშ ოფურინაფალო.
ჭყორინელო გიჭარჷნდი, კოჩიში ოძირაფალო.
საწმოხონოთ მიმოჩქუდი დო ვართი ოდინაფალო.
ვლადიმერ გაბუნია