წყარიში თხილუა
სამარგალოში მუხურეფს ინჭა ჸუდეში წოხოლე აფუდეს ნთხორილი, ოზეში კარწკჷმა, მეშარეში თოლიში ოძირაფალო. მუკმაულარც ჸუმენქ აჸუკონი, წკონდა წყარი ოგორალი ვაფუდ. ბრელშა პოფექ მა შხვა კუნთხუს დო მიძირ გვალო შხვანერი წესი უღუდეს თინეფც, გვალო შხვანერო უჯინედეს რინას. მა სოდეთ ინჭა მიღუნი თექი ის ჩეჩმა გეუდგუდ, _ ჸუდეში წოხოლე, ოზეში კარწკჷმა. ათეჯგუა შხვანერობას ვორწყედინი, შხვა დო შხვა კათა ვორეთო-მაქ, _მიფირქებ ტყობას. შორშა მაჸუ ოულარქ დო წანეფიში უკული კინე დიფრთი სამარგალოშა. ჯვეშო ორდუნი თეში ვადოფხვად თექიანობაქ. მარგალეფს ჸუდეში წოხოლე აკუფშაფუდეს ჯვეში ინჭეფი დო ასე ახალი დუნთხორუდეს ჸუდეში უკახალე, შხვაში თოლი ვაძირუნდუნი ეფერ არდგილც. გამიკვირდ დო მუშენი ქიმინით თაში _ მაქ, იბკითხი. თინეფქ მიწის: წართუა რინაქ. ასე შარას გილურცუნი თი კათაშა ინჭა ვენდინენია. მუდგასიჸინი ქენოირღვანანია უწინდურც დო წაიჸუნენანია წყარც. მუ გიწუათ მარგალეფი! წყარით რე მაჩხონაფალი იორდანეს ნანათა. ქოიგინაფუნა ინჭაში ტყობინაფაში ბორჯიში მულა. აბა თქვა გიჩქჷნა! ღურა უჯგუ ლანდღვირი წყარიში შუმას!.. მალას მიკილენც შარას ჸუმენული ქრისტე. ქუდოიძახჷნა დო გეგნუღით ორკოლით წკონდა წყარი. ახიოლე დო გაკურთხენა. ვავა თის, მისჷთ ლანდღვირი აჸუაფ ინჭანი.